على أساس ماشي نظره بس صاااار !!

وهذا إلي صار .. يعني فاجأوني و لو كنت أعرف إنه السالفه جي كنت دلعت عمري آخر دلع خخخخ

أنا كنت عاد نازله ويالسه أنا وخواتي في الصاله الصغيره داخل ميلس الحريم ويا خواته
وأمي وعمتي " ربيعة أمي " وبنتها وحرمة عمي كانن داخل الميلس نفسه بس الأساسي ويا الحريم

فجأه دخلت علينا بنت عمتي وقالت :
" شيخه تعالي المعرس يبا يشوفج "

فجيت عيني على هااااااااااااالكبر ومن الإرتباك قلتلها بدون إحساس :
" ما اتفقنا على جي "

حسيت عقبها إنه العيون كلها تصوبت عليه وخواته تمن يطالعني ويتبسمن تفشلت صراحه ومادري كيف كل شي عقب صار بسرعه بسرعه

طلعنا الميلس أنا وأخته العوده وبنت عمتي وكانن هناك يدته وأمه وعماته ثلاث وخالاته هنتين وأمه بالرضاع وأمي وحرمة عمي وعمتي
عقب أخويه دق الباب عسب يدخل المعرس وهنيه عاد خفت صدق حتى بغيت أشرد بس أخته ضحكت وقالت :
" وين تبين خلاص ماشي فكه " ههههه

وأول مادخل سلم عالكل من بعيد عقب قالوله هذي فلانه .. ومادريبه شو قال يمكن قال السلام عليج أو شحالج أو شي جي من الرهببببه ما سمعته لأنه قلبي تم طووول الوقت يدق طرباخ طرباخ طرباخ

أنا تحريته بيشوفني ثواني من عالباب وبيظهر لا الحبيب دخل وقربوه وتم يسأل عن الأحوال يمكن حول عشر دقايق يسمع يدته يوم تمدحني كانت عيني طوووول الوقت تحت بس شفته بطرف عيني وهو يطالعني حتا ماشفت شكله عدل ياغير لمحات بسيطه
وهو الحياه عنده حلوه وأنا مااااشي صااااااااخه و أترااااقل

عقب عمته قالتله :
" فلان شكلها اليلسه عيبتك "
أونه :
" زين جي خليت بنتنا تستحي " ومن هالرمسه ( انزين مب جدامه )

عقب ظهر من عدنا وسار عند الرياييل والحمدلله ماطول أكثر بعد لأنه لو طول زياده عادي كنت دخت جدامهم من الإرتباك

المهم ساروا من عدنا عقب مااتفقوا الرياييل وحددوا كل شي

وقبل مايسيرون أخته خذتني عصوب وقالتلي فلان يبا يرمسج فالتيلفون عادي أعطيه رقمج
بدون تفكير صرخت :
" لااا "
حسيت البنت انصدمت بس تمت تضحك قالت :
" خلاص خلاص ما يحتاي " وتمت تضحك

ويوم فهمتها وجهة نظري اقتنعت فيها وأيدت موقفي وسمعتني مديح غاااوي وجان اتشقــــــق خخخخ

( تبن الصراحه ماطاوعتني نفسي أرمسه ونحن مافيه بينا لا عقد ولا شي اللهم بس خطوبه مابغيت أندم إذا صار شي عقب أو انفصلنا )

الحمدلله بفضل الله ودعائكن معاي يا خواتي الله تمم الموضوع وألحين باقي بس نشهر الخطوبه ونسير نتمم باجي الأمور الرسميه عسب نملج

ادعولي بنات إن الله يتمم الزواج على خير وما يشمت حد فيني

الله يوفجكن كلللللكن وعقبال كل بنت و ربي إيسر أموركن يااااااااارب