اليوم غدايه سلطة الجرجير والبصل + صالونة السمج (شعري) + عيش ابيض + عيش السرايا .. اتفضلن حياكن
1- سلطة الجرجير
قطعي البصل الابيض شرائح والفلفل البارد شرائح رشي عليهم زيت
الزيتون والملح وحطيهم في الفرن لمة 10 دقايق
قطعي الجرجير وحطي عليه البصل والفلفل البارد اللي شويتيه في
الفرن وعصري عليه الليمون والملح ……….
2- صالونة السمج (الشعري)
صفطي السمج ونظفيه وقطعيه 3 قطع وقليه وخليه على برد
قطعي الطماطم صغار صغار
قطعي البصل شرايح ودقي الثوم والزنجبيل والفلفل البارد صغار
في قلايه وسيعه حطي الدهن وحطي فيه البصل والثوم والزنجبيل
وبزريه بالبزار والكركم والملح والفلفل الاسود حطي الطماطم
وحركيه وحطي لومي يابس بكباره وحطي قوطي صلصل وربع كوب ماء وحركيه بعدين حطي السمج اللي قليتيه ونثري عليه الكزبرة وخليه لمدة 10 دقايق
3- العيش الابيض
نقعي العيش لمدة 15 دقيقه
فوري العيش مع الملح وعقب شخليه بس بعدين خلطيه مع الزبده وغطيه بالقصدير لين الغراف ….
4- عيش السرايا
قطعي التوست مربعات وحمصيه
شربيه الشيره ورصيه في صينيه
خذي قوطي قشطه وذوبيه في تاوه او جدر صغير وعلى طول صبي عليه كوب حليب مخلوط فيه ملعقتين دقيق الذره (النشا ) وملعقتين سكر
بعد زيدي عليه بس كوب حليب من غبر شي وحركيه وحطي عليه شويه ماي ورد وهال يوم بتشوفينه بدا يغلظ على طول صبيه على السليس وزينيه بالمكسرات
وبالهنااااااااااااااااااااااااا من صنع اديه وحيات عنيه