ما علاقة الابناء وسفر الوالدين؟؟؟؟ .""""

هلا والله بخواتي وحبيبات قلبي…
انا اليوم حابه اطرح موضوع "نقاشي"
يعني بصراحه فيه امهات يسافرن للسياحه لكن ما ياخذن عيالهن عندهن.. بس هي وزوجهااا,, يمكن لانه ما عندهم السيوله انهم يشلون عيالهم ,,, لكن انا اشوفها صعبه,, على الاقل بشل العيال الكبار وبخلي الصغار اللي ما يتحملون السفر…
صح ان هلهم ما بيقصرون وياهم بس حرام حليلهم مش من حقهم..
بصراحه نحن من ايام سافرنا وشليت عيالي لان كنا انا وريلي من زمان مقررين ان نسافر ونشل العيال وكنا مرتبين امورنااا .. وبالعكس واايد استنسنااا,,وعيالنا سلونااا وااايد في الطياره سوالف وضحك واحلى شي ان كنا رايحين مع خال ريلي وحرمته وكانت وااايد طيبه وكانت شاله عيالهااا ,,, واتفقنا دائما نسافر مع بعض…

انا اشوف ان العيال الهم حق في الكشته والسياحه…

صدقج حبيبتي
انا ما اتخيل اسير اتكشت بدون اليهال
هم فاكهة المكان
انا من فتره سافرت بروحي للعلاج وكنت وااايد ضايجه
وكل يوم ابى ارجع لعيالي

انا بصراحه اسافر بس بدوون عيالي
لانهم في سن مايتحملون تعب السفر واعباء السفر
وبصراحه اخاف عليهم من الامراض وتغير الجو لاني مجربه قبل وتعبوا عليه
خصوووصا ان سفراتي ماطول بالكثير 5 ايام وارجع
وانشاء الله لما يكبرون باخذهم معاي
الله يحفظهم ويبارك فيهم يارب

بغض النظر عن سن العيال ….
اشوف حلو ان الام والابو ….. أو خلينا نقول (الزوج والزوجة) يطلعون اجازة حلوة للاسترخاء والوناسة بدون اليهال ومتطلباتهم اللي ما تخلص
احسها تجديد حلو فحياتهم وهالشي بيقربهم من بعض اكثر… ويذكرهم بأول فترة زواجهم!!
اجازة حلوة بدون مسؤوليات وتعب ..

العيال طبعا يخلونهم مع ناس ثقة (فالأغلب تكون اليدة) … وما بيصير فيهم شي انشالله
وبيتعوضون باجازة ثانية أو شي ثاني عقب

برايي ان الزوجين يستاهلون اجازات قصيرة روحهم بدون حشرة اليهال …..
واذا عيالهم كبار (يفهمون) يوعدونهم باجازة ثانية معاهم (وينفذون وعدهم طبعا)

العيال مصيرهم بيكبرون وبيعرسون وما بيتفيجون لنا … بس الزوج والزوجة هذيل ويا بعض على طول انشالله لازم مايدخل الملل فحياتهم أو الروتين!

أنا عن نفسي الشي الوحيد اللي يمنعني من اني اسافر بدون ولدي هي اني أرضعه وماقدر أخليه
من أفطمه بسافر وبخليه عند يدته

عن نفسي ماحب اسافر بدون عيالي …
والشي اللي متفقين عليه انا وريلي ان عيالنا لازم يتعودون على شي اسمه سفر وطياره ^__^

على بجري سافرت اول ماخلصت ال40 .. ومده السفره كانت 5 ايام تقريبا ..
وعلى ولدي سافرت وهو 3 شهور عمره
والحمدلله لا يتعبونا فالسفر ولا شي .. بالعكس طول الوقت يكونون راقدين فما انحس بشي الا يوم وقت الحنه والصياح لوول

اما على اخر سفره خذت ولدي الصغير معاي وبنتي خليتها بيت امي لانها هي مابغت اتسافر ويانا وتميت طول الوقت اتصل فيها وماخليت شي ما اشتريته لها والله قلبي كان امعورني عليها بس هي ولا هامنها اهم شي انها مع خواتي تلعب ويي وبي اس بي !!

انا ايتج في رايج ..
وما دام العيال في ايدي امينه ليش لا ما اسافر انا وريلي ..
وفوق هذا العيال عند يدتهم وتعتبر هيه امهم الثانيه يعني ماشي خوف عليهم .. وبعد اخت زوجي موجوده بطمن عليهم اكثر واكثر هذي عمتهم ..فديت عمتهم انا طيوبه..

وسموحه .^-^

يسلموا حبيباتي ع هالردود…