كيف حالكن يابنات انا ابا اسافر في الصيف وباخذ الصغاريه وياي وهاذي اول مره بسير فيها اوربا فاوين تنصحوني اسير لاني افكر اسير 3 بلدان وشو احسن اخذ شقق ولا فنادق لان الوالده واختي بيروحون معانا فاحناانفكر بشقق علشان ارخص واريح فالي تعرف اماكن حلوه لاتبخل علي بأي معلومه والي رايحه هالبلدان تخبؤني عنها
والسموحه
بعطيج معلوماتي عن السكن في فرنسا وبلجيكا بس المانيا انتي ماحددتي أي مدينة فمااعرف كيف بفيدج لني مازرت الا بون
في فرنسا (باريس تحديدا) اذا كنتوا حابين تسكنون قريب الشانزيليزيه ف صعب اتلاقون شقق بس انصحج ب فندق كاليفورنيا موقعه حلو واسعاره زينه بالنسبه لباقي الفنادق اللي في نفس المنطقه واذا حجزتي عن طريق النت بتلاقين اسعار ارخص
اما اذا كنتوا بتسكنون في منطقه اللاديفانس فهناك بتحصلون شقق وايد واسعارهم معقوله بس ترا بعيد عن الشانزيليزيه ..بس في المنطقه شي مركز تسوق كبير
وفي ف منطقه الاوبرا الفاندوم في شقق وايد بس اسعارها اغلى شوي والمنطقه كلها محلات وسوق ومطاعم وكافيهات راقيه اقرب للشانزيليزيه من اللاديفانس
بس انا راي شخصي اذا ما يلستي في الشانز ما بتحسين انج في باريس ! وصح اسعار الفنادق غاليه بس بتوفرين على عمرج لعوزه المواصلات
بلجيكا آآآآخ يا بلجيكا العوق ..
موقعها استراتيجي لنها وسط اكثر عن دولة ف تقدرين اتزورين هولندا والمانيا وفرنسا في نفس اليوم وترجعين
فأنا كل سنه ايلس في منطقه لويزا ( بروكسل طبعا ) في شقق السيتادين ..نظيفه ومأمان وفي شارع الماركات وقريب السوق والمطاعم
وفي ف منطقه الجراند بلاس بعد شقق بس ماعرف عنها الصراحه والمنطقه هناك بعد حلوه وسوق ومطاعم وكافيهات وعروض العاب ناريه كل ليله
ولازم تحطون في جدولكم تزورون مدينة بروج ..بس ماادري الحين ع الشتا كيف الجو لنه الصيف اللي طاف كان برررررررررررد موت
وماادري انتي حابه تعرفين بالضبط انتي حددي وطرشي لي عسب اعرف اساعدج
وبعطيج اسامي المحلات الي تبيع ماركات … بس بسعر ارخص .. بس انصحكم تسيرون فرنسا بالقطار ساعه ونص .. لانه انا مووول ماحب باريس وااايد يوووله … بس اذا سكنتو في بروكسل كل اوروبا عدالكم .. بالسيارة تقدرون تسيرون اي مدينه تبون ..