ويهي استوى صاافي و ارتحت من الحبوب في اسبوع واحد تعالي بخبرج السر ^_*

حطمتني الصراحة و حسستني بحجم المأساة و الكارثة

مع العلم ان الحبوب اللي كانن في ويهي صغاار لكن على كبر الويه و بالذات منطقة اليبهه و ويهي دهني .. اعتقد فهتموا ؟ مع اني ماعرف اشرح لول

المهم قلتلها انا تعالجت عند وايد دكاترة و جربت معظم الأدوية و الكريمات بس العلاج ياخذ فترة طويلة بالشهور و مفعوله بطيء و انا اتعايز و ما اكمل ! و من غير التأثيرات الجانبية شرات الجفاف و تقشر الويه >_<

قالتلي انا عندي منتج طبيعي و اضمنلج الحبوب بتروح 100% و ويهج بيستوي صاافي في اسبوع واحد <— كانت تتكلم بثقه عجيبة !

طبعاً انا ما صدقتها و قلت فخاطريه شو هالدوا السحري اللي يعالج الويه في اسبوع ؟!! اكييد خريط بس تسوي دعاية حق عمرها ..

قلتلها ثانكس مابا لاني جربت كل شي و ما نفعني جان تقول انا اضمنلج هالمرة و تعالي بعد اسبوع اذا ما استفدتي برجعلج فلوسج و اذا طلع كلامي صح تعطيني جوكليت

المهم بعد كل هالمحاولات و بعد ثقتها العجيبة و كلامها ان الدوا طبيعي و ما منه أضرار قلت بجربه مب خسرانة شي و اتشجعت لأن مفعوله سرريع و انا من حزب العيازات لول

الدوا عبارة عن اسبراي (بخاخ) صغير حجمه 20 ملي ترشينه على ويهج بعد ما تغسلينه بالغسول اللي يناسبج و تستخدمينه مرتين في اليوم ؛ الصبح و المسا ..

اسم المنتج SKIN REPAIR LOTION من شركة نيبو NIBO صنع تايوان (مب صيني) و على فكرة هالماركة رخيصة و جدييمة من زماان منتشرة في المكياج بس اتحذرن لان شي تقليد صيني منها .. اللي عند هالحرمة الماركة الأصلية من تايوان انا تأكدت ^_^

هذي صورته من موقعهم على النت (صغيرة وايد) :

و هالصورة من تصويري :

انا استعمل قبله غسول HYSEAC GEL NETTOYANT DOUX وايد يناسب بشرتي لأنها دهنية و سعره 77 درهم في كل الصيدليات :

سعر الدوا رخيييص بالمقارنة مع النتايج الرهيبة و السريعة !!

السعر 50 درهم فقط لا غير و يكفيج لمدة اسبوع او اكثر شوي لأنه بخاخ ^.^

ما لاحظت اسم المحل بس اعتقد نفس اسم الشركة NIBO COSMETICS

رقم المحل في السوق الصيني IBH 01 , 02 و مكانه داخل في الخشه مب واضح من برع بس قبله بتشوفون محل ألعاب و ادخلوا في نفس السكه

اللي تعاني من الحبوب تجربه و بتدعيلي ان شاء الله ^_^

ادعولي يا بنات الله يشافي ابويه و يعافيه و يردلنا بالسلامة ..

على فكرة الصينية راعية المحل رشييقة و شبابية شكلها في الثلاثينات و يوم سئلتها قالتلي عمري 60 جان انصعق و قلت فخاطريه وينج يا يدوتي عنها

مادري كيف يحافظون على شبابهم غربلاتهم لول .. يبالنا نجرب باقي منتجاتهم ^^