جميع المدارس والروضات ودور الحضانة فتحت ابوابها لاستقبال طلابها العائدين بعد اجازة الصيف..
لكن محورنا في هذه القصة عن مدارس البنات..دعونا ندخل هذه الابواب ونشاركهن في اسرارهن وهمومهن اليوميه ان صح التعبير…
الساعة الآن السابعة والنصف يعني باقي نصف ساعة ويبدأ الدوام الرسمي…في هذه اللحظه لا تسمع سوا الضحك والقبلات وكلمات الشوق والعتب بينهن . كنت واقفه انتظربنت عمي الي طلبت مني اني انتظرها بجوار احد الصفوف…وفي هذا الوقت اسمع صوت يدوي في ارجاء المدرسة….
___:منوووووووووووووووووووور
مناير تلتفت الى مصدر الصوت: هلا والله بمريومي
مريم: اهلين فيج …شحالج عمري
مناير: بخير ربي يسلمج
مريم: شو بلاج واقفه هنيه
مناير:ولا شي…بس قاعده اتريا حصوه بنت خالتي وهذيه يت الحين
حصه: السلام عليكم
مناير ومريم..: وعليكم السلام ورحمه…
حصه : شحالج مريوم ..ما شاء الله متنتي
مريم:حرام عليج عاد ..صار لي 3 شهور على الدايت اليديد وتقولي لي متنت……
مناير: واضح ما شاء الله….يعني مول ما جنه امس يايه بيتنا وطايفه عصحون كلها.
مريم: الله واكبر عليج…يا حليلي ما اكلت غير 7 صحون كيك وحله محشي وسبع سندويجات و3 صحون كشري..
حصه: خير كل هذا كلتيه
مريم: ليش شو قالوا لج جازورا
حصه: لا والله محشوم جازورا
مريم: ههههه….صج ما تستحين
مريم: ..انزين منور وينج ما ركبتي الباص اليوم
مناير: بس جيه قلت ايي مع اخوي
مريم: منوه فهووود.
مناير: هيه ..كان ناوي يروح الدوام وقلت له ياخذني معاه
مريم: عيل برد وياكم اليوم دامه بردج
مناير: اممممممم….بفكر اخذج
مريم: ويا ويهج…اصلا من قال اني بروح
مناير: على ماما يا بابا
مريم: ههههه…اقولج ترى انا عندي سيارتي الخاصه يعني اروح وارجع فيها وفي الوقت الي ابغي
مناير: هههه..هيه ما شاء الله ….وعسب جيه كنتي راكبه الباص اليوم
مريم: هيه حبيبتي ترى مهما كان انا اخاف على مشاعركم.وبصراحه انا فكرت وايد باهاليكم قبل لاركب السياره..يعني حرام باجر تشوفوني اسوق سيارة جدامكم وانتوا ما تقدرون تسوقون
مناير: لا والله فيج الخير وزين ما تسوين وخصوصا ان بنات اليوم (عافني الله) مره حسودات.
مريم: هيه فديتج عاد انا ما حبيت اسوي حساسيه
مناير: بسج لاه ..عاد قلنا تجذبين بس عاد بسج
مريم: ههه..انزين كل يوم تعالي
مناير: قولي والله ..انزين اكيد كل يوم بيي
وفي هاللحظات يدق الجرس معلنا بدايه عام دراسي جديد …..
مناير: دق جرس الحصه الاولى
مريم: سبحان الله..والله على بالي هذا جرس الهده
منايير: لا والله انزين انتي دومج مغوره يعني عادي احصلج الحين تركضين صوب باب المدرسه…
مريم..يلا عاد مال اول يركضون….انا الحين كبرت على هالسوالف
حصوه..هههه انتي كبرتي…هيه ما شاء الله زين عيل يا الكبيرة قومي نلحق الحصه الاولى قبل ليكتبونا غياب
مريوم: يلا انزين وراي
مناير وحصه يطالعون بعض ويضحكون: تفضلي طال عمرج
مريم: احم ..احم..حصوص يودي
حصه: ايود شوه؟
مريم..جنطتي لاه
حصه..روحي زين..وايد عطيناج ويهه يلا جدامي…
مريم..ههههه..يلاا انزين
( خلني اعرفكم على هالثلاث شخصيات ألي من خلالها راح تكتشفون معنى الصداقه الحقيقيه ..مناير كانت بنت قمه في الروعه والجمال والادب كانت بنت متفهمه ومتعاونه وكل البنات يحبونها. حصه تصير بنت خالت مناير وكانت بنت حبوبه وطيبه وكانت بمثابه اخت لمناير، مريم..بنت راعيه سوالف وغشمرجيه درجه اولى وهي اعز صديقه لمناير.)
