وينكن حريم و كروشات للمرة الثانية ؟؟!!!!!

انا بعدني ما ربيت امس طاف موعد ولادتي

واليوم سرت كان عندي موعد و رايحة مستانسة و شاقة الحلج ما خليت ابتسامة ما وزعتها على حد

ويوم شفت الدكتورة قالت لي موعد ولادتج طاف و بعدج ما ربيتي

و كشفت ع البيبي قالت مب نازلة صح في الحوض

و عقبها كشفت علي تحت ودخلت ايدها تحت تخيلوا و انا بعد بجر مصدومة من هالحركة و قمت اخذ نفس و نفس الوقت قمت ادمع على وشك الصياح قالت لي السيستر خلج قوية المهم بعدها قالت لي الدكتورة انا الحين سويت لج توسيع و ان شاء الله ع اليوم او بكرة تربين ان شاء الله بس اشربي قرفة و امشي ساعتين ثلاث و اخذ لج دش دافي خاصة ع الظهر

و عدلت لي راس البيبي شوي فخبرتها قتلها هاليومين اييني ويع في الظهر والبطن والريل يروح و يرد و فوق ها كله الم بين الفخذين و البيبي تقريبا طول اليوم ترفس ما ترقد و تنش شرات قبل جان تقولي ها معناته انه البيبي تبا تطلع و تضرب براسها يمين و يسار بين فخوذج"جان اقول فخاطري شكلها مب دالة الدرب فديتها" عشان تطلع بس مب عارفة و شافت المشيمة بالتلفزيون جان تقولي حتى المشيمة تقول خلاص لازم تولدين

وبعدها يا حلوات قالت لي اذا شفتي ماي او دم او حسيتي بألم تعالي الطوارئ على طول

وقالت اذا ما ربيتي تعالي يوم الاربعاء نسوي لج تخطيط و تلفزيون و اذا بعدها ما ربيتي بعد بنخليج لين يوم الاحد وبعدها بنولدج بطلق صناعي

وماشي بعدها رجعت البيت و كرمتوا دخلت الحمام الا اشوف دم نازل وقمت و خبرت عمتي ام ريلي و قالت لي توج ياية من عندهم ما صار لج نص ساعة بس تدرين قومي خلنا نسير المستشفى المهم و انا يالسة اتجهز ادمع و اقولها لحميتي معقولة اللي يصير هذا صدق بربي قالت لي روحي و توكلي ع الله

وماشي طول الدرب عمتي تقول اكلي لج شي يبت لج رطب و شوية خفايف جان اقولها ما اشتهي و احسن اني ابا ارجع و وصلنا المستشفى و دخلت والدكتورة ياية بتكشف علي تحت جان اقولها دكتورة شوي شوي جان تقول بعدني ما سويت شي سألتني كلتي؟ قلت لها لا و ردت علي حرام ليش ياية الحين توه فاتح واحد سانتي روحي البيت اكلي و ارتاحي و اذا زاد عليج الويع بعدين تعالي حرام نرقدج عندنا و تتغربلين و قالت لي الدم اللي نزل عليج طبيعي مال التوسيع قالت لي حتى الحين بعدج ما كشفت عليج تحت بينزل عليج لا تخافين عادي

و عاد اول ما طلعت من المستشفى استانست و ضربت ع الرطب و الخفايف و رديت البيت و تغديت و رقدت و امي وحليلها كل شوي تتصل تتطمن علي تقولي حاسة بشي اقولها لا الم خفيف في الظهر و الحين توني مخلصة مشي و احس ظهري يألمني و قلت بسير اخذ لي دش والله يسهل

وهذي قصتي اليوم

ادعولي خواتي