للمتزوجات رفقا بالبنات (( ابراء ذمه ))

ادري بتقولون هالبنية شفيها علينا بهالقسم .. بس اسمحوا لي شي صار في خاطري وحبيت ابري ذمتي …

الله يحفظكم جميع ..ببدأ بالقصة .. وبعدين بقولكم المعنى لي صديقه الروح بالروح .. كانت دايما من هل هالمنتدى وامدحته لي وايد وصراحه ما جذبت .. ماشاء الله المنتدى فيه كل شيء للمـرأه ..وماشاء الله شامل كل احتياجاتها .. انا سجلت في المنتدى بس صارت ظروف انقطعت عن النت .. بس ماانقطعت عن رفيجتي . طبعا انا ولا مرة حسيت بنقص ولا حسيت انا عوانس .. كل اللي حولي متزوجات ماعداي انا وبنت عمي .. وخالاتي اذا اجتمعوا معاي او عماتي ماحسيت بنقص ولاشي لانهم مايفتحون سيرة الزواج ولا يمدحون رياييلهم ولا يطرون اللحظات الرومانسيةولا اي من هالخرابيط .. ادري انها مب خرابيط خخخ .. بس الفكره انهم ماشوقونا للزواج انا وبنت عمي بس كانوا يدعون لنا بالزوج الصالح وبس … كانت عندي فكره مبهمه ولاني احب اطالع افلام ولا اي من هالخرابيط ..

فجأة صديقتي تطري العرس .. وابي اعرس وابي اعرس ويا ساره ادعي لي اعرس لو تشسوفون سوالف العضوات والرومانسية والله وناسه إلخ .. .
وبس كل همها العرس لدرجه انها قبلت باول واحد خطبها .. هي سمرا مب شينه .. والحين هي تدفع الثمن انه ريلها مب شيء وانه كله متحلطم عليها ولا رومانسية ولا حب ولا اي كلام وصارت تلعن الزواج .. وساعه الزواج ..

طبعا شالمقصود هنا ؟نطروني بوصل للمغزى ..

انا مافهمت البنت بين يوم وليله انقلبت نفسيتها وارفعت قضية طلاق الاسبوع اللي طاف ..

المهم ..

هالفتره عندي وقت وفاضيه .. وتذكرت موضوع دخلت له قبل عن الريجيم وقلت امره . .وفجأة قعدت احوس فالمنتدى واقرأ من هالمواضيع .. والله .. انا الي ما اسأل بالعرس واللي اقول اذا لي نصيب بييني ويصير خير مب مستعجله صرت بس افكر بالعرس والزواج .. وقلت لبنت عمي وناديتها تمت جالسين عالنت ونقرأ مواضيع الحريم وفي قلبنا حسره وغصه .. اول مره اسمع هالسوالف بهالرومانسيات وهالطريقه الحلوة .. انا عيني مب حارة واقول عن كل رمسه الله يوفقهم .. بس تمت في قلبي وتمنيت لو اني معرسه .. مواضيع لما العضوات يتكلمون عن رومانسية ازواجهم وعن الحركات اللي يحبونها ولا الهدايا ولا السفرات .. الله يهنيكم بس انتم بدون قصد بتخلوننا حنا العازبات ((مش عوانس )) ننظلكم ونحسدكم ..((هنا ابراء الذمه هههه )) ..

انا وبنت عمي صار همنا في العرس كل مالتقينا كل ماصلينا كل ماقعدنا لدرجه هوس هالشهر اللي طاف … لين كلمتني صديقتي اياها وقالت لي خبر انفصالها عن زوجها وتسرعها .. وقلت لها حرام حلو الزواج والرومانسية قالت لي اصابعج مب سوى ريلي هذا مايعرف الا الطق والسجاير .. تخيلوا !!.. انصدمت .. خبرت بنت عمي السالفه .. وفجأة خفت رغبتنا بالزواج ونسينا هالسالفه مب حلو الاستعجال ومر اسبوعين … والغريب ويا نصيب بنت عمي انها ملكت من يومين على ولد خالتها .. والله يهنيها .. لايقين على بعض (اثنينهم مهابيل )) …

حبايبي.. المتزوجات حرام عليكم والله .. انتوا برمستكم وبذكركم لهاللحظات تسببون بشيئين .. الشيء الاول : تجيبون العين لعلاقتكم الزوجيه .. بدون قصد طبعا .. اللي تطري المواقف وتم تمدح تصير في نفس البنات ونفس الوقت في نفس المتزوجات المحرومات من حنان ازواجهم بسبب طباعهم وشخصياتهم ..

الشيء الثاني : تتسببون بسبب غير مباشر في اعطاء صورة مثاليه للزواج تخلي البنات يقبلون بالزواج لمجرد اسمه الزواج .. مثل صديقتي هذي اللي خبرتني انها تأذت وايد لانها استعجلت بالقبول خصوصا ان بينهم توافق اجتماعي لكن مافي اي توافق فكري ولا في حنان .. والريال يشتغل في الجيش وسود لها حياتها ..استوى لها ضابط عسكري وبتتطلق منه وهي ماكملت معاه ست شهور ..

الله يوفقكم .. واتمنى توصل الفكره .. وربي ماهمي الا راحتكم الله يوفقكم آمين …