في غرفه الصف…..
الكل قاعد في كرسيه الذي اعتاد الجلوس فيه خلال السنه الماضية حيث ان هذه السنه تعتبر السنه الاخيرة لمناير ورفيقاتها..
تدخل شله مناير الصف وتتقدمهم مريم..
مريم: السلام عليكم يا جماعه
البنات: وعليكم السلام ورحمه..
تناظر مريم لاول طاوله امام الباب وكانت تقعد فيه سعاد (سعاد تصيربنت خاله مريم وهي بنت طيوبه ونقدر نعتبرها وحده من شله مناير )
مريم: اللهم يا كافي انا ما تصبحت ألا بويهج ..لا بالله رسبت هالسنه.
سعاد: ههه يا الله ما عليه …تراج متعوده
مريم: اييه شو بعد متعوده هذي…..فديت عمرج انا طالعه الاولى عالمنطقه
سعاد: لاا فهذي ما جذبتي ..انتي فعلا دايما الاولى…اول وحده تدخل الكافتيريا هي انتي.
مناير: عنبوه لا يكون انتي الطباخه بالكافتيريا.
حصه: انا اشوف مريوم تيب وياها بصل اول ما اتي الصبح…ياخي اثاريها السالفه جيه..
مريم: بس خلاص خلصتوا رمسه.
سعاد: هاه حبيبتي منور حابه تقولين شي قبل لنختم.
مناير…امممممممم..لا والله بس مريوم انا تراني خاطري ب لزانيا…عفيه سويها اليوم.
مريم: افاا عليج .حاضر…هب عليكم امشوا جدامي اجوف.
تمشي مناير متجهه الى كرسيها ..كانت مناير تقعد ورا سعاد ومريم. وكانت حصه تقعد حذالها.
في هاللحظه تدخل نورة(بنت دلوعه وغنيه وشايفه حالها على الكل)..
تدخل وهي تطالع بويوه البنات وراسها مرفوع لفوق(اونه خقه)..طبعا ما تسوي سالفه وتتجهه لكرسيها…كانت تقعد في الكرسي الاول مجابل المدرسة.
مريم: اقول سعاد..اجوف لسانج..
سعاد اطلع لسانها لمريم وجنها فاهمه مقصد مريم.
مريم: دامه السانج ما كلاه القطو ليش ما تسلمين..
سعاد: والله ياخي انا ما اقدر اسلم….اتعب
نوره: وانتي الصاجه انا ما اسلم على هالاشكال.
مريم: ..ليش بلاها هالاشكال يا حضره البرنسيسه.؟
نورة: ما راح ارد عليج…وبليز لا تحاولين تطالعين فوق
مريم: عشتوووو……..واااع والله ما لايق عليج الدلع..اقول عدال على رقبتج عن تنكسر.
وفي هاللحظه تدخل رشا………….وأي رشا ( رشا البويه…اعتقد فاهمين قصدي..)
رشا..: السلام عليك يا شباب
مريم: منو الشباب……..!!!
رشا : سوري ليديز ..عبالي داشه عربعي..
مريم..امممممم..حصل خير
رشا توجهه نظرها الى سعاد
رشا : شحالك يا حلو يا بوعيونا انعاس.
سعاد:بصراحه مب بخير دامني شفتج.
رشا: تقصدين شفتك..اممم مقبوله منج …والله انج عذاب
سعاد: دخيلج حلي عن سماي
رشا: هم بعد مقبوله…بس مردج لي..
