خواتي بنتي عندها مشكله ويا مادة التاريخ والسبب مدرسة الماده بصراحه هالمدرسه بدت ادرس بنتي من صف خامس ابتدائي ومن بدايتها كرهت بنتي ما ادري ليش دايما تقول لي انها ما تشارك ومن طبيعة بنتي انها هاديه وخجوله لكن في الامتحانات تيب امتياز ويوم تسألها فجأه اجاوب يعني كمدرسه لازم تتفهم انه فيه فروق فرديه واذا بنتي تيب الها 96 في الشهاده يعني ما عليها كلام ::: لين في يوم صارت مشكله كبيره بيني وبين المدرسه لانها تعرضت لبنتي بدون سبب وخلاني هالشي اسير المدرسه وارفع صوتي على الاداره وعليها لو ما انهم هدوني كنت بصراحه بتماط وياها ومــــــــــــــــــــــن يومها الله لا يرويكم زاد كرها اصلا شكلها عفاني الله حقوده :::: انزين الحين لبنيه صف ثاني اعدادي ونفس المدرسه تعطيها كل سنه والحمد لله درجاتها ممتازه :: الا السنه خلالالاص بنتي مب قادره تتحمل معاملة هالمدرسه لها وانا سرت من شهر مجلس الامهات وتناقشت وياها لكن احس ابها ما منها فايده ::: المشكله ان البنت صارت ما تهتم بمادة التاريخ وما تخبرني انه عندها امتحان في الماده وصارت تييب درجات وايد اقل من مستواها ::: وهالمدرسه شو تسوي اذا يابت البنت درجه عاليه ما تراويها المشرفه ويوم تيب درجه نازله طرشت لي الورقه مع ملاحظة ارجو الاهتمام :: انا انقهر وانا عارقه مستوى بنتي من دشت المدرسه ولا مره يبت اقل عن الامتياز طول السنه ::: لكن هالسنه الله اعلم اخاف مستواها ينزل بسبة حقد هالمدرسه :::: ولا تقولون رمسي الاداره لانهم ما يهشون ولا ينشون خبر خيرررررررررر
وبصراحه اليوم يابت لي ورقتها كتبت ملاحظه ( الرجاء الاهتمام ) قمت كتبت على الورقه الاهتمام يجب ان يكون من المدرسه وانا اقصد تدني مستوى مدرسة التاريخ وطبعا لبنيه ازرق واخضر ويها خايفه من انتقام هالمدرسه
شووووو اسوي فيدوني الله يخليكم والله لآعت جبدي كل سنه على هالموال من صف خامس وناويه انقلها السنه اليايه والسبب مدرسة التاريخ
مسكينه والله بنتي كل المدرسات يمدحونها والسبب هدوئها وخجلها وفي نفس الوقت كل نتايجها ممتازه
الا مدرسة التاريخ حاطتنها في مخها ليش ما ادري !!!
كيف اعيد للبيت ثقتها بنفسها
ومن فضلكم اللي تعرف مدرسه خاصه في دبي تكون ادراتها ممتازه وجاده مب اي كلام تخبرني في الخاص لني اكيد ان شاء الله بنقلها السنه اليايه
وشكرا
من رايي اختي تحاولين محاولة اخيرة مع المدرسة …يعني كلمي المديرة بحضور الاخصائية عن كل اللي في خاطرج بالنسبة لهالمعلمة … اهم شي تحسينهم واقفين معاج وفاهمين المشكلة كاملة عدل .. وبعدين يطلبون حضور هالمعلمة ويرمسونها جدامج وانتي تتفاهمين معاها بهدوء قوليلها شو مشكلتج مع بنتي بالضبط ..يعني البنية شاطرة وهالشي محد ينكره ودرجاتها في كل السنوات تشهد بهالشي … فليش تعاملين بنتي هالطريقة ……..
حاولي تعرفين السبب في تعاملها مع بنتج بهالطريقة الظالمة !!
مو معقول تحقد عليها او تعاملها جيه لله في لله بس بدون سبب !!
