يايبه لكم طريقة ميني ميني تارت بالتمر و الجوز
اتصور انكم تعرفونه … و سهل !
لكني من يومين كنت يالسه اسويه و الكاميره صوبي
فصورت و قلت اعرض الطريقة مره وحده
المقادير
بيضة وحده
فنجان قهوة سكر مطحون
فانيليا شوي
زبدة 200 غرام
طحين ابيض 1 كوب (250 غرام )
نشاء ربع كوب
حليب مركز فنيان قهوة
تمر منزوع النواه ( 10 حبات تقريبا )
جوز مقطع لقطع صغيره ( تقريبا استخدمت 10 حبات )
الطريقة
بالخلاط الكيك ,, نخلط البيضة مع السكر و الفانيليا لمدة 3 دقايق لين مايتكثف و يتضاعف و يصير مثل الكريمة
نذوب الزبدة ونضيفه للخلطة اللي فوق و نضيف عليه الطحين و النشاء و نخلطهم مع بعض
بنحصل على عيينة ناااااااعمه و هشه ,,
نغطيها و نتركها 10 دقايق ترتاح !
نييب قوالب الميني تارت الصغار ,, و نحط فيه اوراق البيض
ناخذ من العيين و نفرده في القاع و نمد العيين على اطراف الورق بحيث انه يغطي الحواف
1- كمرحله اولى نحطه في الوسط العيين ,, قطع التمر
2- نحط عليه شوي من قطع الجوز
3- بالخاشوقه نصب عليه شوي من حليب المركز
ندخله الفرن على حرارة متوسطه ربع ساعه
ونطلعه
ع الطبيعه وايد حلو شكله و لذيذ جدا جدا
وسهل مايباله عباله و بسرعه يستوي
واللي تجربة تقولي رايها !
شكله لذيذ
تسلم ايدج يا عسل