مريم تقاطع رشا وتسألها: اقول رشا شفايفج صايرين حمر…انتي محطيه روج؟
رشا…: تخسي…الحين انا احط روج…( بعصبيه) سحبيها بسرعه احسن لج
مريم تحاول تبتسم وترطب الجو: هاها ها…سعاد شو بلاج ضحكي..ترى انا كنت قاعدة اتغشمر وبس.
سعاد بتصنع: ها ها ها…
رشا: لا المره اليايه لا تتغشمرين فهالسوالف…بس انا راح اسامحج بس مو عشان خاطر عيونج…بس عشان الحلو ألي صوبج.
مريم: مشكوره حبيبتي….ووالله ما اعيدها
رشا و هي تطالع سعاد.: جاو حبي
سعاد تبتسم مره ثانيه بتصنع واضح.: جاو
وتروح رشا لكرسيها( وطبعا ما لازم اقول وين..اكيد عارفينه( الاخير))
مريم: اففف..زين ما كلتني
سعاد: سكتي يا مريم هالبنت صايره تلوع جبدي…ياخي غصب تقردني.
مريم: الله …. والله لا يقين على بعض
سعاد: وع والله ولا يشرفني
مريم: بس رشوه تمووووووووووووت فيج
سعاد: بتسكتين ولأ اعطيج بهالمقلمه.
مريم.. بسكت ألحين عسب الابله يايه و بكمل هالموضوع بعدين
سعاد: هههه…( تضحك بتصنع)..اييي أي موضوع…فكيها سيره
مريم: اوكي بعدين بنتكلم..
تدخل ابله عزه..( استاذه مادة الرياضيات …مصريه الجنسيه ومتزوجه من اماراتي وصار لها 10سنوات في الدوله)
ابله عزة: السلام عليكووو يا بنات
البنات: وعليكم السلام.
ابله عزة: بسم الله ما شاء الله…انتوا اكبرتو ولأ اييه..
مريم: هيه ابله ما تشوفين راس نوره واصل السقف.
يضحكون البنات على تعليق مريم
نوره طبعا اكتفت برفع راسها زياده( انا ما عارفه هالبنت وين ناويه توصل راسها)
ابله عزه( وهي تحاول جاهده التكلم باللهجه الاماراتيه): شو علامكو لا يكون ناوين تضاربون جدامي ألحين
سعاد: لا ابله بس تدرين مريم وسولفها
مريم: هيه والله ابله.تدرين انا تراني قاعدة اهيئ نفسيه الطالبات لدراسه
ابله عزة:زين والله ..هاه بنات شو اخباركو؟ عساكم جاهزين لدراسه ترا انا راح اصك عليكم شويه هالسنه…عاد انتو استحملو دامكم تبون تنجحون
مريم بصوت لا تكاد تسمعه الابله: ليش انتي بعدج ما طفرتينا؟؟ شو ناقص تسوينه وما سويتيه.
تضحك سعاد على تعليق مريم
ابله عزة: ها يا سعاد بديتي الصحج مالج…
سعاد: والله ما مني يا ابله بس انا تذكرت موقف يضحك
ابله عزه: طب بلاش تزكرينه الحين مو وقت تزكرين مواقفج الحلوه
سعاد: آسفه ابله..
في هاللحظه يصدر صوب لشخص يتثاوب ….
ابله عزة: اييه يا رشا …هذي حركه تسوينها
رشا: يعني شو تبيني اسوي..واحد ما صار له راقد غير 3 ساعات شو تبينه يشوي.
ابله عزه: وليه ما نمتي حضرتك وبعدين شو هذي واحد..قولي وحده
رشا بلامبالاه: شخبارج انتي بخير؟
ابله عزة: اعقلي يا رشا وبسج رمسه مب زينه
رشا: انزين يلا آسفه
ابله عزة: هذي المره سماح …يلا بنات طلعوا كتبكم
رشا..هوب هوب هوب…استهدي بعدنا اول يوم وما خذنا الكتب
ابله عزة: يا ربي …حصه سيري الاداره وسأليهم متى بتاخزن الكتب.
مريم: انشا الله ابله
يتبع…………
——————————————————————————–
الجزء الثاني…..
تطلع حصة من الصف وتبدأ ابله عزة تراجع بعض الدروس القديمه..