حاولي تتحاورين معاها بهدوء وتخلينها هي من نفسها تفضفض لج عن سبب هالمعاملة للبنت
وعقب عاد اذا ما شفتي اي فايدة لا من المعلمة ولا حتى الادارة
ما في غير تنقلين بنتج لمدرسة ثانية افضل عن جيه
بس قبل لا تنقلينها …. لازم تقعدين ويا بنتج …هي مشاعرها اهم في هالموضوع يمكن البنت ما تبغي تنتقل ويأثر هذا على تفكيرها عقب لو انتقلت ….يمكن متعلقة بالمدرسة وربايعها وما تحب تفارجهم
….. لازم تراعين هالامور بعد
واذا البنت حسيتها عادي عندها .. وحابة تنتقل ..خلاص توكلي على الله وانقليها
وبكل الاحوال … اقولج الله يخليلج هالبنت ويحفظها لج ويوفقها ويوفقج وين ما راحت
وأحييج على اهتمامج بمستقبل بنتج ودراستها
وفقكم الله
بس صارت المساله تحدي بيني وبينها
اذا اختبرتني تختبرني لحالي في زاويه الفصل تبيني انهز وما اعرف اجاوب..
بس ما قدرت تحرك فيني شعره فقولي لبنتك .. هي تبي تتحداك وانتي لا تستسلمين الين ننقلك السنه الجايه وذاكري وخذي درجات زينه عشان تتفشل ..
واذا هي قرفانه منها مره لا تضغطين عليها اببببببببببببد ترا سنها مره صعب بكيفها
وتخافين انها تترك المدرسه بكبرها ..
انا حطيت تجربتي ويا مدرسة التاريخ عقب.. عسب مابا اطول عليكم في الرد.. واللي لها خاطر تقرا بتقرا سالفتي….
اختي انا اظن انج تنقلين البنت اريح لها ولج… وبتتغير نفسيتها… ماحب بنت صغيرة مثلها وفي سنها تاخذ موقف من المدرسة ومن المعلمات.. بصراحة بعض المعلمات متعقدات مادري ليش… والبنت مالها ذنب اذا انتي عصبتي على المدرسة.. وبعدين عصبتي لأنه مصلحة البنت اهم من اي شي…. لو كان عندي بنت متعرضة لهالشي أول شي بسويه بنقلها.. الله ما اكثر المدارس.. بس لا تخلينها جيه ضايجة ومهملة مادة هي شاطرة فيها… حرام…
والحينه اللي عندها وقت تقرا سويلفاتي
من سنين كانت مشكلتي مدرسة التاريخ… في أول ثانوي ما كنت مهتمة.. وكنت اييب اي شي.. ويوم سرت ثاني ثانوي اهتميت وقمت اذاكر اكثر والحمدلله درجاتي عاليه.. وطبعا مدرسة ثانية.. في ثالث ثانوي درستني مدرسة أول ثانوي.. وتمت تحبط من معنوياتي… وتقول غريبة درجاتج عالية.. يعني كانت تتعمد تحرجني.. ويوم اتييب الدرجات واكون يايبة درجة كاملة اتيي على طاولتي وتقول اشوف مب كاتبة شي… وانا بصراحة منقهرة منها…
وهالمدرسة عادتها انه يوم البنت ما تجاوب.. تخليها واقفة وتسأل بنت أو بنتين وراها وعقب تسألها واذا جاوبت تيلسها واذا ماجاوبت تخليها واقفة.. رغم انه كنا ثانوية عامة وطولها..
لين مرة من المرات تعرفون شو سوت فيني.. سألتني وماعرفت اجاوب رغم اني احضر لها من الخاطر.. بس سبحان الله نسيت المعلومة.. وتمت تسأل الصف كله لين خلصت الحصة وانا مرتزة… طوفتها.. ردت كررتها بس وياي انااا.. بس انا والله يا بنات اني مش متعادية وياها بس هي مزاجها جيه… وتوقفني طول الحصة بدون ما تسألني.. مع انه شي بنات ثانيات يوم ما يعرفون الاجابة ترد تسألهم عقب شوي.. لين يتني حاله وتميت اطنشها.. ويوم تسألني اجاوب وايلس قبل ما تقول تفضلي.. وتميت متعادية وياها ومووول ما ارمسها.. مووووووول.. ويوم اتيي الموجهة تربع تشل دفاتري لأنها مرتبة وحلوة وفيها خرايط والوان.. رغم انه تاريخ وما يحتاج بس انا اي درس فيه خريطة على طول ارزها..
