سؤال: تغييرات في القطاع الصحي

انا عندي قائمة طويلة عريضة لووول

1- بالنسبة للمواعيد، في فوضى كبيرة .. يحطون الف شخص في نفس الموعد .. والكل يتريا لساعات لين دوره يوصل..

2- بالنسبة لمستشفى العين، حتى لو كان بس للوافدين.. ليش مش مطور؟؟ ومش مسويله صيانة؟؟

3- ليش ما تتم المعاملات الكترونيا؟؟

4- توطين او تعريب الموظفين

هذا اللي في بالي الحين .. ومشكورين على جهودكم

المواعيد مب مرتبه
اتمنى يعدلون هالنظام

و بصراحه بعض الممرضات والعاملين ما عندهم اي احترام للمريض ابدا
يعني تقولج بلهجه خايسه سيري اهنه ولا هناك وما تكلف عمرها تبتسم حتى
اما يوم اهلي كانوا سايرين تايلند
تقول حتى الماي تركض النيرس عشان تيبلهم اياه
حتى الواحد لو فيه عوق يخف عنه من المعامله

حقيقة مهنة التمريض مهنة انسانية و مهنة رحمة …

و من المفترض احنا العرب بشكل عام نعرف بالاحساس و التعاطف و الحنان مع إنه كلها معاني دينية متأصلة بديننا إنما لازم يُدرس الطلبة في قطاع الصحة بشكل عام كيف يتعاملوا مع المرضى و نفسياتهم قبل كل شي مثل ما بيُدرس طالب الفندقة الاتيكيت والتعامل مع كل أصناف البشر … فكيف بالمرضى و ذويهم ؟..

أظن هاي من النقاط المهمة

و تسلمي الغالية عالطرح

مشكورات عالمرور لكني ما اوعدكن بشي لأني كنت بس حابة اعرف المشاكل الي يعاني منها الناس مع المستشفيات وانشاءالله نقدر نساعد في تطوير اي مشكلة حتى لو كانت بسيطة….
الصراحة احنا حابين نغير و لو شي بسيط في نظام المستشفيات عندنا و يكون كمشروع تخرج بالنسبة لنا….
دعواتكم لنا و انشاء الله اذا لقينا لو دعم بسيط من الكلية والمسؤلين راح نبذل جهدنا….
في الاول والاخر حنا بنات البلاد و كل الي يهمنا مصلحة بلادنا و شعبها…

و الله اختي المعانات اللي الاحضها هي اللغة العربية المنعدمة خصوصا اني وافدة اعرف الفرنسية و بعض الانجليزي و اضطر اتكلم مثل المعوقة و لولا ان زوجي طبيب يسمحو لو بالدخول معي ما راح اتعالج خالص و لا راح يعرفوا مرضي و هدا مشكل بالنسبة لبلد عربي

يعني احب اشوف كوادر عربية ترد عليك السلام و تسمي الله و هدا نفسيا نصف الشفاء

و استسمح

وعليكم السلام والرحمه

مساء الخير

موضوع شيق عزيزتي..والله يوفقج في البحث..هو اكيد في نقاط كثيره لكن الافضل في البحث تركزون علة اشياء معينه عشات ما تتفرعون في البحث وفي ايجاد الحلول.

المستشفيات حاليا كل من فيها يواجه صعوبه سواء الموظفين او المراجعين، وطبعا اهم شئ المراجعين -مع انه الموظفين لهم حقوق بعد ويا ربت لو وزارة الصحة تراعيها-

– بالنسبه للمراجعين مثل ما ذكروا الاخوات مافي نظام للمواعيد، لو مشو على المواعيد تلقين اوقات في نقص في الاطباء مما يسبب الازدحام الشديد على طبيب معين، وطبعا الطبيب – عاد في اشكال وانواع- كائن بشري اي وقت يتضايق من كل ها الازدحام ولا يكون في اسلوب راقي بينه وبين المريض.
– وفي بعض اذا مب اغلب المستشفيات في اطباء وجودهم مثل عدمه، يعني زياده في العدد..عشان جذيه اللي اعرفه انه حاليا وزارة الصحة تعمل احصاء بكافة الاطباء لمعرفة الاحتياجات والاستغناء عن كافة الكوادر الطبية الغير مفيده للقطاع الطبي.
وفي امور ثانيه بس مب في بالي اللحين..

تحياتي لج…وبالتوفيق