حبيت انقل لكم قصة ولادتي وأنا من تجمع كروشات شهر 10 و 1 1 و 12 … الله يسلمكم كانوا معطيني تاريخ الولادة 5 – 11 – 2024
وأنا بجر وكنت اراجع بمستشفى توام بالعين لأني ساكنة مع ريلي بالعين ومستشفى الكورنيش ببوظبي لأني حاطة ببالي اربي عند اهلي .. واثنينهم معطيني نفس الموعد
الحمدلله كل مراجعتي طوال فترة الحمل بخير وما فية شي .. من دخلت التاسع وانا بعدني ما خذت اجازة من دوامي المرهق اللي يخلص العصر .. اوصل البيت تعبانة وما يمديلي اتمدد ولازم امشي
بس بيني وبينكم كل 3 ايام امشي يوم واحد واطنش 4 ايام وامشي يومين وجية 
الاسبوع الثاني من التاسع بدى الارهاق وبطني شوي نزل .. يوم الاحد كان عندي مراجعة بتوام
وطبعا الدكتورة محد وشافتني ربيعتها دكتورة ثانية !!! ترخصت من الدوام الظهر وسرت توام
حصلوا ضغطي شوي مرتفع .. تخيلوا السيستر تسألني تقولي بعيدلج الفحص وحصلته مرة ثانية مرتفع
جان تقولي عادي يعني ضغطج جية ..! قلتلها ما ادري اذا هذا يعني مرتفع وايد ولا شوي بس انا بالعادة ما عندي ضغط بالمرة .. وعقب دشيت عالدكتورة شافتني 5 دقايق ههههه استغربت منها سألتني 3 او 4 اسئلة .. خذت عينة من تحت و ما علقت على الضغط وقالت نشوفج يا ليالي بعد اسبوعين ؟!
طبعا انا هذا اول حمل لي ما اعرف س و ج قلت اهيه دكتورة وعندها خبرة وابخص .. مع اني اسمع انا الحامل من ادش التاسع مراجعاتها اسبوعيا تصير … المهم ترخصت وطلعت
عقب يومين بالضبط وبالتحديد الثلاثاء خذت اجازة من الدوام بحكم عندي مراجعة بمستشفى الكورنيش ببوظبي بفرعه الثاني (صحة المرأة) قلت اول مرة اروحلهم بس مب خسرانه هالفرع اليديد خلنا نشوفة ولأنه عدال بيت أهلي … استشاريتي واني شافتني بعد التحاليل الروتينة واستغربت قالتلي ضغطج شوي مرتفع (مع انهم عادولي فحص الضغط 3 مرات وكانوا يعطوني كم دقيقة اريح وما اتكلم عشان يتأكدون من القراية) قالتلي واني باجر سيري الكورنيش الرئيسي وسوي هالفحوصات ضغط ويورين وتقلصات الرحم .
ملاحظة : الارهاق بالثلاثاء كان كبير وواضح علي لأني كنت اسوق بروحي من العين لبوظبي ويا خدامتي .
الاربعاء الله يسلمكم سويت الفحوصات المطلوبة وهالمرة فحص اليورين لقوا فية البروتين نسبته 2+
والضغط بعده مرتفع طول هالايام .. قالولي نسبة البروتين خطرة وبنرقدج يومين او 3 ايام ماكسيمام للجمعة اذا تميتي على نفس الحال بنعطيج طلق صناعي وبتكونين دخلتي الاسبوع ال 38
(اللي ما يعرف ارتفاع البروتين في البول وانتو بكرامة يسوي تشنج أو تسمم للحامل والجنين ويأثر بكليتين الطفل ويعتبر خطر)
ما طاعت تطلعني الاخصائية ورقدوني من الاربعاء لحد الجمعة وكانوا كل 4 ساعات يعيدون الفحوصات
يوم الخميس نزل البروتين ل 1+ بس الجمعة رد ارتفع 2+
هنيه قالوا لازم طلق صناعي توكلت على الله وعطوني الطلق الساعة 7 تقريبا وبدا معاي مفعولة الساعة 10 بالليل وكان جداااا متعب والرحم فاتح 1 ونص !!!! انا هنيه مت كل هالعوار 1 ونص
الساعة 12 ونص حولوي عنبر الولادة والطلق بعده ما خف والرحم فتح معاي 4 سانتي
والحمدلله كنت بين الوعي واللاوعي من الالام والاكسجين اللي اخذة .. والحمدلله ما صارخت تميت بس أون لووووول سبحان الله ويع الولد يروح وايي بسرعة وراء بعض
الحمدلله يبت سعودي الساعة 6 ونص صبيحة السبت 23 – 10 – 2024 وما حسيت طبعا بشي من التعب .. مع ان القابلات كانن يشاورني اخذ ابرة الظهر والحمدلله ما خذتها … ويت هندية عقب وسوتلي خياطة وانا بعدني مب حاسة بشي يحليلي هههههههه…. بس اذكر ناس ادش وناس تطلع (الممرضات والقابلات) جنة غرفة تدريب مب ولادة صدقية 
وهاي قصة ولادتي والحمدلله انا وسعودي بصحة وعافية … والله يرزق الجميع الولادة الطبيعية
ويرزق كل محرومة يا رب .. واللي ما بترد ياليت بس ترفعلي الموضوع بدعوة حلوة لولدي لا هنتوا
الف مبروك
و عقبالنا
وبالبركه مااياج ..يتربى في عزكم ان شاء الله
هذي قصص الولادة اللي تشجع الوحده
ما شاءالله عليج،، يتربى في عزكم يارب