بغيت اشتكيلكم حالي بس ياريت تقرون مشكلتي للنهاية
انا مالجة من زمان في البداية يوم ياني ريلي كنت هب مرتاحه منه وقلت برفضه ويوم امي سمعت اني برفضه يتني وقاتلي حرام عليج ترفضين الولد هذا ولد فلان امه فلانه والكل يتمدح فيهم وانا اقول انزين امي هب شرط اهله زينين وهو بيطلع زين وقالت لا زين زين وقلتلهم اسألوا وانا بستخير قالت لا اخذيه ومايباله نسأل هييله معروفين والصلاه اصلا هب مشروطه يابنتي لا تستخرين بس خلج بدون استخاره لانها هب مفروضه ولا ترى صدقيني بزعل منج وما برضى عليج ، قلتلها حرام شو هالاسلوب امي قالت هاي رمستي وما عندي غيرها.
اتخيلوا علقني 6 شهور عسبة ياخذ رخصة اسواقه للعلم تراه هب صغيروعسبة ايمع بيزات المهر بس وعسبة يشتري موتر مع ان قبل الخطبه بسنه قالوا بنخطب من صوبكم وجيه.
واخوه بعدنا ملج وبعد 4 شهور اتزوج وغير التفرقه اللي كانوا يفرقون بينا .
المهم انا عديت هالسالفه وملجنا وبعدها الضيجة فيني بس مكمله وقلت انا هب مرتاحه اوكي بس ليش اظلم الولد معاي ماله ذنب موليه حرام.
المهم انا في البدايه ما اعرفه بس يوم عرفته زادت ضيجتي زياده والسبب ان الولد يوم ملجتني صارحني ان ما يرروم يزوج بعد خمس شهور والسبب ان ما عنده ولا ريال بجيبته ويبا ايمع بيزات العرس اتخيلوا انا زعلت بس سويت روحي عادي عندي ومارمست والله اني حسيت عمري مذلوووله يوم ابا شي يذلني ولا اييبلي اياه ويوم اقوله بشتري للعيد لازم يسوي جمعيه ويستلم اول واحد عسبة يقدر اييبلي البيزات والسبب ان ما يقدر وايمع للعرس.ويتذمر من الجمعية واخر شي دفع مالشهرين وخل ابوي يدفع عنه .
وسكت وعديت السالفه يابنات معاشه 10 الاف وين بيمع ولا مايرضى يغير دوامه لان دوامه فري ومخلينه ع راحته وهو ما يحب يتقيد ع قولته بشي.
سكت وقلت بنعدي ويبا ايأجل العرس سنه ونص وبعد سكت واذا رمست قالوا انتي مغروره وما تراعين ريلج مول تراج .انا احسه مريض نفسي يحب رسوم المتحركه بشكل فضيع والفيديو وعنده اللعابه الجديمه ويلعب فيها لحد اللحين
من كثر ماهو مهووس بالرسوم الف قصة رسوم متحركه وسوى للقصه موقع وكلفته 6000 يعني فكر يخسر ع الموقع ولا فكر يرضيني ولا بهدية صغيره ولو كانت بريال انا راضية بس شو بقول انا الحمدلله .
المهم انا كنت ادرس ويوم اروح ادرس كان يقول ابا اعرف ليش تدرسين انتي لا تدرسين مالها فايده الدراسه .
وفعلا اهملت دراستي لغاية ما طردوني مع ان اهلي شرطوا عليه اذا تبا البنت لازم تدرس بس هو ولا كانه بالدنيا
اتخليوا ان هالانسان هامل شكله وهامل نظافته الشخصية وغير ان فيه طبع يعلق ع الخلق هذا فلان جيه وهذاك جيه .
ويوم اتضايج منه عادي عنده ولا يقول براضيها انا انقهر اغلق فوني ويسير يتصل بامي وبعدييييييييييين يدري ان مضايجه من تصرفاته.
قلت ما عليه الرياييل كلهم طبهم يزعلون الحريم جيه يعني انا افرق عنهم .
انا يوم ابا اشتكي كله يتمصخر علي ويحسسني اني تافهه بكل شي ويوم هو يرمس بسالفه حده يتم يرمس عن السالفه طوووووووووووووووووووووووووووول اليوم واذا حس ان الموضوع ما خذه حقه يتم اسبوع عادي >>والله اني ما ابالغ وربي يشهد علي
والقهر ان جدامي ويه وجدام اهلي ويه يطلع اخباله علي وحركاته ويوم يجابل اهلي يحسسهم ان روميوا وان هو مظلوم واني انا الغلطانه عاد اهلي دشوا بالسالفه ووقفوا معاه وقالوا انتي جذابه اتخيلوا جذبوني وصدقوه .
قلت ابا اطلق خلاص عفته دام اللحين يسوي جيه شوبيسوي بعد ما اعرس ، انا ما انكر ان يحبني بس ياناااس انا عفته ويوم قلت له يافلان خل انصلي ونستخير ربنا يمكن فيها خيره لنا ونكمل او نفترق وفي الحالتين نحن راضين بقسمة ربنا
قال اوك واستخرنا بنفس اليوم ونمت انا يوم استخرت وحلمت فيه ان يايني معصب وهو يوم سالته قالي ما حسيت بشي ويوم حلفته قال الصراحه ما صليت حسيت الموضوع ما يستاهل انتي ماعندج سالفه .
