كيف الحال ؟
الله يسلمكم انا مقدمه ليسن من 4 شهور امتحنت أكاديمي ونجحت وأفتكيت
والحين يالسه أحاول انجح بالباركن والريوس وطفررررت جن الباركن حالف يرسبني أسير أدرب بالمدسه كل شئ اسوييه صحح ولا اغلط موووول أدرب باليوم ساعه ساعتين أسير امتحن بمركز المرور لازم ادعم من كثر ما انا حافظه الخطوات صرت احلم فيها لا تقولون توتر ولا خوف انا لا استحي ولا اتوتر ولا شئ عندي امتحان يوم الاثنين وخاطري أخذه لأني محتاجه وايد أسوووق ولولا الظروف جان طبيت السالفة من زمان واشتريت راحه بالي ..
لو ما عليكم اماره اللي عندها ليسن وامتحنت تقولي الخطوات إذا تذكرها بالتفصيل لآني أحس القياسات اللي عطتني لها المدربة فيها غلط والله اعلم
انا من رآك وأدرب بمدرسه الهدف ..
والسموحه على الموضوع المعفوس داخله من فوني ..
ومشكورين للكل واللي ما عنده فكره تدعيلي وترفع الموضوع وجزاكم الله خير الغاليات ..
الباركن انج تمشين سيده لين تحسين انه مقدمه السياره وصلت لنص الباركن الي بتدشينه ،،
وعقب تلفين السكان باتجاه الباركن ،، يعني ب جي بتمشي السياره داخل الباركن ،،
واول ماتدشين عدلي السكان يعني رديه سيده ووقفي وخلاص ،،
سهل والله خيتي لاتحسسي عمرج انه صعب بالعكس واااايد سهل ،، الحين قمت اضحك على عمري لاني كنت اخاف خخخ
ترا القياسات احسها تختلف من كرسي لكرسي
يعني الكرسي الي تتدربين فييه في سيارت المدرسه يمكن ظهرج مرتفع
وكرسي الامتحان مسنود يمكن
وغير جي بعد المرايا اذ تغيرت تختلف قياساتهاا
انا ما احيد احيد اني من 2 امتحان نجحت ولو ان الكل الي عندي واعرفهم يقولون العكس
ان الباركن والريوس وايد سخيف وينجحون من اول مره بس البني ادم قدرات ههه
المسكله انا توترت وخفت وتخربطت ونسيت الخطوات لان يدخلونا كلنا البنات في حجره وحده نتريا
وانا داشه جي عبالي بدش بمتحن وبظهر والا الحبيبات كل وحده زاخه اوراق ويسالن بعد وكانه امتحان مادة في الجامعه يراجعن فيه
هههههههههه وانا احاول اني ما اسمع لهن لاني بتخربط بس جد تخربطت لمن يا دوري