عادة يوم أمر على المحل اللي في العين واسمه " تجارة أهلاً " أحب آخذ جولة في قسم مستحضرات البشرة والشعر .. لقيت زيوت عجيبة وغريبة للشعر وكلها صناعة هندية وكلها مستخلصة من نباتات وأعشاب طبيعية.
خذت شوية أغراض .. وعقب شفت علبة صغيرة مكتوب عليها شاباريس .. عناية الصحة بطريق الأيورفيدا.
عاد يوم قريت اللي ع العلبة استانست .. لأني من زمان أبغي أجرب أي وصفة بطريقة الأيورفيدا.
وللي ما يعرف شو هي الأيورفيدا أقول :
هي علم طبى هندى قديم وتعتمد فى طرق علاجها على الأعشاب والنباتات الطبيعية لتحقيق التوازن فى تركيب الجسم.
وأنصح أي وحدة تزور الهند إنها تسأل عن منتجعات الأيورفيدا الخطيرة للعلاج أو العناية بالجسم بدءاً من الرأس ووصولاً إلى القدمين.
ما بطول عليكم.
العلبة اللي شفتها على الرف هاي هي صورتها ومكتوب عليها:
هذا التركيب من الأعشاب الأيورفيدية يمنع جميع مشاكل الأسنان ويوفر البياض واللمعان للأسنان ويشفي ألم الأسنان وتعفنها والتنفس الخبيث!
شكل العلبة من الجهة الثانية
وهذا هو شكلها من الداخل .. عبارة عن بودرة لونها رصاصي .. ولها رائحة.
أنا شارية العلبة من زمان بس ما فكرت أستخدمها إلا اليوم .. أول ما قمت من النوم وفرشت أسناني .. يبت شوية من البودرة وحطيتها ع الفرشاة وفرشت أسناني .. وتفاجأت بالنتيجة من أول مرة.
والله ما أبالغ يا خواتي إذا قلت إني حاسة جني مسوية عملية تنظيف أسنان عند طبيب الأسنان .. لين هاللحظة أتحسس لثتي وأسناني وأحسها نظيفة وما شي أثر للجير.
طبعاً أنصح باستعمال كمية قلييييييلة جداً لأن المستحضر باين عليه قوي .. يعني ربع ملعقة تكفي وزيادة.
بس ملاحظة بسيطة:
الفرشاة بيتغير لونها للداكن من البودرة .. فإذا حبيتي ممكن تستخدمين فرشاة خاصة.
أما السعر .. فلا يصدق أبدا .. فقط درهمين ونص!!!
والله ناوية أمر عندهم وآخذ لي كمية قبل لا يرتفع سعره أو يختفي من السوق .. من زود فرحتي بالنتيجة 
……
خواتي لا تسئلوني إذا المستحضر موجود في باجي الإمارات لنه ما عندي فكرة .. بس جربوا تسئلون وتدورون وان شاء الله تلقونه
المشاركة الأصلية كتبت بواسطة الظبي الدماني 
أنا حصلته في " تجارة أهلاً " عندنا في العين.
خواتي لا تسئلوني إذا المستحضر موجود في باجي الإمارات لنه ما عندي فكرة .. بس جربوا تسئلون وتدورون وان شاء الله تلقونه
تسلمين