مساء الخير أو صباحه بما إنه شوي وبندخل ع الساعه 12
طبعا أغلبكم تذكرون مشكلة العذراء والشعر الأبيض 1
https://forum.uaewomen.net/showthread.php?t=814261
بالبداية أحب أشكر كل أخت حقيقية قدمت نصايح من القلب واشكر من قلبي الخوات
اللي راسلوني ع الخاص ورسايلهم خففت عني بشكل كبير وانا في سياق هالجزء من المشكلة بذكر كيفية استفادتي من النصايح بالتدريج وخصوصا في اجتماعي بالشخص المعني لأول مرة من بعد ما عرفت او من بعد المشكلة
أنا خذت فترة رست تجنبته فيها في حدود المعقول وحاولت قد ما اقدر ما ابينله انه في اي شي
وتحججت بمرضي والحادث . مع انه نفسيتي كان الله وحده يعلم ابها وكانت الدنيا صدق سودا سودا سودا فهالفترة حاولت اكثر من الاستغفار وقمت اقرا شوي قرآن قبل لا ارقد متبعه نصايح بعض الخوات والحمد الله قدرت اتوازن بشكل معقول .
إلى أن يا يوم الخميس الماضي وكانت عندنا فعالية مشتركة وانا الصبح بس عرفت انه بيكون موجود ، طبعا أنا انصدمت وتوترت وحسيت الدنيا انجلبت على راسي في البداية ، بس عقبها قلت اعقلي يا بنت هذا شغل وبس وتميت اردد هالشي بيني وبين نفسي الين ما هديت ، من عقبها دقيتله ورتبت وياه الامور بكل تفاصيلها وانتهى الموضوع .
من بعدها ع الساعه اربع العصر أنا كان عندي تصوير لصالح قناة معينه وهم يو يصورون في مكان دراستي فقدرت انسى الموضوع شويه والتهي ، طبعا خـلال فترة التصوير كان فوني بعيد عني ومن خلصت جيكت ع التلفون فلقيت اتصالين منه استغربت شويه ودقيتله فقالي انه واصل جريب امارتنا
بس يباني اوصفله المكان بالضبط ووصفتله فقال اوكيه بس يوم بيجرب بيدقلي عسب ادليه اكثر
انا هالحزة سبحان الله ياني هدوء غريب وقلتله اوكيه وما فكرت وايد بالموضوع مع اني قلت فخاطري هو يعرف وايد ناس فإمارتنا واكيد يدلون احسن عني وعقبها رحت وكان عندي كلاس بس فهمت السير اني بستأذن لنه عندي فعالية معينه ع الساعه ست المسا ، المهم هو اتصلبي يوم وصل الامارة بس كان مضيع فتميت ادليه وجذه بس ما فهم ع الوصف فستأذنت من الاستاذ
وقلتله انته تم مكانك وانا بييك لهذا المكان وبنسير المكان ، وبعد كانت اعصابي هادية جدا تميت وياه ع الخط وكان وايد مضيع وواصل مكان غلط بس قدر ع وصفي شوي شوي يدل فهالفترة هو كان يتكلم عن وايد اشيا وانا حاولت انسى اني اكن لها الشخص اي نوع من المشاعر وتصرفت من باب انه استاذي واحترمه ولازم اساعده ، المهم وصل المكان وتميت وياه ع الخط كان متوتر من التأخر فهديته وقلتله اتصل وفهمهم لنه انا بعد نشبت في الزحمه وهيك الين ما نزل وسار يصلي فهالفترة وصلت انا بس جد جد كنت متوترة حزتها ومابا اشوفه فيس تو فيس ، سرت انا صليت بعد وكان في زميل بيني وبينه شغل تميت وياه الين ما خلص الشخص هذا ، المهم استوا شي وايد قاهر وانلغت الفعالية بكل اسف انا والزميل عرفنا وهو كان عارف قبل اقصد الشخص فدقيتله وقالي انا بعدني فالمكان بس عندي شغله مع ناس وتعالي عندي المهم قلتله اوكيه ، لكن ما بغيت اشوفه وانا بعدني متوترة فتميت ويا الزميل ويلست اساعده فشغله وعقب هو تم وياي ووصلني الين ما موجود هاك الشخص ، المهم في خاطري كنت اقول يا رب كل شي يعدي ع خير شفته من بعيد بس قبلها سلمت على بنات هوو شافني واشرلي يعني تعالي ، في جزء شرير مني استانس لنه شافني ويا هالزميل ومن عقبها بعد يا شخص وسلم علي وتم يرمس فتأخرت الين ما سرتله حسيت من هالشي ممكن توصله فكرة انه مب محور حياتي ههههههههه مادري شو يخصه ، المهم سرتله وتكلمنا مع شخصية معينه عن شغلنا وهيك
وتم يسولف وعقبها سارت هالشخصية وتمينا بروحنا طبعا انا هاللحظة كنت وايد خايفة منها لكن سبحان الله ياااااني هدووووووووووء عجييييييييب وكلمته عادي و تناقشنا في وايد اشيا ونحن ناخذ لفة في المكان ، وانا طبعا نص كـلامه اسمعه واقول في خاطري يا بنت هذا استاذج وبس ن من بين الكـلام
في شي قاله ما ادري اذا زلت لسان او تلميح لشي معين بما معناه انه ناس في مكان الشغل ما كانو مرتاحين لشغلي وياهم بحكم صغر سني بس هو اصر وراهنهم على نجاحي وقالي انتي تعطيني اكثر بكثير من اللي كنت متوقعنه ، بس انا خذت هالكـلام ع اساس مديح الشغل وبس مثل ما نصحوني بعض الخوات .
