كيف حالكم حبيباتي…..
حبيت أعرف من الأمهات، كيف يقدرن يخلن عيالهن يرقدون من وقت ومن دون ضرابه وياهم أو عقاب
، وبعد اللي عندها أطفال عمرهم سنتين أو ثلاث سنوات كيف تقدر تخليهم يرقدون دون أن تكون وياهم لين ما ينامون.
ياليت من كل وحده تمر تعطينا من طرقها ويا عيالها.
جزاكم الله خير
مرحبا أختي ,,
أول شئ ادعي ربج عشان ييسرلج هالشئ,
بعدين ,نششي عيالج الصبح من وقت , ولاتخلينهم نايمين
لين الساعه 9 , أحسن وقت للي مايسيرون المدرسة
الساعه 8 , والظهر لاترقدينهم , والعصر بتصكك العيون
بس قاومي , ولعبيهم وألهيهم ,لين الساعه 8 أو 8ونص
وعشيهم وبعدين رقديهم ,,
وسويلهم جدول للنوم عشان يتعودون مثلآ
عقب المغرب يتسبحون ويتعشون وخلاص
كل واحد في سريره استعدادآ للنوم ,
ممكن تشغليلهم رسوم وتبندين الليت , وتخلينهم
يشوفون الرسوم لين يرقدون , أو بندي ليتات
,وخلي ليت خفيف بس وشغليلهم شريط
قرآن جزء عم , وبينامون بهدوء , ومع تكرار
سماعهم للقرآن ,بيحفظون ,لالا تقولين صغار
ومايعرفون ,لا بسم الله عليهم بيتعودون وبيعرفون,,
وإنتي حاولي ماتكونين عندهم في نفس الغرفه
وقت نومهم , بس تمي سايره , راده عليهم
عشان تتطمنين عليهم وتتأكدين أنهم ناموا
وما قاموا يلعبون ويرمسون مع بعض,,
بعد مرات يوم يطفروبي عيالي أقولهم :إللي
بينام أول واحد من وقت,باجر بعطيه فلوس
اتشوفينهم يتسابقون على سرايرهم ويطيحون
ويغمضون عيونهم غصب عشان يرقدون ,,
وأي سلوك تبغين تعلمينه العيال ترى يباله
صبر , وماتيأسين من أول فشل ,, ومثل ماقلتج
لا تنسين أنج تدعين ربج عشان ييسرلج هالموضوع,,
شكرا ع مرورج الكريم.
انا اوافق اختي ام سعوود عاللي قالته
بس بضيف شي .. للعيال الصغار.. حاولي تفرغين طاقتهم فاللعب.. مثلا العصر خليهم يلعبون برع
وبيردولج عيزانين.. سبحيهم وعشيهم .. وبتلاحظين انهم خلاص انهد حيلهم ويبون يرقدون
بس لازم تسويلهم جو رقاد.. تخفضين عالليتات والا حتى تبندينهن وخلاص بينيلهم انه هذا وقت الرقاد..
شوي شوي بيتعودون باذن الله.. بس يبالهم صبر
الله يعيينج ويعينا على تربيتهم ان شالله
فديت روحها ما ترقد شرات اكثر اليهال .. يعني ارقدها الساعه 10 وعلى اقل شي قامت حتى لو بعد نص ساعه <<<<<<<< وخلاص شو يرقدها بعدين ؟
متعبتني وااايد بهالسالفه كل يوم على هالحال سهر لين الفير ..
ام ابرار
وتبين الصدق كل وحده عيالها تختلف ردة فعلهم عن الثانيين..
نصيحتي لج لاتسمعين لحد اتبعي قلبج..
انا يالسه اقرا الموضوع وارتب الرمسه…لين ما وصلتلتج إلا كاتبه كل الي فراسي..