هلا خواتي الغاليات
الصراحه بنات ماكتبت ها الموضوع الا للعضه والعبره
بحاول اختصر قد ما أقدر علشان ماطول عليكم
كانت عندي صديقه من ايام الدراسه وكنت اعزها وتعزني وايد كنا اكثر من خوات المهم ها البنت كانت ملتزمه وماتطلع من باب المدرسه الا الغشوه على ويها نفسي الحمدالله … المهم جت فتره وبتعدنا عن بعض لظروف خارجه عن إرادتنا مشاغل الدنيا مثل مايقولون . يمكن تقريبا سنتين .. بس كانت دايما في بالي وكنت افكر فيها حتى رقمها نسيته .. ومن كثر ما كنت مشتاقه لها وابا اعرف اخبارها يلست أدور رقمها .. المهم وعفس الدنيا بس علشان احصل رقمها ماخليت مكان مادورت فيه والحمدالله حصلت الرقم .. ماتتخيلون اشكثر فرحت وسرت طيران اتصللها .. المهم كلمتها بس شو صار ؟ ربيعتي تغيرت ؟ شو اللي غيرها ؟؟ ماصدقت انصدمت لالا هاذي مب ربيعتي اللي عرفتها … تدرون شو اللي صدمني ؟ كلامها كان كله عن الشباب.gif "12 (8)")
وعن سوالف البنات ويا الشباب وعن مغامراتها البايخه المهم انا تضايقت منها وايد ليش تغيرت وين الالتزام والله حرام … للاسف اربيعتي صادقت بنات مب زينات وما يخافن ربهن وهذا اللي غيرها …خربوها حسبي الله عليهن.. وللاسف الشديد قامت اتكلم حتى الشباب المتزوجين نصحتها وايد بس بدون فايده قلتلها حطي نفسج مكان الزوجه لو كان عندج زوج ترضين يتصلون فيه بنات ويكلمونه ؟؟؟ خاصه اني ساعتها كنت توني متزوجه وطبعا كأي زوجه أغار على زوجي موت .. قالتلي عادي ليش الوحده اتغار على زوجها؟ أقهرتني… قلتلها انتي ماجربتي ولا جان حسيتي بالنار اللي بتشب في قلبج .. اتصدقون لدرجة اني قمت اخاف على زوجي منها وحتى اني ما عطيتها رقم البيت بس تعرف رقم موبايلي وقمت ابتعد عنها .. وفي يوم من الايام تفاجأت انها متصله على البيت والله العظيم يا بنات ان ضغطي ارتفع وماتحملت وعصبت عليها وسألتها من وين يبتي رقم بيتي؟ لاني خلاص الصراحه ماقمت أثق فيها وحذرتها انها ماتتصل البيت واذا بغتني بس تتصلي على الموبايل وبس . والله كنت وايد انصحها وقوللها حرام عليج سمعتج بتضيع لدرجة انها مره سكرت التيلفون بويهي لانها ماتحملت كلامي ونصايحي … قلت برايها وخلاص من اليوم ورايح لا عرفها ولا تعرفني ولانها عادي اتخرب سمعتي لان اللي مايخاف من الله يسوي كل شي.. ابتعدت عنها بس أرجعتلي لانها ماتستغني عني لانها مثل ماقلت من قبل صديقتي الروح بالروح من يوم كنا صغار ونحن مع بعض ودايما في نفس المدرسه … المهم خبرتني انها أنخطبت . فرحت لها وقلت زين بتحصل ريل يستر عليها وان شاءالله انها بترجع مثل ما كانت قبل وبتترك الخرابيط.. وبالفعل يا بنات ربيعتي تغيرت الله هداها وتزوجت وأمورها استقرت بس المصيبه ………………………………. انها دفعت ثمن غلطتها غالي وكما تدين تدان ين البنات اللي يحرقولها قلبها مثل ماحرقت قلوب وايد من الزوجات للاسف كل يوم تكتشف علاقه جديده مع زوجها كل يوم بنت يديده وكل يوم رقم يديد ومسج يديد .. والله يا بنات قامت تصيح دم ذبلت وعاشت في مشاكل الها أول مالها أخر .. أقسم لكم باالله انها مره طلعت من بيتها في الليل وكانت في بداية حملها طلعت اتصيح يايتني بسبب زوجها اتصلت لي من الشارع وقالتلي الحين يايتنج لان كان بيتها قريب مني طبعا انا خفت عليها وقلتلها شو مطلعنج في ها الوقت المتأخر من البيت حرام عليج انتي حامل . اهلها في إماراه ثانيه علشان جيه يتني انا لان ماعندها حد غيري .سألتها وين ريلج؟ وشقايل خلاج تطلعين وانتي بها الظروف قالتلي ضاربني وطردني وطلع من البيت علشان جيه يتج والله ساعتها تقطع قلبي عليها … بس كنت دايما اقول كما تدين تدان وحتى هي نفسها اعترفت بها الشي وعرفت ان كل هذا اللي صارلها بسببها .
انا كتبت قصة ربيعتي علشان البنات اللي يكلمون شباب و رياييل متزوجين يخافن ربهن ويتركن عنهن الخرابيط و يعرفون ان الله مب غافل عن عباده وكما تدين تدان ولازم اذا تزوجت بتي اللي تخرب بيتها وتحرق قلبها مثل ماخربت بيت غيرها .
هو القادر على كل شي
الله يعينها ويصلح من بينهم ويهديهم ان شاء الله
الله يستر على بنات المسلمين
والله يهدي البنات اللي يحاولن يدمرن بيوت غيرهن ..
والله المستعان
خلها تستغفر الله يمكن هذا اختبار حقها وياليت الكل يتعظ وان شاء الله ازمه وتعدي