أحــســن الطرق في معاقبة الأطفال عن تـجــربـــه شخصـــية

الأطــــــــــــــفـــــــــــــــــال

هم زينة الحياة ،،

وكل عايله ما تخلوا من وجود الأطفال،،

إن كانوا عيالها او أخوانها او عيال اختها او أخوها او حتى عيال الخاله والباقين ،،

وحلووووين وطيبين ونحبهم وما يهونون علينا

لـــكـــن

كل طفل يغلط ،، بس الغلط الأكبر انه احنا ما نصححله الغلط وبس نوقفه في هالموقف ،،

وهالنصايح الصراحه انا استفدت منهم من البرنامج الشهير

Super Nanny

كنت من متابعينه ولان انا من النوع الي يقرا ويحب يشووف وبالعكس ما اتعقد اذا شفت شي او سمعت شي اخليه عضه وعبره حقي وافكر كيف اتجنبه ،،

المهم ،، وأهم شي ،،

بذكرلكم بعض المواقف الي تستوي وكيف ممكن تتصرفين وياها ،، وانا طبقتهم على أخواني وأولاد يعني اصعب من البنات ،،

قبل ما كان عندي صبر او أتحمل عناد او صياح بس الحينه عرفت كيف اتعامل وياهم حتى أميه وأبويه اي شي يستوي قالوا هااا ترا بنخبر عليكم <<< استويت رعب حقهم لا اسولف بس عدنا اميه ما تحرج عليهم وابويه يقول حرام انا طول اليوم في الدوام واخر شي ارد وانازعهم ويبغي امي تنازعهم بداله ومحد ينازعهم في الأخير

لين اخر شي أتمردوا في البيت ولا يسمعون كلام حد وما عيبني الوضع

– خلي عندج شي إسمه punishment chair (كرسي العقاب)

هذا الكرسي عشان تتعلمين تتمالكين اعصابج وما تتعاملين بالضرب او الصراخ ،، والطفل يتعمل انج انتي الي تعاقبين

هذا الكرسي يكون موجود عندج فالبيت في الصاله او اي مكان انتي تحددينه حقهم

وما تيلسينه اكثر عن عمره

سنه = دقيقه
سنتين = دقيقتين
سنتين ونص = دقيقتين ونص
.
.
.
.
عشر سنين = عشر دقايق

لا تقولون بينزل من على الكرسي كل ما نزل رديه وروحي او اشتغلي في اي شي بس قبل لا تحطينه فهميه انه هو يلس على هالكرسي لانه سوا شي غلط وكلميه بنبره انج جاده وقوليله بتنزل عقب ما تقول انا آسف وما برد اسوي هالشي

وممكن يصيح ممكن يسويلج فلم هندي وقلبج بيعورج

وأخويه الصغير إيلس يقولي ان عطشان بس قطره عشان يباني اصد صوبه وينزل >> طبعا ماماتنا يوم تشوفه جيه يغمضها وتشله بس قمنا نعلمهم انه هذا الصح لا تخربونهم

وأخويه العود اكبر عنه بكمن سنه ما اتعود نطبق عليه فهذا صدق تعبني هاك اليوم لانه ينزل وينخش اونه ما ترومين تزخيني بس حاولت اني اسكت قد ما اقدر واقوله بترد على الكرسي وما رد وقلتله خلاص اوكي الباب بيتم مسكر 10 دقايق وعقب بفجه بكلمك وانا ما بوقف عند الباب بس مابا اشوفه مفتوح

ولين اخر شي تعب ويأس وتم عشر دقايق وتأسف وسار مسح العصير هو والصغير عطيته كلينكس بس عشان يتعلمون مب البشكاره بتنظف اي شي

بس إتحملي

يوم بترديله لا تحرجين ولا شي لانه خذا عقابه ولا تكلمينه بها الطريقه او الحركه

فيها نوع من الإهانه والخوف للطفل

انزلي لمستواه وكلميه بحنان وقوليله انا احبك بس انت سوييت غلط ولازم تقول انا آسف وعقب ما يقول بوسيه واحضنيه عشان يعرف انج تحبينه

حتى واحنا مسافرين قاال نااانااانااا هنييييه ماشي chair بس عقب عرفوا انه احنا الي نحطه مب بس الي في البيت ههههههههههه

وخلاص من يسوون شي نطالعهم ونقولهم الchair ويسيروون روحهم ايلسوون ويقولون والله خلاص انا شاطر ما بعيدها ،،

موقف ظريف استوالي وياهم

كنت اقول حق اختي مال سوالف يعني جب جب لا تستهبلين وأشوف واحد حاط ايده ومعصب (اخويه الصغير) ليش اقول جب حق اختيه ما يقولون هالكلمه عيب وقال يالله على الـ chair ويسوي عمره يطالع الساعه وقلتله ابا ماي سار ياب فنيال قهوه وصب قطرتين ماي جب نصه ويا عندي عقب غير رايه وحطاه على الطاوله اونه عشان بس اشوف ما اشرب ولا يكلمني ولا يصد صوبي وقلدني في كل حركاته عقب وقف عندي قال قولي sorry وتعالي بسويلج hug ووداني عند اختي قال الحينه هيه شاطره ما بتقولج مره ثانيه ،، صح يهال بس اليهال ذكي ويعرف ويفهم