وكلما احاول اغيره يفقطني وقال انت يشو تبين فيني انا ما بيتغير واللي يبا شخص يباه بعيوبه وقلتله اذا ماتغيرت ماباك قال خلاص بتغير ومطنش وانا احاول ومنطش وبعدين زعلت ومارمسته قال اوكي بتغير ياناس يتغير ساعه ولا يوم بالكثير ويرد والله اني عطيته 15 فرصه بس رد
قلت انا مصره اطلق ماباه واللي يصير يصير وهو يحاول يردلي ويقول لاهلي اني غلطانه واهله يوم اشتكيلهم يصدقوني ويقولون لي البنت ما انجذبها لان عارفين ولدنا واهلي بالعكس سبحان الله .
تميت 7 شهور معلقه لا مخليني اداوم عسبة ارد بيزاته اللي صرفوها هم غصب عني ولا مخليني اكمل حياتي براحه
واخر شي ياني اخوي وضربني وقال انا بسويفيج كل يوم جيه اذا قلتلي لا مابا الولد .
وانا صحت صياح قلت لهاي الدرجة يعني وصلت ظروفي للضرب والحرمان .
قالوا ببتزوجين غصبن عنج ارتحي للولد ولا لا
انا اتصلت لمحامي وشرحتله كل شي قالي محد يروم يغصب ولا حتى يضربج نحن عايشين بدولة كلها امان الحمدلله
قولولي شو اسوي انا مليت ودي اموت وافتك بس انا اخاف من ربي رب العباد وابا حل يرضي ربي
انا صليت مره ثانيه بعد مامد اخوي ايده وحسيت بضيجة اكثر لدرجة اني ما روم اتنفس من ضيجيتي
شو اسوي لا تهملون موضوعي لاني حاسه اني بتخبل محد واقف وياي لا اخو ولا صديق ولا ام ولا ابوا
اللي عندها حل تسدحه واللي ماعندها تدعيلي من قلبها ان ربي يسرلي اموري ويفرجها علي .gif "12 (46)")
ع فكره صليت 3 مرات وما ارتحت لا تقولولي استخيري وصفي قلبج لاني اسوي هالشي واضيج
ربي يفرج ضيقتج ويفتح لج أبواب
الفرج يارب
ليششِ اهلجِ جييي !!
تمي استخيريِ واستخيريِ عسى ربيِ يووفقجِ فدنيآآ‘جِ ><
وحاولي ترضييين اهلجِ ..
ونصييييحه نصيييحه : كملي درآآآآآآآآستج رديلها مره ثآنيه
ماشي بينفعجِ غيرررهاِ
والله يفرج هممممجِ ..
غاليتي 
أول شي أوصيج اتردين تكملين دراستـــج ..
شوفي لج جامعـة أو كلية مب مختلطـة
وردي كملي دراستج واشغلي عقلج بالعلم
وثاني شي أختي استخيري بعد زيادة ^_^
وصفي ذهنـج من ناحية ريلج
أحسج وايد شالـة في خاطرج منه عشان جي ما استويتي تقدرينـه..
طلعي كل المشاعر السلبية الي فداخلج
وقولي يارب العالمين أنا سامحته عن كل شي وأنا ببدأ صفحـة جديدة وفرصـة يديدة
وان شاء الله ما بخيب ^_^
اكتبي رسالـة لريلـج
اشرحي له كل الي كان يزعلج منه وكل التصرفات الي جرحتج أو أحرجتج
بس اكتبيها بطريقـة حلوة ومتناسقـة عسب يكمل الرسالـة وما يملها ^_^
بس خبريه في الأخير انج سامحتيه
ومستعدة تبدئين صفحـة يديدة معاه
بشرط يساعدج على التغيير ويحاول
واذا استصعب عليه يشاورج ويطلب مساعدتج
وخبريه انج حرمتـه وبتوقفين معاه في أي شي بمصلحتـه
ولا تيأسيين أختي ياما رياييل أخس بوايد انصلحوا
رب العالمين كريم
بس انتي اصلحي بينج وبينه بنيـة التسامح والأجر ونيـة رضى الزوج والمحافظـة على الزواج ^_^
وصلي قيام الليل اختي واطلبي من رب العالمين العون
وداومي على الاستغفار لإنه يطهر النفس أختي
واصبري واحتسبي وما بتخيبين ان شاء الله
.gif "12 (15)")
مايخلوني اكمل يقولون لي ماتدرسين ولا اداومين الا يوم تعرسينتعبت من كثر ما اروح لاهلي وارمسهم وافهمهم
يسوون روحهم وياي ويزقرون اخواني وينازعوني لاني ارمس معاهم
شو اسوي
ع فكره انا بروح المحكمه ع اساس اني بتشرط
انا فكرت اقولهم اني مغصوبه وان الزواج اللي ايي يالغصب باطل
ولا اتشرط عليه لي ما يعيز شو اسوي؟؟
ربـــي يعيــــنج الغاليـــه و يفـــرج همــــــج ويســــرلــج أموورج ,,,,
قال الله تعالى :
"فقلت استغفروا ربكم إنه كان غفاراً يرسل السماء عليكم مدرَاراً ويمددكم بأموال وبنين ويجعل لكم جنات ويجعل لكم انهاراً" …….
قال الرسول صلى الله عليه وسلم :-
(من أكثر الإستغفار جعل الله له من كل هم فرجا ومن كل ضيق مخرجا و رزقه من حيث لا يحتسب)…….
سلااااحج غاليــــتي ….
1- الدعاء …
2- الاستغفـــــار ….
* حاولـــي إدوريــــن فـــي الشخـــص إجاابيــــه تغطـــي ع سلبيــــاته و إن شـــاء الله بتحصلــــين
اللهـــم أعنا على ذكـــرك و شكرك وحســن عبادتـــك