سألني كذا مرة عن الوالد وطبعا قلتله الوالد بخير وهيك بس مشغول اليوم وما كان بيقدر يي ، وقالي انه انتي عندج اسلوب اجتماعي حلو في التعامل مع الناس بس بعد خذتها من باب المجاملة اللطيفة . وهيك لحتى استأذن وقال انه بيروح وانا قلت فخاطري اخيرا بقدر اتنفس لني كنت على اعصابي وخايفة يصدر من تصرف او كلمة غلط . لكن وايد حسيت بالذنب لني كنت مستانسة من هاليوم بمجرد انه كان موجود في عالمي لفترة هاك اليوم ، لذلك فأنا ما اعرف كيف اتخلص من هالاحاسيس بشكل كامل
ومحتاجه آخذ رد فعل اقوى بس ما اعرف شو هو أو كيف فمحتاجه وقفتكن ويايه خواتي
أخيرا
عندي تعقيب صغير على الخوات اللي تكلموا عن انه انا ما صدقت انه اهتم فيني فتعلقت فيه
والخوات اللي تكلموا عن الاختـلاط بطريقة أساءت لشخصي من غير الإلمام بجوانب المشكلة بشكل عام ولاحظت كذلك من ردود بعض الخوات سامحهن الله = ) انهن قرن اول سطرين وآخر سطرين من المشكلة وانطلقو يحرمون ويحذرون من خراب البيوت وحطي نفسج مكان حرمته والخ امممم ارد عليهم بردود من هاك الموضوع وهي :
أنا ما قلت اني لازلت اباه بعد ما عرفت انه متزوج وها الشي بس اكتشفته امس
أنا كرهت نفسي لنه حطيت فبالي شخص متزوج وحطيت نفسي مكان مرته وفاهمة لكل العواقب
ومستحييييل افكر اخرب بيوت والخ الخ ، ولو انا ابا اسرقه من مرته جان ما فرقت معاي يوم عرفت انه معرس
واللي يقولون مب كل شخص يهتم فينا نحبه ، أنا ذكرت انه طبيعة شغلي مع الجنسين ولو عالاهتمام
والمداراة جان حبيت كل اللي اشتغلت وياهم هههههههه عفوا عزيزاتي أنا مب سطحية لها الدرجة
الموضوع مب اهتمام فقط هو اللي ولد مشاعري تجاهه في اشياء وايد ، ممكن انا تسرعت فالحكم على بعض الامور لكن الاكيد الاكيد انه مب كل شخص يعطيني اهتمام بسير بحبه لنه عالمي واسع وفيه اشياء كثيره لكن قد يكون حظي التعيس هو اللي اوقعني فمثل ها المأزق . . .
ملحوظة أخيرة بخصوص اممممم الاختـلاط ها موضوع متشعب وكلن ينظرله حسب بيئته اللي عاش فيها ، فما نقدر نعمم هالشي علينا وعلى الآخرين حولنا ،و الحشمة الادب الالتزام مطلوبين اكيد
الالتزام والتقرب من الرب مقياسه عند الرب وحده والعباد غافلين عن كثير من الامور اللي قد تكون موجوده بين الانسان وربه وأنا ولا شي سويته من ورا علم أهلي والحمد الله والديني راضين عني والوالد وايد فخور فيني ويحرص لو سمحله وقته انه يتواجد وياي ويناقش الناس ويسمعلهم ويدعمني فـلآ تتطرقون لها الجانب من حياتي بارك الله فيكن لنه خاص بعلاقتي انا بربي أول شي وها محد له خص فيه وثانيا بعلاقتي ويا اهلي وبعد ها جانب خاص بأهلي وهم الوحيدين اللي لهم حق يحاسبوني .
وبس أنتظر آرائكن وملحوظاتكن لتطوير مراحل شفائي بشكل اكبر لنه تيني لحظات ترد فيها انفسية السودا ومشاعري تجاهه احس انها ما تتغير = (
استغفر الله الذي لا اله الآ هو الحي القيوم وتوب إليه
ربي يعينج حبوبه
وادعي ان الله يشغل قلبك بغيره ويرزقك الزوج الصالح
ما يكون للمراه حياء
حالها من حال الرجل
ووايد اشياء للاسف
اللهم أزرق صاحبه الموضوع كل خير يارب لما تحبه و ترضاااه
^^