مشكلتي اللي مريت بها مشكلة معروفة تمر بها فتيات كثيرات ويقعن ضحايا الحب والنصب بإسم الحب
في أيام الكلية تعرفت على شخص وعشت معاه قصة حب وأوهمني بالحب والزواج وأنا صدقته وعشت معاه الأحلام الوردية اللي كل بنت تعيشها.
بعد ما خلصت الكلية سويت لي مشروع بسيط أترزق منه لأن ما كنت حاطة في بالي أشتغل وحسيت الولد بدأ يلمح للفلوس لما بديت أربح وكان يطلب مني فلوس على أساس أنه ظروفه صعبة ولازم أوقف معاه عسب أساعده.
أنا كنت على عماي أعطيه بالهبل أي شي أحصله من تجارتي كنت أعطيه كان يقولي انا بفتح لج محل عسب تطورين البزنس مالج وكان ياخذ مني كل شهر مبلغ للمحل وأنا كنت على نياتي ومع أني كان عندي البزنس مالي بس ما ياه على بالي أسأله عن رخصة المحل وهالأمور تعرفون الحب أعمى للأسف.
لين ما يت اللحظة اللي قالي فيها انا باخذ بضاعة حق محلج وعقب فترة قال البضاعة مادري شو صار فيها وأنا أحين متوهق وكلام من هالقبيل وطبعا سالفة المحل والبضاعة كله كان خرط وكذب حسبي الله عليه!!
أنا حسيت بالذنب قلت لازم أساعده ورحت سحبت تحويشتي وعطيته إياها بدون أي اوراق ثبوتية شل الفلوس عني ركض كان فرحان أنا حسيت بقرصة فقلبي مادري ليش
عقب كمن يوم قالي بسافر و أنا ما ياه على بالي أسال نفسي كيف يسافر وهو متوهق بديون ومادري شنو و سافر مال شهرين وأنا حالتي الله العالم بها لا فلوس ولا شي بعت كل ذهبي عسب أمشي أموري وكنت واصلة حدي وهو بتصل يسلم علي و لما خبرته أني بعت الذهب كان يقولي كلام مثل فديتج لا تحاتين بعوضج أنا و أنتي ما قصرتي وياي وكلام من هالقبيل
عقب ما رد من السفر تقابلت وياه في الكوفي وبدون ما يحس سرقت البلاك بيري ماله لأن تكرمون سار الحمام و أنا شليته وسرت الحمام و على أساس أنه انسرق التلفون وما قدر يحصله
في البيت نبشت وحصلت نك نيم حرمة حاطة صورة ياهل نفس الياهل اللي هو يحط صورته و كان يقول هذا ولد أختي
كلمت الحرمة قلت لها مرحبا جان تقولي مرحبا حبيبي وينك تأخرت انا مجهزة لك العشا!!!
مني عرفت أنها زوجته لأن سحبت منها رمسة و قلت لها أنا وحدة أعرف ريلج كيف هو يقولي أنا عزوبي وحزتها ما كان يهمني لو بيته اخترب جان أفر تلفونه و أكسره وهو عرف الموضوع وتضارب وياي وصلت فيه لدرجة التهديد وصارت مشاكل واايد لين ما طلعته من حياتي و لا طالبت بفلوسي و لا اي حاجة
هالقصة مر عليها 3 سنوات بس لليوم أنا أتجرع مرارتها لأن صرت أكره الرياييل وما أتقبل أي ريال يتقرب مني
أنا حاليا موظفة الحمد لله والبزنس خلاص ودرته من عقب اللي صار وأموري طيبة وكل شي بس شبح الماضي مب قادرة أنساه
نهب فلوسي قلبي ومشاعري وأنا حبيته وضحيت عشانه وسويت كل شي بس للأسف ما كان يستاهل
أنا أتمنى تكون لي أسرتي الخاصة بس خوفي من تلقي أي صدمة خلاني أرفض أي حد يتقدم لي
رغبة الانتقام للحين فيني أحاول أدفنها بس مب قادرة لأني حاطة في بالي أنه حقي لازم يرجع لي لان حقي بيظل دين في رقبته لين يوم الدين
لما أسمع خبر زواج أي وحدة أحس شوي بالغيرة وأقول بيني وبين نفسي حظها بتعرس ما خسرت فلوس بتحصل مهر ومخاسر وكل شي وأنا تحويشة تجارتي ضيعتها على واحد حقير ما يسوى قاع نعالي وانتو بكرامة
فضفضت لكم قصتي وآتمنى تساعدوني وترشدوني للصواب
اعرف انج خلاص تعلمتي من غلطتج وانج بالاساس غلطانه كيف تأمنين ع واااحد مثله …
عزيزتي حتى لو طالبتي بفلوسج ماشي دليل ..ماعندج دليل …وحتى لو رفعتي عليه قضيه …بتنفضح سالفتج ..الله ستر عليج كل هل السنوات …
تحسبي عليه والله يمهل ولا يهمل …وانتي حاولي تنسين ..وكلي امرج لله ولا تنتقمين ولا شي ..وتوبي لله ماترجعين للماضي واذا تقدم لج شخص اسألي عنه وتوكلي ع الله …
من وجهة نظري …هذا مب ريال اساسا
تشغلين عمرج فيه و يخرب حياتج …اكثر …ليش ؟
توبي لربج …و ادعي ربج
انه يرزقج بريال تشعرين معاه بمعني الرجوله
تتكلين و تعتمدين عليه و يعوضج
اختي العمر يركض …لا تخلين هذا الاحساس بالخيانه يسيطر عليج
و الله يهدي الجميع
هذا جزاه عند رب العالمين رددى حسبي الله ونعم الوكيل
ووكلى امرج كله لله وانتى مؤمنه كامل الايمان ان احقج عند رب العالمين
بياخذه عاجلا او اجلا ….
وعيشى حياتج لا توقفيهاا علشان حد تزوجى وبتحبي ريلج عقب
الزواج وان شاء الله ربي يرزقج الذريه الى تنسيج هموم الدنيا…….
الله يعوضك حبيبتي بلي احسن منه و هو الله يسامحه
بس صدقيني الدنيا تلف و تدور ما تدرين شو ممكن يصير فيه
حسبي الله على كل ظالم
وبخصوص موضوعجزكل ما تذكرينه قولي حسبي الله ونعم الوكيل
ربج ينتقم منه
غيري رقمج وعيشي لنفسج واذا تقدملج حد وافقي واستري على عمرج
الله يوفقج و يوفقنا