زميلتي عمرها 28 تقدملها واحد تشوف فيه كل مواصفات الزوج الصالح وموافقة عليه لكن خايفة يرفضونه اهلها لانه متزوج وعنده عيال وخايفة هي مايقبلونها اهل الريال لان حرمته الاولى بنت عمه
بتقولون خلها تصبر وليش تاخد متزوج
اكيد هي كبيرة فالعمر وليش بتسرق زوج وحدة وبتهدم بيت حد حساب سعادتها انا بروحي نصحتها وقلتلها هالكلام و ردت علي " الشرع محلل 4 و الزوجة الثانية ربنا كتب لها اتكون الثانية والزواج قسمة ونصيب "
مصره وتقول ماتراجع عن قراري لاني مابسوي شي حرام ولا بحاول اضر حد باجر نتزوج مابمنعه يعطيها حقوقها وانا لي حقوقي لان الزوجة زوجة لوكانت الثانية او ثالثة او رابعه لها نفس الحقوق رب العالمين ماظلمها والريال بياخذني على سنة الله ورسوله
انا عن نفسي ماقدر اخليها بروحها هالفترة ماشوفها تسوي شي غلط ف قلتلها ساليه ليش قال بياخذج دام هو مرتاح مع زوجته ردت علي كان رده الحمدلله انا عندي خير لاتخافين مابقصر معاكم احبج واحبها
واليوم تقولي صار له يومين يرمس عن زوجته وعياله ونا قمت اغار ماعرف امنعه يتكلم عنهم اخاف يتضايق وبروحي تعبت من تفكير كيف بنعيش اكيد بتغير نظرة المجتمع لي وكاني مجرمة سارقة الريال من زوجته
الكل بيكرهني ماعرفت شو ارد عليها
كل انسانة تقبل على خطوة جديدة تكون محتارة مثلها بتساولات ونا تمنيت لها ولكل زميلاتي كل خير لكن هاي عزيزة وغالية علي الحين ترمسني وتقولي ماتخيل نفسي الثانية اتمنى من كل اللي يقرون الموضوع يدعونلها و اختي الزوجة الثانية اتمنى تردين على هالاسئلة ماعليج امر "
كيف قبلتي اتكونين الثانية وليش ؟!
كيف بديتي حياتك الزوجية وانتي بعلم بوجود انسانة ثانية تشاركج زوجك ؟!
هل هو تزوجك سر او عادي خبر اهله وحطهم جدام امر الواقع ؟!
هل اشترطي عليه بشي ؟!
شو اصعب شي واجهتي بعد الزواج؟
قبلولج اهل زوجج ؟
ندمانة او مرتاحة فحياتج معه؟
شوتنصحين زميلتي ؟
اتريا الردود الله يسعدكم
نصيحه لا تتسرع وتأخذ ريال عنده حرمه وعيال بأجر بتآكل قلبها الغيرة وبتستوي مشاكل هيه في غنى عنها ،،، أساليها سؤال بأجر لو هاللريال قاللها بتزوج عليج بترضى؟ اكيد لا والشي اللي ما ترضاه على نفسها لا ترضاه على غيرها وأكيد حرمته مافيها شي دام انه بعده وياها وعنده عيال ،،والرياييل ما يترس عينهم إلا التراب ،،،
خلها تفكر عدل ولا تتسرع ودوم تحط نفسها مكان حرمته شو بتسوي ؟!
و لها الحق في الاختيار ما نقدر نلومها
بس تحط لها شروط واضحة و صريحة :
1- الزواج يكون علني بعلم زوجته الاولى و اهلــه
2- سكن مستقل وخـــــــــــاص
3- العدل في المبيت و الانفاق
واذا مثل ما قال عنده خير وما بيقصر فيهن ف
شو المانع؟ الشرع حلل له 4، لكن زواجها منه
لازم الكل يعرف عنه و يعدل بينها وبين الأولى
واكيد الغيره بتكون موجوده ف الافضل انها تصارحه
وتقوله يوم ييلس وياها ما ييب طاري حرمته الاولى
ويوم ييلس ويا الاولى ما ييب طاريها وبيرتاحون
من المشاكل . .
الا في حاله وحده يعني الزوجه الاولى مقصره او عندها مشكله صحيه
او الزوجه الثانيه مثلا تكون محتاجه وزوج بيستر عليها
ولكن الاسلام قال لن تعدلوا
بس العلماء يحاولون يفسرون حسب الظروف والحاجه
وانا بصراحه مااعرف
لاني ماحط نفسي في موضوع محاسبه
بس هي تقول تغار وماتبيه من الاول يتكلم عن زوجته وولاده والواضح ان يحب زوجته وولاده وهي بس تكمله للصوره
عشان جي يقول لها مابقصر عليكي وعليهم
وعموما اذا هي ماتباه بياخذ غيرها عنده عادي
يعني مب محبه فيها اكيد
بس هو مزاجه يريد يتزوج وحده ثانيه
وهي بتعيش يمكن سعيده بس في حرمه ثانيه ساعدتنه يعني
يعني مب هي 100%
وهو اصلا باني حياته معها يعني اي كلمه منها ضدها بترجع لها
وهي بتحاول بكل طرق تدلعه وتاخذه من حرمته اكيد
ولكن هني بعد حرمانيه
يعني هي عليها مسؤوليه العدل مثله يعني
تدوس على قلبها
والعلم عند الله هذي حرمه
ماتتحمل
الا اذا شايفه مامنها امل وتريد تنستر وبتسكت عن اشياء وايده وتساير الامور
!
