قصة حملي وولادتي الأولى

في الشهر الرابع من حملي وانا رادة من الدوام احس بويع في بطني
شرات ويع الدورة
جان اروح عند الدكتورة قالت لي الجنين نازل والويع اللي فيج ويع الدورة
عطتني حبوب تثبيت وعطتني اجازة لمدة اسبوع
وقالت لازم مماتتحركين من الفراش الا للضرورة
وحالولي انج ترفعين اريولج اشوي
وبعد اسبوع رحت اجيك قالت الحمدلله انه ارتفع
وعرفت جنس البيبي انها بنوته

وخلال حمل تمت طبعاً اجهز لنونوتي الأولى
ودخلت التاسع وكان ايام رمضان
في يوم بعد التروايح ماحسيت بحركتها مول
قلت بتريا عليها لين السحور
وماحسيت طول
ريلي اصر علي اني اروح الطواري في القاسمي
يوم رحت حطولي جهاز التخطيط لنبض الياهل
وقالت نبضها زين
بس انتي لازم ماتصومين هالشي اللي مأثر على الياهل
ولازم تشربين سوائل وااااايد
المهم اني ماسمعت كلامها قلت بصوم
مافي اقضي عقب
وعقب قررت اني اربي في القاسمي
سمعت كلام اهل قالوا لي قريب من البيت وجي
القاسمي عطوني اخر موعد الولادة 9/9 واذا ماربيت ارقد عندهم بتاريخ 11/9 وبيعطوني طلق
وتاريخ 29/8 خذت اجازة من الدوام
عشان امشي اكثر
واكون بين اهلي اذا ياني الويع
وخاصة اني بروحي اسوق فقلت خلاص مابسوق مابقى شي على ولادتي
وكل يوم كنت امشي وكل يوم اروح بيت ابووووي من بعد صلاة التراويح
في يوم بتاريخ 4/9 قلت في خاطري مابروح عندهم قلت بتم عند ريلي
سبحان الله ماادري ليش يمكن الله مب رايد اجوف الموقف
المهم اتصلت في بيتهم ورد علي ولد اختي عمره 8 سنوات ابا اقولهم اني مابي
ولا فجأة يقولي ابوي شلوه بسيارة اسعاف
على طول رحت المستشفى
اول مرة اجوف ابوي جي وفي نفس اليوم العصر كلمته وهو اللي كان متصل فيني
الدكاترة قالوا استوى له نزيف مخ ولازم عملية
جفته بعيني وهم يدخلونه غرفة العمليات
مااستحملت الدموع عيني ولا احس انه بيغمى علي
واخوي يمسكني
مدة العملية ساعة
طلعوه من العملية وحطوه في العناية المركزة
قلت حق اختي شو استوى
قالت كان هو راد من صلاة التروايح ويلس في الصالة واتعشى لانه وحنا عندنا الفطور خفيف وعقب التروايح نتعشى وهو طرش اختي قالها روحي اشتري قنفات يديده حق الصالة لأنه العيد قرب
يعني ماكان فيه شي
كان يبا ينش بس مارام يوقف على ريله واخواني عنده مسكوه
ولسانه استوى ثقيل
وامي تعطية ماي واتقوله بنوديك مستشفى يقول لا مابسير المستشفى مابسون شي
شكله كان حاس وامي اتقوله اتشهد ويتشهد وكان اخر كلام ينطقه مع انه لسانه ثقيل
وايون مال اسعاف ويشيلونه
وبنفس اليوم العصر اتصل فيني يسأل عني
وتم في العناية القلب ينبض بس
ولاكن مب حاس بأي شي يتنفس ويتغذى كله من الاجهزة
وظغطه كان نازل
اميه قالت لي انه قبل ما يصير له جي قبلها بكم يوم
قال لها انه مابجوف بنتي
وكل يوم انا اروح له مع انه منعوني اني اروح لاني حامل وخطر على الياهل
بس مااقدر ابووووي كل دنيتي اهم من كل شي
تم 5 ايام واتوفى في رمضان وفي عشر الأواخر وليلة الجمعة
محد كان يبا يخبرني
المهم هو توفى الساعة 7 الصبح وجفت ريلي عيونه حمره قلت له شوفي
ماقالي بس فهمت على طول رحت عند امي
مب مستوعبة ابوي يروح عنا فجأة وهو كان مايشتكي من شي
ابوي الله يرحمه
كان هو الوحيد اللي يدلعني ومايرضى حد يقولي شي
تاريخ 9 و 10 و 11 انا في العزا ماطلعت
وكل وحده من الحريم كانت اتقول لي شي
انا اتشتت

وانا حطيت في بالي انه بس الحريم بيون 3 ايام طلع لا انهم ايووون ماادام امي في العدة
المهم
اانا بربي وانا بجر وامي مب وياي
واختي ماتعرف شي لانها مب معرسه
تاريخ 12 رحت ونوموني
قالت ليش مايتي قبل انتي المفروض مايخبرونج عن ابوج
كيف بتربين ونفسيتج تعبانه
جيكت على وقالت مفتوح عند 2 سم
عطوني طلق صناعي (تحميلة) اتويع ومحد عندي لا اميه بس اختي وبروحها ميته من الزيغة
وادري البنوته اللي بتي ابوي ما بجوفها
كنت في هالوقت مب هامني الياهل بس اني افتك من الويع ولا كنت ابغي اجوفها
كنت حزينه على فراااق اغلى ناسي
وعطوني باليوم الثاني طلق ثاني بالمغذي
وانا اتويع من العوار والتخطيط على بطني تعبت خلاص مب رايمه
الحمدلله كنت مااصرخ كل ماحس بالويع استغفر الله
وكل ما يجيكون يقولون بعده إلا 3 سانتي ولا 3 ونص اقول كل هالويع وبعدني
ويعطوني مهدي تميت 3 ايام وانا اتويع عندهم ونزل علي الماي قالوا الحين لج بس 24 ساعة
بصراحة انا وحده من اللي امدح مستشفى القاسمي
بصراحة النيرسات وقفو معااااي ماااتتخيلون كيف
تاريخ 15 الصبح يت الدكتورة وقالت خلاص الحين مفتوح 9 سانتي وهني ودوني غرفة الولادة
هني تميت اقرى سورة مريم لاني حفظته واقرى بصدري
وكنت اسمع اصوات الحريم كيف يصرخن وعقب اسمع صوت البيبي
انا قلت في خاطري مستحيل اصرخ
وعلموني النيرست كيف اسوي بوش
من مااتيني الويعه لازم اسوي
والله سهل ولادتي
وبدون صريخ
على طول حطوها على صدري
وعقب الخياطة دخلت اختي وعلى طول اتصلت في اميه اخبرها اني بخير
وتميت عقبها 3 ايام في المستشفى لانه النونو طلع فيها بوصفار
وعقب الحمدلله طلعنا
على طول عند اميه
ابصراحة الحمدلله على النعمة
بس انا ماكنت مستانسه انه عندي نونو
او اني استويت ام طووووول ولا شي
لين الحين مااتخيل انه ابوي راح
وماجاف بنتي
واميه ماوقفت وياي ايام الولادة
حسيت اني وحيده بها العالم
انا فقدت ابوي
وريلي صار ابووو
الله يرحمك يابووووي ويغمد روحك جنة الفردوس يارب….

والسموحة