انا على شفااا حفرة من .الطلاق

بحاول اقول كل الي صار من اول ولاخر الموضوع
انا تعرفت على هالشخص وهو من عرفته الى الان نفس ماهو طيب وفي صادق
بعد فتره عرفت انه اهله من الناس الي يحيرون بعض و كانت بنت عمه محيرينها له
و عرفت ان الامور ماراح تمشي بينا ولو اننا نحب بعض
وافترقنا بس قلبي انحرق عليه وتميت ادعي و ادعي و يا رمضان وتميت ادعي ادعي انه الله يرد لي ياه…و ما عاد بينا تواصل ..
و سبحان الله ربك ماشي صعب عليه استوت مشكلة بين الاهل و فسخو التحيير بسبب ام العروس
و جا قالي اانا استوى لي جي وجي و انا حر الحين ماشي تحيير فقلت له خبر اهلك انك بتتزوجني
وانا اعرف انهم ما يقبلون زواجات برا اولاد العم والعايلة ..
راح عند امه وتمت تبكي قالت له حتى لو كانت زينة انا ماقدر اخليك تتزوج من برا الاهل لازم من الاهل
و ردينا اتفترقنا و رد يروح ويرد بيني و بين امه لين تبهدل وتعب وانا اقول لاا بدون موافقتهم و احيانا اقول لمتى بنتم نتعدب وطال الموضوع لا انا حرة اتزوج ولا انا وياه نفس الناس
و فهالفترة يا ول عمي يلمح برغبته فالارتباط وانا مووووووول اقول مب وقته لانه بعدني متعلقة فالشخص و لا اشوف اي شي يشدني لولد عمي
خبرت الي اعرفه و جن و قالي تري انا بشوف حل
ولا وافقت امه ولا شي تغير . و قلت لازم اخبر اهلي فالموضوع وقلت لامي انه في احد يبا يتقدم بس في مشكلة انه كان خاطب من قبل و الامور متشربكة ووو
و كلمت اهلي و قالو لي مافي مشكلة بس حد من اهله يجي وياه
و جاب عمه كبير و جاب اخوه وجا البيت وتقدم طبعا انا اهلي مو من النوع المعقدين للامور و متفتحين فوافقو حتى لو انه ما حضر ابوه وامه زايد انهم دروو فالمشكلة الي حاصلة عنده
اضافة الى انه مب من نفس الديرة فمسافة بين الدولتين فباقي الاهل اعتبرو انه كلافة على انه الكل يجي
و الله ييسر وتزوجنا على اساس انه كل فتره بيحاول يكلم امه و اخواته لين ما نحصل القبول التام
وفعلا من العام الاول كلم امه كدا مرة وعرفت انه تزوجني و كانت غير موافقة بس ما تتدخل اهم شي عندها يتم متواجد يوميا عندها وتشوفه
و تعرفت على خواته و بدت الامور تسير زينة .. وخواته كانو موافقات بس مالهم راي فالموضوع لانه يعرفون عاداتهم و كيف من الاجداد و الجدات هالتحيير قايم
صرنا نتبادل الهدايا و المكالمات بس على استحياء لانه الامور مب واضحة لباقي الاهل

وانا صراحة ما همني رضوو ولالا لانه كنا عايشين منسجمين وحققنا امنية كنا نققول مستحيلة
ومر سنة تانية واحنا مرتاحين
و ثلانة …وبعدها
استوت المشكلة البنت الي كانو محيرينها (( بنت عمه )) ما تبا تتزوج اي حد
و مسوية اضراب و بدت تسب امها و تقول لها لو بتجيب لي عريس بدبح عمري فالعرس وتهددها لانها كانت هي سبب فسخ الخطوبة او بالاحرى التحيير

و امها من النوع القوي المثير للمشاكل ومع دلك رضخت وجت بيت زوجي و بدت تتبكي وتتاسف وتقول لهم انا غلطت و خربت حيات بنتي و اباكم تردون نفس اول ووووو
و ام زوجي انحطت في موقف حرج معها و جت تقول لزوجي الحين طلق الحرمة (( الي هي انا )) ولا تفضحنا بين الاهل بيضحكون علي و بيقولون راح خدا من برا
للعلم هم قبيلة معروفة و هي تعتبر من شيوخ القبيلة او ابوها من شيوخ القبيلة شي جي