الأشياء الي ممكن يتعاقب عليها ،،
الضرب
الشتم
او اي شي بالعمد وقاصدينه
وفي بعض اليهال يتفلون او يعضون
او يطولون لسانهم اذا طلبتي منهم

وصدقوني الطريقه تنفع ويا كل انواع الأطفال ،، لان الطفل اذا ما حطيتيله قوانين هو يتعلم يحط القانون على كيفه ويتعلم ان الشي الي يباه اخر شي بتعطينه عقب ما يحن او يصيح ،،

وقت النوم :

اذا معودتنهم يرقدون وياج او تحصلينهم ناشين وياين على شبريتج طبعا هذيلا كبار شويه بس ما لقيت غير هالصورة بس طبعا في هالعمر مستحيل ايوون عندج اذا علمتيهم

وتبينهم يرقدون روحهم وطبعا هذا احسن شي،،
حطيه على الشبريه ولحفيه،،
واذا يخاف من الظلام خليله ليت صغير مفتوح بس مب الي عداله او اذا يحب يسهر او يرقد وهو يشوف التلفزيون كل هالطرق غلط ،،

وممكن تحطينه ويوم تطلعين يلحقج ردي شليه وحطيه لو 100 مره عشان يعرف الطفل انه ماشي مجال غير هالطريقه ،،

واخر شي بيرقد في سلام

روح التعاون والتنافس ،،

اذا ولدج ما يحب يلعب ويا حد او ما يحب حد يشاركه ،، او تبينه يجرب شي ،، أو تبين تعودينه على شي ،،

مثلا هو وأخوه هو وأخته وتضاربوا لا تعاقبينهم على طول ،، قوليله هذا اخوك اختك لازم تلعبون مع بعض شو رايكم انا العب وياكم ونلعب بالدور ونشوف منو بيغلب ،، اول شي مثلا البنت عقب الولد وعقب انتي وشوي شوي خليهم وبيكملون مع بعض ،،

تبين تعلمينهم على الصلاة او توهم صغار تبين تعودينهم يفرشون اسنانهم ويسوون brush

ولازم تعودينهم على هالشيين أساسين ،،

حق الأسنان قولي منو الشاطر الي بيفرش أسنانه الحينه وبتشوفينهم كل واحد بيغلب الثاني عشان يفوز ،، وشجعيييه انه اليوم كان الشاطر وحتى الثاني قوليله يالله باجر انت لازم تغلب او الصبح

حق الصلاة او الواجب او اي شي بيكون شبه يومي ،،

سويلهم مثل لوحه وفيها اساميهم الي بيسوي الواجب او بيصلي اليوم يحط ستيكر او نجمه او اي شي يحبوونه وطبعا في البدايه لازم تحببينهم في الشي عشان يستمرون لا تنازعينه اذا ما صلى بس خليه يتعود شوي شوي ،،

وتشوفون اخر الأسبوع منو فاز بأكثر عدد او حتى لو واحد عندكم على حسب إلي جمعه اذا وايد هو يختار الهديه واذا شويه خذوله هديه صغيره تكون تشجيع،،

وهذي بعض النصايح:

– كوني حازمه في قراراتج ،، لا تغيرينها ،،

– كوني متفاهمه في كلامج خذي وعطي ويا طفلج ،،

– وقت العقاب عطيه المطلوب ولا تردين على اي شي بيقوله ،،

– لا تيأسين من اول تجربه ،،

– لا تلجئين للضرب نهائيا ،،

– خلي لولدج المجال يفهمج ليش سوا ها الشي ،،

– علميه على روح التعاون ،،

– لا تكونين سلبية يوم تكلمينه ،، دائما كوني إيجابية في كلامج ،،

– طبقي الصح صح والغلط غلط ،، على ولدج او غيره ،،

هـمســه : لا تقولين طفلي ما بيحبني او يكرهني ،، بالعكس هو بيعرف كيف تحبينه عقب كل مره حتى اخواني نفس الشي ،، حتى البارحه مسويلي رسمه وملصيقينها على باب حجرتي واشوف يسحبوني الحجره وانا مشغوله وسرت اشوف مسويلي بيت وقلب وكاتبين We love u …… my name
from your brothers :….. and …… طبعا الصغير ما يعرف يكتب بس ساعده الي أكبر وتم ميودله القلم عشان يكون اثبت وجوده في الوقه وصدق استانست من خاطري وحبيتهم

ممكن الموضوع طويل شويه ،،

بس حبيت افيدكم في أشياء انا استفدت منها عقب ما طبقتها مب بس على اخواني حتى مع عيال خالتي مثلا عمره ثلاث سنين وبدا يشتم وقال بضربج فقلتله اضربني (( تبون الصدق ما اتوقعت يضرب مب متعوده اخواني يضربون)) وضربني والله فقالت امه لا تحاولين وياه ما يفيد الكرسي انا مسوتله time out وما فاد لكن اخر شي طبقته وفاد وياه وتأسف وحبيته وعطيته حلاوه وقاموا الكل يطبق الكرسي لانه مفيد وما فيه ضرب او إهانه للطفل وطبعا لازم تفهمين الكل انه الي يغلط بيلس نفسه عشان ما يحس انج هنتيه جدامه

والسموحه اذا طولت عليكم،،