وتمت مطنشتني.. لين نهاية السنة.. يعني ما قامت تسألني.. مادري لييييش.. ورمست الاخصائية قالت بزقرها وتفاهمي وياها.. قلتلها اكرهها ومابا ارمسها موول.. قالت ما يستوي مدرستج وما تبين ترمسينها.. قلتلها هي مطنشتني.. قالت انزين انتي حضريلها حتى لو ما تسألج عسب ما يفوتج شي.. سويت بنصيحتها.. تدرون انها فاجأتني مرة وسألتني.. وجاوبتها ويلست على طووول… لين خلصت السنة وخلصنا ثانوية.. وعقب يوم تشوفني في عرس والا مكان تسلم عليه بحرااااااااااااارة…
انا اشوف فيها حالة نفسية..
مشكوره اختيه ورايج في محله انا رمست ابوها وقال انه عقب العيد بيطلب انه اييلس ويا المدرسه ومشرفة الماده عشان يعرف ليش هالمدرسه تعامل بنته جذيه لاني انا تعبت وانا ارمس وياها وما شي فايده :: وعن النقل لبنيه بروحها تبا تنتقل رباعتها معظمهم بنتقلون ::: وللأسف اختيه مديرة المدرسه راسها يابس وما عندها معرفه بكيفية التعامل في مثل هالمواقف لني جربيتا قبل تحسين هيه في عالم والمدرسات في عالم ثاني :: واللي ايديرن المدرسه بعض المشرفات وطبعا هيه عايبنها لانها عاقه الحمل عليهن ومريحه مخها ( للعلم هاي مدرسه خاصه )
ويزاج الله خير على الرد
::::::::::::::
حلاو قطن
فعلا اختيه سنها وايد حرج ::: البنت في سن المراهقه لكن ولله الحمد عاقل ما الها حس وهاديه جدااا :: تصوري انه في مجلس الامهات مدرسه قالت لي خاطري مره اشوفها اتشاغب انا قلت الها لا ان شاء الله ما تشاغب وزين ما كانت ويايه لانه هالشي ممكن يغير من شخصيتها :: يعني البنت صح يبونها تكون غلط !! والله مدرسات آخر زمن
وعن التحدي والله وحليها من صف خامس يالسه تتحدى وفعلا في النهايه تفوز ضد هالمدرسه بدرجاتها الممتازه لين قبل شهر وهيه تيب درجات عاليه الا هالفتره المدرسه وايد تضغط عليها صارت اطنش ولا تذاكر ونزل مستواها اقولج من حدرت المدرسه ولا عمرها يابت درجه نازله ابدا ابدا لكن الحين صارت تيب في الماده 7 من 12 //// والله اول مره وحليها انا ما حرجت عليها قلت الها ما عليه بتعوضينها ان شاء الله // صاحت وقالت كله من المدرسه اكره الماده بسبتها /// رغم انه في مواد تاخذهم باللغه الانجليزيه وايد اصعب مثل العلوم والرياضيات لكن درجاتها امتياز لنه المدرسات حبوبات ويحبونها لانها هاديه ::
مشكوره الغاليه على الرد
:::::::::::
أمووون
ان شاء الله بنقلها السنه اليايه خاصه انه مستوى المدرسه نزل وايد حتى الاستقالات زادت عندهم وتمو يضغطون على هيئة التدريس يعني المدرسه ادرس كم صف وكم مرحله فصارو طول اليوم معصبين ومالهم بارض حتى الكل يشتكي انهم طول الوقت الا يصارخن ويهزئن البنات على اقل شي والسبب الضغوط النفسيه ::: وعلى قولتلج المدارس وايد واحسن انقلها هيه واخوها رغم انه اخوها دايما ياخذ الاول على صفه والثاني على المرحله اللي يكون فيها والفرق بينه وبين الاولى ربع درجه والسبب انه الاول على المرحله هوه ولد وحده من مشرفات المدرسه واذا عرف السبب بطل العجب يالله على الله
::::::::::::
وعن سالفتج سبحان الله نفس سالفة بنتي في اشياء معينه مثل التطنيش لكن بنتي من البدايه ممتازه في الماده السنه بس اتراجعت من شافت ويه هالمدرسه مره ثانيه عنبو ما عندهم غيرها !!
