ما بطول عليكن اكثر الحين بعطيكن المقادير والطريقه بس طبعا المقادير ل 20 شخص
المقادير:
ملفوفه عوده وحده
عدد 3 حبات بصل كبار مقطع قطع صغيره
5 او 6 حبات طماط مقطع ايضا الى قطع صغيره
حبتين ماجي
قليل من الزيت
جزمه من كل من البقدونس والشبت والكزبره الخضرا مغسول ومقطع قطع صغيره يعني ( شبه مفروم)
ملح + فلفل اسود+ فلفل احمر على حسب الرغبه في الكميه
ارز مصري عدد 3 كوبات مغسول زين ومصفى من الماي
الحين الطريقه:
اول شي الملفوف :
تجلبين الملفوفه وبالسكين تقورين قلبها وتطلعينه ( جان زين عندي صور براويكن كيف بس للاسف)
وبعدين اتيبين جدر نصه ماي وتخلينه على النار الين ما يغلي الماي وتحطين ملعقه ونص ملح على الماي وتحطين الملفوفه في الجدر وتسلقين الملفوفه
طريقة السلق: حطي الملفوفه في الماي وقلبها فوق وبالمساكه تطلعين الملفوف من الماي ورقه ورقه يعني تفججين الملفوفه وهي في الماي هذي ورا هذي ما تخلينها اكثر من نص دقيقه لانها بتهتري
وبعدين اتيبين ورقه الملفوفه اللي سلقتيها وتقطعين صلوبها بالطول بتستوي عندج الورقه جنها صفحه قطعيها بالسكين الى 3 قطع او على حجم الكف بالطول
ملحوظه الصلوب العاسيه مالت الملفوف لا تعقينهن لهن شغله
الحين الحشوه:
ييبي طاسه تكون مقعره وحطيها على النار
حطي الزيت وبعدين البصل من اتشوفينه استوى شويه ذهبي حطي الطمام وجلبيه وبعدين ضيفي عليه الملح والفلفل الاسود والفلفل الاحمر وبعدين الماجي ومن يذبل كله مع بعض ضيفي له البقدونس والكزبره والشبت وجلبيه وياه وخفي على النار وغطيه لمده 5 دقايق على نار هاديه وبعدين طفي النار وبعدين ضيفي عليه الرز المصري واخلطيه ويا بعض
خلاص الخلطه جهزت ؟ والملفوف اتقطع؟
الحين حطي ورقة ملفوف على كفج وحطي عليها شويه من خلطه المحشي ولفيها مثل السجاره بس انتبهي لازم ترصين عليها شويه وانتي تلفينها عشان ما تتبطل
وفي قاع الجدر تحطين صلوب الملفوف اللي قلت لج لا تعقينهن لانهن يحمن الملفوف عشان ما يحترق وما يغير طعم المحشي وطبعا ترصصين الملفوف في الجدر فوق الصلوب
رصيهن كلهن في الجدر الين ما تخلصين
الحين التسقيه
لا تستعملين حق محشي الملفوف الا شوربه اللحم بس اول شي حطي الجدر على النار وبعدين حطي على المحشي صحن صيني او بايركس مجلوب يعني يكون ظهر الصحن فوق والحين صبي شوربه اللحم على المحشي من فوق الصحن عشان ما يتبطل المحشي .. الين ما يتغطى المحشي من الشوربه
الحين عاد حطيه على نار عاليه الين ما تغلي الشوريه ويا المحشي وبعدين قصري على النار ( هاديه) وطبعا تكونين مغطيه الجدر من قبل ما تشغلين النار وبين فتره وفتره شيكي عليه الين ما ينظى
وطريقه تقديم محشي الملفوف : بعد ما ينظى حضري صحن عود عشان تقدمين المحشي واياج ثم اياج تغرفين المحشي بالمغرفه
اول شي مسكي الجدر من الصوبين ودقيه شويه على الارض او الطاوله عشان يتفجج المحشي من بعض وصبيه في الصحن شوي شوي عشان ما يخيس لج المكان
ادري الطريقه صعبه شوي بس انا متأكده انكن بتدعن لامي
وهني وعافيه على قلب اللي تسويها واللي ياكلونها
الله يطول بعمر الوالدة ويعطيها الصحة والعافية ..
الله يطول بعمر الوالدة ويعطيها الصحة والعافية ..