دوم يوم حد يتكلم وياي بالمصخرة اجلبها بالجد ..وعقب ازعل واسوي ضرابة من لا شي …!
يعني تخيلوا امس ربيعتي كانت تكلمني في سالفة ومرة وحدة تمصخرت على شي ..وانا ما كنت ادري انها مصخرة وتميت اتضارب وياها وجان تقول انتي مب ويه حد يسولف وياج …
بس عقب احس بالذنب وايد ، واحس اني غلطت …
ما عندي حس الفكاااهة ..وخاصة مع اللي اصغر عني …اكون جادة ويا الكل بس مع ربيعاتي فرفووشة بس بعد ساعات امصخها لو حد ما عرفه ..!
ساعات احاول اسولف واتمصخر محد يتقبله مني …يتحسبوني جادة ..واحس ساعات مصخرتي تكون ثجيلة لاني مش متعودة على االتنكيت..
حتى في الدوام بعد نفس الشي ..انا كنت ياية من وقت …ويالسه على مكتبي ولا شوي طلعت ونزلت تحت مدة نص ساعة..يوم رديت شفت زميلي كان يالس وقالي اول مرة تيين متآخرة ..وكان يضحك ..بس انا عصبت قلت اصلا انا ياية قبلك انتوا اللي تتاخرون ..وجان هو يقفط واكيد قال في خاطره ما يسوى عليه
ومثلا كنت سايرة اتحنى في الصالون جان ووحدة قالتلي حني ريولج بعد ..وانا قلتلها بفكر ..ويوم يت تحني قلتلها انا قلت بفكر ما قلت حنيلي والله كنت معصبة بس عقب غمضتني ..
والمواقف طبعا تطول ..بالاختصار انا صايرة وايد جدية وايد وايد ..اتدخل في تصرفات غيري ..مثلا لو انا اشتغل طول الوقت في الدوام ..واشوف وحدة من زميلاتي ما تشتغل اقول في خاطري ليش هي ما تشتغل وايي عندها وانغزها اقولها وايد ريحتي يالله اشتغلي ولا شي من هالقبيل
بنات خالتي امس طلعوا وياي ..قالولي يبون يسيرون مكان قلتلهم لا ما اقدر وما ادري شو ولين ما اخر شي اختربت علينا الطلعة
اختي وايد تسهر عالمسلسلات وانا دوم اتضارب وياها لا تطالعين فالليل سيري ارقدي لين ما اخر شي قامت تراددني ..والضرابة تطول واخر شي انا ارقد وعقب هي تفتح المسلسلات
ما ابقولكم اني عصبية لاني بالفعل مب عصبية بس ما ادري ساعات اتغصص لما اشوف تصرفات غيري ..واتدخل واتضارب وياهم على اساس اني الصح ..
ما عرف اتناقش اقولها بكل صراحة ..لاني اصلا ما عندي شي اقووله ..
كيف اقدر اغير هالطبع فيني ؟
اشكركم على سعة الصدر
حسيت ان انتي عادي تقفطين ولا تنغزين
يعني ترضينها ع غيرج بس ماترضينها ع نفسج
حبوووبه غيري من نفسج
عن نفسي ماحب اختلط او افكر ارمس وحده شرات هالصفه
ابتعد قد ما اقدر لو منو ماكانت
ف كل شي ف ايدينج
لا تخلين الناس تبتعد عنج بسبة هالشي
حاولي ماتزعلين الحياه حلوه
بس وقت الجد جد
والسموووووحه الغاليه
انا بصراحة انفر من الناس اللي جي واحاول ما احتك فيهم لانه صدق اسلوب مب حلو
انا ماعرف شو ضروفج بس حاولي تتعوذين من بليس وخلج كول على طول
وربي يحفظج
قبــل كــل شــي حــآولي إتيوديـــن عمــرج لــآنج إذآ إتمــآديتي صدقيني بتروغيــن الكــل من حــولج .. ))
إبتسمــي فــ ويــوهم وإنصــحيهم بــ هدآوه .. ربــي يطمن قلبــج إن شــآءاللـــه .. ))
لــآهنتي والســموحه منــــج ..
لاتخلين الناس تبتعد عنج لان الانسان مايقدر يعيش بروحه
فكري في نفسج انتي ماتحبين حد يغلط عليج وماتحبين حد ينغزج بالرمسه؟
وتحبين حد يونسج ويضحكج وتحبين تسوين اللي يريحج
اختج لاتناقرينها ع المسلسلات لانج بتخسرينها بهالطريقه وهاي اختج وانتي محتاجتنها
هل انتي الشخص اللي بالفعل ممكن تكونين قدوه بحيث انه اختج تسمع كلامج وتحترم رايج
وتستحي انها تسوي اي شي مايرضيج جدامها؟؟
غيري نفسج حبوبه اللي ماترضينه لنفسج لاترضينه فالناس
وحاولي تكونين اهدأ واوسع صدر والابتسامه دايما ع ويهج ,,
وهذا شهر الخير حاولي تستغلينه بأحسن طريقه تغيرين نفسج وتتخلصين من عادات وصفات سيئه ,,
ولا لينه فتعصرين وخير الامور الوسط
وقت الجد يختلف عن وقت الضحك والسواالف 0
الله ايسر امورج وينولج الخير فديتج 0