وانا في مجلس الامهات قالت لي بنتج ما تشارك قلت الها اظني انتي ادرسينها من صف خامس ما له داعي نعيد وانزيد في الموضوع انتي اسأليها على راحتج بدون ما ترفع اديها وشوفي بالجاوب والا :: لكن من شهر اسأ ل بنتي تقول اطنشني ولا جني موجوده وادور عليها اي شي مثلا ::: بنتي عنده مساحه عوده شوي وكانت البنت يالسه تحل في ورقة الامتحان البنت اللي وراها خذت مساحتها وبنتي موخيه وما تدري ما وعت الا هالمدرسه هاجمه على بنتي وتسحب المساحه وتقول لها انتي غشيتي لبنيه تقول الها شو السالفه ثره اللي وراها كتبت لبنتي على المساحه غششيني :: انزين شو يخصها بنتي طبعا المدرسه شلت المساحه وقالت الها جدام البنات انا بتصل بامج وبشوفين :: مفروض تتصل بام الثانيه مب انا لكن لين يومكم ا تريا اتصالها من حوالي ثلاث اسابيع ولا اتصلت طبعا ما عندها حجه على بنتي والكل عارف اخلاقها ::: واساسا المدرسه ما اطيقني لاني من النوع اللي ما اسكت ::
ومشكوره اختيه على مروج الطيب
::::::::::::::::::
والله يا خواتي انا ما اشجع بنتي على انها تعادي المدرسه بالعكس حاولت احببها فيها اكثر من مره رغم اني انا ما احبها بسبة تصرفاتها ويا بنتي لكن ما شي فايده حتى العام تريت مناسبة عيد لالام وطرشت هديه لها مع بنتي يمكن يحن قلبها خبر خير
ومثل ما قالت الاخت أموون شكلها فيها حاله نفسيه
بس تدرون انا خبرت بنتي اني نزلت الموضوع في المنتدى وقلت الها عن ردودكم :: تدرون ابتسمت وقالت يعني في حد شراتي قلت الها لا فيد مدرسات شرات مدرستج :: لكن انتي والاخوات اللي ردو طبيعين والمشكله في الطرف الثاني
لآحظت انها شوي حست بثقه
ادعو الها ربي يوفقكم
والله ساعات اصيح من معاملة هالمدرسه لبنتي لكن مب جدامها :: مب لانها بنتي لانها ما تستاهل هالمعامله والسبب تافه انه خجوله وهاديه
للعلم والله من حدريتا المدرسه دايما تيب آخر العام او منتصف العام :: 94 او 95 % يعني مستواها ممتاز
شو يبووون اكثر من جيه ما ادري والله
لا حول ولا قوة الا بالله العلي العظيم
قوليلها انها مش المدرسة الوحيدة اللي جيه… وقوليلها أن الانسان احيانا يمر بظروف تخليه متضايج.. طبعا هذا مش تبرير للمعلمة بس انا اباها تحس انها مش مقصودة في الموضوع.. وانه المدرسة تبالغ في تصرفها بسس…
فديتها الله يخليها لج وتفرحيبها ان شاءالله
المشاركة الأصلية كتبت بواسطة أمووون 
قوليلها انها مش المدرسة الوحيدة اللي جيه… وقوليلها أن الانسان احيانا يمر بظروف تخليه متضايج.. طبعا هذا مش تبرير للمعلمة بس انا اباها تحس انها مش مقصودة في الموضوع.. وانه المدرسة تبالغ في تصرفها بسس…
فديتها الله يخليها لج وتفرحيبها ان شاءالله
الله يحفظج اختيه ويسلمج
تصدقين ولله الحمد من عقب ما نزلت الموضوع وعرفت الردود صارت احسن الحين ( سبحان الله الناس للناس وفعلا الكلمه الطيبه تهدي النفوس حتى انا تميت انظر للموضوع بشكل ثاني )
حتى اليوم فرحت يابت لي ورقتها مال امتحان العلوم ماخذه درجه كامله ::
احس انها بدت تتغير :: وبدت ما تهتم بتعليقات المدرسه
الحمد لله على كل حال
ويزاكم الله الف خير جميعا