ما عرفت وين أكتب الموضوع اهنيه ولا في قسم الحمل والولادة…واستقريت هنيه…
موضوعي باين من العنوان ….بسافر إن شاء الله تركيا وأنا حامل في الشهر الثالث
فمنو سافرت مثلي….بهذا الوقت من الحمل حد يقول لي مب زين وحد مجرب يقولي جدا عادي …وأنا متوكله على رب العالمين…
بس أبغي أعرف شو سويتوا في الطيارة أنا قرأت وقالوا لي بعد كل ساعة من الأفضل اتحركين ريلج وتتمشين في الطيارة …
بعد شو النصائح اللي تقدرون تعطوني إياها …
وأشكركم خواتي وأدري اكم ما بتقصرون
بالنسبه لوجودج في الطياره ، يفضل في يوم السفر ما تاكلين أشياء مالحه ، علشان ما تتورم ريولج ، وفي الطياره حاولي تتمشين كل ساعه ، والله هو الميسر.
وتسيرين وتردين بالسلامه،،،
عااااادي يعني اذا انتي ما اتعانين من الحمل
في الصيف اللي طاف كنت حامل في الشهر الثاني في نهايته واتوحم وابا اسافر كان في خاطري
وسرت للدكتوره وقالت كل شي اوكي وعادي عطتني ابره تثبيت للاحتياط لان قبل مريت في حاله اجهاض
المهم سافرت وعااااااااادي في الطياره اتحرك وجي وهناك مووول ماحسيت بالوحام ولا اي شي
ورديت البلاد بخير وسهاله 
الحمدلله والحين في الشهر السابع والله يتمم ع خير
انا اقولج بس سيري الدكتوره واطمني وتوكلي ع الله ولاتسمعين رمست حد لان انا كل حد قالي لاتسيرين خخخخ بس تمت سالفه السفر في راسي وسرت المانيا 6 ساعات في الطياره وعادي الامور طيبه
واما اختي قالت لها الدوكتوره كل شيء تمام وتقدرين تسافرين وكانت ف اول الخامس
وثاني يوم السفره الفجر قبضها نزيف في بانكوك وردت البلاد اقل من اسبوع وتوفى الياهل
وربي يحفظ الجميع ان شاء الله