من اقوى الاسباب ارتفاع نسبة الخيانة الزوجية

غياب تطبيق حد الرجم

انا اشوف الرياييل ما يبالهم الا هذا حتى يتادبوا
الانسان مخلوق عاصي و ما يتادب الا اذا شاف العقاب جدامه

مواضيع شكاوي الخيانة بتزيد وبتزيد ما دام هذا الحد معطل وانا اشوفه اهم من باقي الحدود

ولا شو رايكم

انا من وجه نظري العيب فينا نحن…. البنت من اتعرس حطت ريلها جدام عينها وباعت الاولي والتالي جنه خلاص الدنيا بتوقف على هالريال..واتحط همها كله فيه وهو عايش حياته نفس ما قبل يعرس… المشكله ان اهالينا هم يعلومونا ريلج وريلج وريلج… بس ما يدرون ان الزمن اتغير والجيل الحينه اللهم يا كافي منه… يعني انا عشت الجيلين على قولتهم وافرق من بينهم نسبه الطلاق والمشاكل في جيل الحينه…

اول شي البنت من اتعرس عيشي نفس حياتج القبليه ما انقول عقي ورى ظهرج لكن ما يكون محور حياتج..
وثاني شي في فترة الملجه وهاي الفتره انا ما احب المجاملات ولا اتصنع لان اهني انتي اتعرفين الريال عدل… فتره الملجه كوني طبيعيه نفس ما انتي ترى هالريال عمرج كله بتعيشين وياه…
وثالث شي ان اكتشفتي خان او رمس او سوى أي شي غلط … تعالي واجهي لا تحرقين قلبج بروحج تعالي رمسيه انا شفت وعرفت وهالمره يسامح لاني شاريه لكن المره الثانيه ورايه اهل انا مب بروحي… خوفيه كوني واثقه من عمرج… لادقولي انا ما قصرت الريال لو اتولعين اصابع ايدج العشر اشموع قال قصرت…
رابع شي عيشي لنفسج وعيالج واهلج واخر شي ريلج لان هو اللي دخل حياتج مب انتي دخلتيها…

انا بقولكم نبذه عن حياتي وكيف الحينه اعيشها صح… انا اماراتيه وريلي خليجي… ولعت ايدي العشر شموع حقه هو واهلي ما يدرون عن حياتي شي غير اختي الكبيرة… اتخيلوا بعد 10 سنين مقصر ومهمل وانا الام والابو وانا كل شي…سار عند اخويه وقال اختك انا شاك فيها اترمس واحد… ما قالي سار عند اخويه اللي ما يعرف ولا شي عن حياتي ومشاكلها… شفتوا كيف انجازيت بعد كل هالسنين… ما قلت شي… قلتله انا عفت وانت عيش حياتك بس انا ما غلطت واذا تبى اتشك هكوا الدرب انا ما اذبح عمري عليك.. الصحه والعمر اللي باقي حقي وحق عيالي…
والحينه والله يدور عليه ادواره يبى بس انا ارجع واكون نفس قبل… لكن لا كرامتي فوق أي اعتبار… سار ولا رد في النهايه ريال دخيل على حياتي…

علشان جي اقولكم لا تذبحين عمرج على ريااااااااااااال… يوم بشوفه بعينه ذابح عمره عليه صدق من خاطره واحس بالهشي افكر بعد قبل ما اذبح عمري عليه…

ادري طولت بس يمكن كلمه تستفيدون منها…. وان شاء الله الله بيهديهم يارب…

موفقين جميعا

هالحد للي يعرف انه اللي يسويه غلط ومستمر فيه، ولو لاحظتي
ترا الحريم هن اللي خلن الرياييل يتمادون ف هالاشيا، يعني حريم
اول كانن يصبرن ويعرفن انه رياييلهن يخونونهن لكن يسكتن عشان
العيال وهالشي علموه بناتهن، عشان جي بندخل 2024 وبعدنا
نشوف هالمواضيع تنطرح، مع اني استغرب انه بعض البنات يعانن من
هالمشكله وهن دارسات يعني لو ف عمر امهات اول واليدات بقول لقله
الحيله يرضن بالواقع لكن وحده متعلمه المفروض تكون عارفه شو اللي
لها واللي عليها وابسطها حقوقها كـ زوجه لكن بعدنا نشوف بنات يتنازلن
عن حقوقهن لين ما يوصلن لمرحله انهن يكونن هوامش ف حياه رياييلهن
وبعدهن صامدات تحت كلمه "الصبر" حتى فاللي ما يرضي رب العباد ألا
وهو خيانه الزوج

التربيه تيي من البيت واللي مب متعلم شو الصح وشو الغلط
وما نشأ نشأة مستقيمه ف هني ما نقول انه يباله رجم بل
يباله اعاده تأهيل وتذكير أول بأول، وايد من الاهالي اللي
يركزون ع تربية البنت ومراقبتها في حين انهم يلهون او
يتغافلون عن الولد وتصرفاته وهالشي نابع من مجتمعنا
اللي رفع القلم عن اخطاء الريال بحكم انه "ذكر"، لذلك
اذا الناس يبون الخيانه تنمحي من المجتمع عليهم انهم يربون
عيالهم تربيه صحيحه مبدأها الدين الاسلامي ويزرعون ف عيالهم
الاخلاق الحسنه، لانه لو الناس ما علموا عيالهم هالشي ف حتى
الرجم ما بيوقف الخيانات لانه الخوف من الله مرتبط بنفسية الانسان
واذا هو مب متربي ع هالشي من الصغر صعب انج تيين واتطبقين عليه
هالحد

ضعف الوازع الديني السبب الرئيسي للخيانة

وسبب ضعف الوازع عند الشباب هو تربيته منذ الصغر

وعدم التزامه بالصلاة

اللي تبغي ترتبط بواحد تتأكد من تربيته وأهله ومدى التزامه بالصلاة

أهم من شهادته ومركز وشكله ومكانته اﻻجتماعية

لا حول ولا قوة الا بالله

من العقول الي احب اتابعها

كل الشكر

صدقتي