المشكلة انه بنت عمه ما تبا تتزوج اي احد و تقدمو لها اولاد خالتها ورفضت ((على اساس انه تحسب انه زوجي ما تزوج الا الان لانه يترياها وهي ما تدري انه متزوجني ))
المشكلة الاكبر انه اخوانها محيرين اخوات زوجي الي اصغر منه وهم بنتين
و اخوه محير اخت العروس

فاادا قال زوجي لا ما ابا اتزوج بنت عمي امه راح تغضب عليه
و ام العروس نفس ما بينت لكم انسانة مثيرة للمشاكل قد يوصل انتقامها منه الى ان تخلي
اولادها ينفصلون عن اخوات زوجي فراح يطلق 3 اسر بكلمة ((لا)) من ريلي
فكرت فكرت و ما حصلت حل
بتسالوني شو موقفه : متعلق فيني وما يبا يخلييني وفي نفس الوقت يقول لي ادا عشتي معاي بتنظلمين . لانه محد يعرف في زواجنا الا امه و اخواته و اخوانه وكلهم مالهم دور و بالتالي
ما بنقدر نجيب عيال
ما بنقدر نقول للاهل انه متزوج
ما بنقدر نلتقي الا نفس العشاق متخبين
ما بيقدر يبات عندي ولا يوم
والحل اساسا امه تقول له ما يصير طلقها ما تم على دمتك

وادا ما رضيت اتم وياه و تطلقت منه
راح يكون اموره هو اوك
اخواته بيتزوجون
اخوه الاصغر بيتزوج
وامه بتكون راضية
بس انا بكون فالجحيم بفقد زوج ما بحصل شراته
و ما بقدر اتزوج من الاهل لانه مخربة علاقة ويا اعمامي يوم سويت طاف حق الي كان يبا يتقدم

الحين لكل قام يكلم شيوخ و يسالهم هل يجوز انه الام تطلب تطليق زوجة الابن ادا في ضرر ولالا ؟
وما عرف شو الاجابة نص يقول لي ايه و نص يقول لي لا
كلمت العريفي مرة قالي لا يجوز تغصبه على الطلاق
وهي كلمت حد قالها رضا الام قبل كل شي

لانه امه تقول له رضاي في انك طلقها وهي تدري انه انا انسانة زينة و انه هو مرتاح وياي و يحبني
يقولها امي خليها زوجتي و انا بسوي اي شي تبينه بتزوج وحدة و اثنين من الاهل بس خليها تقوله ما يصير تظلم بنت الناس وياك
وانا في دوامة كبيرة
خاصة انه الامهات اتفقو انه عرسه بيكون بعد سنة يعني ما عاد في وقت للتفكير الحلول
اوصل لمرحلة الم اغراضي و اروح من البيت و يرد يهديني و يقولي مب حل ها خلج ممكن ربج يسوي حل
اقوله خبر الوالد و خلصنا من المشاكل يقولي ماقدر لانه اكيد بيوقف في صف بنت اخوه (( الحرمة المستقبلية )) بيقول طلق ها الي مب من الاهل

اقوله خبر العم ( ابو العروس ) وام العروس يقول خواتي بيطلقن وهم توهم ما تزوجن و ما في شباب بعد فالاهل مب محيرين او مب متزوجين عسب نقول بيحصلون فرصة يتزوجن
واالام كل الي تقول طلقها طقلها لا تفضحنا…
لا انا ولا هو محصلين حل و صرنا نضاايق وايد ادا فتحنا الموضوع و ما نتكلم نفس اول
لانه كل نسولف ونستهبل و ووناسه و الان صار عندنا شي كل واحد في خاطره كلام ولا يقدر يقوله
ادا هو تكلم انا ابكي و ادا انا تكلمت هو يضيق
ولا يبا يخليني ولا انا ابا اخليه
ولا نبا نفترق بس عاد بقائنا مع بعض له اضرار و تضحيات
و انفصالنا كارثة اكبر لانه بنعيش منكسرين
حتى هو يقول لامه ادا خليت هالحرمة بعيش مكسور ولا بعيش سعيد . وبيقول لي ادا انفصلنا ما بخليج …

اي وحده عندها حل تكتبه لي ويجزاكم لله الف خير
ملاحظة لا تنسوني فالدعاء دخليكن انا على شفا حفرة من الطلاق و لا اعرف من هني لاخر رمضان شو بيكون وضعي