ابي رايكم بلييز

السلام عليكم خواتي..
انا مدخله ولدي الحضانه وهو عمره 3 سنوات.. الحين بعد شهر بيكمل 3 سنوات. ووايد احاتيه يوميا. لانه كل ما اوديه الخضانه واخليه. يصيح وايد.
انا ربة بيت وما اداوم ولا ادرس. اسباب اللي خلاني ادخل ولدي الحضانه. لانه اول شي وحيد.. ثاني شي ما عندنا حد من الاطفال فالعايله. وثالث شي متاخر فالكلام. لين الحين ما يرمس.

امي تحاتيه وايد. وعلى قولتها حرام ادخلينه. بيضربونه. وبياثر على نفسيته وما اعرف شو واتري عليه لين يكبر شوي . انتي تعذبين الياهل. وكيف قلبج يطاوعج اخلينه يصيح وتروحين عنه. من كثر هالرمسات قمت اشك واوسوس انه لا يكون غلطت اني دخلته.

الحين خواتي هل انا اللي اسويه فعلا غلط وياسه أأثر ولدي بشكل سلبي . مب عارفه كيف وشو اسوي.

طبعآ اختي غلطتي ، تراج امه
انتي قاعده تضيعين طفولته وتضيعي احلى ايام من حياته وحياتج
مفروض الحين يبين دورج كأم .. ترا الام مب اللي تولد ، الام اللي تربي !
مو عذر ولا اسباب كونه وحيد ، انتي مب اول وحده تيب ياهل وحيد بالبدايه ، و شي وايد ياهل يتأخرون بالنطق لكن مايودونهم حضانات
فعلا كيف يطاوعج قلبج تتركينه وهو يصيح .. عيدي حسابتج اختي
احتوي ابنج وكوني معاه ، اذا ماعنده اخوان .. كوني له الام والاخ ، العبي وياه كلميه علميه ينطق
قعدي معاه وعلميه يتكلم مثل ماتتكلمين خليه يعيد الكلام وياج ويحاول ينطق ..اذا وايد شايله هم هالشي او جربتي سابقآ
مب مشكله روحي لناس متخصصه لكن كوني وياه لا تتركينه ..
واسمحيلي لو الكلام قاسي شوي ، لكن صعب علي ولدج ><
ربي يسعدج ويحقق لج مرادج غناتي :*

غريبه. بس هذا عشان مصلحته. والحضانه تعلم وايد اشياء. ودكتور النطق بنفسه قال يحتاج حضانه. ووايد قالولي انه طبيعي بيصيح فالحضانه لكن مع الايام بيسكت وبيتاقلم واللي سمعته الطفل يتعلم من الاطفال اسرع عن الكبار. ما ادري الصراحه. ونا مصليه استخاره قبل لا ادخله. خوفتيني احس

اختي مصلحته مب بأنج تتركينه
ياهل عن ياهل يختلف ، مب كل ياهل ممكن يتأقلم ع قولتهن او يتعلم
اذا مب حاببها مابيتعلم لو بعد مليون سنه !
وترا الطفل معروف يحب يقلد ، ف اللي يقولج ان يتعلم من الصغار اسرع يضحك عليج
الطفل يقلد اي حد بالحركه وبالكلام ان كان كبير او صغير .. ف عادي بيتعلم منج اهم شي توفرين له الوقت الكافي وتقعدين معاه دايما

الحضانه وااااايد تفيد الطفل…

أنا عندي طفلين فالحضانه وكلهم من عمرهم شهرين بحكم اني اشتغل بس بنتي الكبيره دخلتها نفس عمر ولدج لانها كانت وحيده وما عندها أطفال فالبيت وما شاء الله تعلمت وتقوت عندها مخارج الحروف..

لا تحاتين ولدج وأنتي ماسويتي شي غلط هالشي لمصلحته بيصيح كمن يوم وعقب بيتعود وبيصيح يبا الحضانه
وهو جي بيتعود عالنظام فما بتتعبين وياه يوم بتدخلينه المدرسه

عادي اول فترة بيصيح في الحضانة لكن بعد فترة بيتعود
ومع الوقت بيصير يتلكلم بشكل صحيح و بيتعلم اشياء جديدة انشودة او سورة من القرآن عادي عزيزتي لا تحاتيه بعدين بيتعود

على حسب الحضانة اللي دخلتيه فيه حضانات لوعة جبد
يخلون الياهل بالبامبرز وريحة في المكان
يقعد طول اليوم وهو يبكي
دخلت مرة حضانه اللي يشتغلن اثيوبيات الحين هاذيلا لا يعرفون عربي ولا إنجليزي شو بيعلمون العيال رمسة مكسرة فإذا شفتي العاملات فلبينيات او عربيات اهون بوايد
اذا عندهم كميرا تقدرين تراقبين ولدج على الأقل تطمنين عليه
بنتي البكر كانت شرات ولدج لكن كنت اطلعها للحدايق ساعتين او احطها في حضانة ساعتين وانا كنت العب وياها وبالليل اقرى لها قصص واسولف وياها