وانتي اختي ليش معوره راسك
هي تعرف راحتها والزواج مسؤوليه نفسيه وعقليه وجسديه واجتماعيه
هي تعرف نفسها اذا بتتحمل
اذا قلتي لها لا
بتحملك بعدين المسؤوليه
واذا قلت لها نعم
بعد بتقول ياريتك وقفتيني عند حدي
وكله نصيب
وهي الواضح بعد انها مقتنعه به
يعني عاجبنها وتعرف انه يحب زوجته واولاده وهي بس جي بس
هو يريد ثانيه بس مايفرط بالاولى
بس في شي
لازم يكون الزواج معلن
عشان لا سمح الله صارت مشاكل
وهي بنت عمه هو مابيزعل اهله وام العيال
بيدوس على نفسه وهو اصلا متقبلهم
وربيعتك يمكن تطلق وجي
اعرف قصه وحده كان عمرها يمكن 34 اتزوجها شاب عمره 28 وكان عنده حرمه عمرها 18 ومخلفه ولد يديد
اتزوجها على مبدا انه يريد يستر عليها لان يعرف اخوها واخوها شكى له الحال ان اخته عمرها كبير وتريد الستر
فهو تطوع انه يتزوجها على مبدا ان الرسول ص تزوج سيدتنا خديجه رضي الله عنها وهي كبيره
ولكن تم الزواج بالسر
يوم علمت الزوجه الاولى
طبعا هي شايفه عمرها شباب ومتزوج عليها حرمه كبيره يعني
راحت زعلت في بيت اهلها واهلها طلبوا الطلاق ومؤخر
الحبيب يريدها او بالاصح ماعنده فلوس يدفع المؤخر وهو بعد يدرس طب اسنان
حاول بكل الطرق ان يرجعها
مافي فايده وزوجه الثانيه حملت وخلفت ولد (واغلب الحريم يريدن يتزوجن عشان الانجاب ويقبلن يكونن ثانيات في حياة الزوج عشان العيال وتحس نفسها حرمه بس بعد اخرها مشاكل )
فطلق الاولى وقعد عند الثانيه
طبعا الثانيه مبسوطه وكسبانه
بس الله يعلم الحين شو صار
يمكن ربيعتك يصير شي او مثل مايقولون الحبكه في القصه ويصير الريل من نصيبها 
بس والله شي يتعب القلب
اقول ان ربيعتك مب كبيره واحسن تستنى نصيبها
لانه الي بيقدم على هالخطوة بدون علم اهله اسمحيلي ماعنده القدره على تحمل المسئوليه الي يبا بشرع الله يقنع زوجته ويكون واضح من البدايه
مب شهر شهرين من تعرف زوجته توقع الكارثة ويرد يطلق الثانيه لا سمح الله عشان لاينخرب بيت الاولى
اغلب الرجال للاسف هالايام يسووون هالحركة يتزوج بالسر عسب ما يجرح مشاعر زوجته الاولى ويبعد عن المشاكل تحت مسمى شرع الله ومن تعرف زوجته
وتخيره بينها وبين الثانيه يكون للاسف اخد الي يباه من الثانيه وبسهوله يستغني مقابل عدم خراب بيته الاول
لذا اختي لو عنده القدره من البدايه انه يكون واضح قدام الكل تتوكل لان الامور واضحه وما سوى غلط
لكن اذا بالسر فاسمحلي بتكون مغامرة لربيعتك لان زوجته الاولى ما عنده خبر و الله واعلم شو النتيجه من تدري بالامر
انا مب بس اعتبرها زميلة لي واول ماعرفت وايد نصحتها وهي بعد رفضته لكنه مصر ياخذها وموافق على شروطها بيت و نفقة.
وهي قالت له بتاخد بعدي الثالثة والرابعه قالها مب مخطط. لو ابي اخذ 4 ماشاءالله شكثر البنات ونا كل هالسنين مافكرت لكن انتي شفتج وعرفتج وابا زوجة وام لعيالي شرعا ومابخبي على حد زواجنا. انا بعد اعرف ناس تزوجو عن حب ثانية وثالثة ورجعو للاولى او نسو عيالهم واكانو لاهين مع زوجات صغيرات يجددون شبابهم لكن ابي وحدة وافقت اتكون الثانية اتخبرها عن تجربتها لكن كلام الناس. وايد ومافي وحدة يدامها بتقوله عن تجربتها على الاقل هني بتاخذ راحتها بالكتابة. وتنصحها وتريح بالها.