مريم: اوهوووووووو…والله حاله
سعاد: شو بلاج بعد
مريم: سعادوووه ابغي افهم نحن نجحنا ولأ لا ؟
سعاد.: ليش!!!!!!!!!!
مريم: الحين هذي ليش قاعدة تعيد ألي خذناه…نحن ما صدقنا افتكينا
سعاد: التكرار يعلم الشطار
مريم: سكتي سكتي دخيلج
ابله عزه: مريم…اووومي وامسحي الصبوره
مريم حاااااضر ابله
سعاد: حتى المسح يعلم الشطار..خخخخخ
المهم تمر الحصه الاولى والثانيه مع ابله عزه..والثالثه مع ابله فريال مدرسه العربي….وصارت الحين حزت الفسحه(الفرصه)
مريم: الله خاطري بفلافل
سعاد: وانا خاطري بفطاير جبن.
حصه: انا بصراحه ما فيني شده اضارب فالمقصف..
سعاد: على طاري الضرابه ..وين آيات بنت حاج مرسي..محد ينقذنا غيرها
مريم: آيااااات! عاد هذي ما تسير الا لما تبطينها ابيزات
حصه ما مشكله المهم برستيجنا
مريم: خفي علينا يا ام البرستيج..وانتي مناير غريبه ما قلتي شي
مناير: لا والله ما خاطري آكل اليوم.
مريم: افااا والله ..كيف جيه…لا لا لا لازم تاكلين ولأ بزعل
مناير: مريوم حبيبتي والله مالي خاطر
مريم: لا يكون ما يايبه بيزاتج
مناير: لا يايبه وبعدين حتى لو ما كنت يايبه اكيد بخذ عنج..بس انا مب يوعانه
مريم: عاد ألي يقول ألحين انا بعطيج من بيزاتي…خخ
مناير: لا والله
مريم: فديتج والله اتغشمر وياج..
_ _ _: السلام عليكووووووووووووووو
مريم: بسم الله زيغتينا…حشا طيرتي حمامه قلوبنا
سعاد: هلا آيات …ما شاء الله يايه على الطاري
مريم: لو طارين مليون زين
آيات: خخخخ…عاد انا أًََُلت لازم اشوف البنات الحلوين عايزين ايييه؟ يعني ممكن عايزيني فخدمه ولأ حاجه!
مريم: هيه ما شاء الله خدماتج ما تطلع ألا بالفرصه وبالامتحانات ابد ما تعرفينا.
آيات..هههه لأه انا فالخدمه فأي وقت..بس فالامتحان بكون مزنوأه أوي
مريم: هيه قصي علي…….
آيات: لأ السنه دي غير كل سنه ….انشاء الله حنتساعد ونجيب مجموع كويس….ألا مألتوليش انتو عوزين حاجه من المقصف…أصلي انا رايحه دلوأتي.
..
مريم: يودي هذي بيزاتنا…واشتري لنا 3 فلافل و3 جبن ولا تنسين البيبسي..
مريم: هاه مناير ما بتغيرين رايج
مناير: لا والله ما ابغي ..
آيات: طب انا رايحه وان شاء الله مش راح اتأخر..يلا باي
المهم قعدوا البنات على كرسي فحديقه المدرسه وكل وحده منهم تسولف عن موديلات البنات اليديده و الجنط والاكسسوارات المدرسيه.
وفي هالاثناء كانت سميرة تقترب منهم (سميرة بنت لعوب وعندها سمعه مب طيبه بين البنات…
مريم لاحظت سميرة يايه صوبهم
مريم: اللهم يا كافي ….لا يكون هذي يايه جدانا
سعاد: مستحيل…وحتى لو يت ..منو بترمس منا؟..لا لا نحن مب مال هالاشكال..
سميرة:هااااي
مريم بكل استغراب: نعم!!!!!
طبعا سميره ما سوت لمريم سالفه …
سميرة: لو سمحتي حصه يمكن اتين شوي معاي…بغيتج بسالفه
فهاللحظه بان الارتباك على حصه…والكل مستغرب بس ألي زاد استغرابهم ان حصه قامت من كرسيها ومسكت سميرة من ايدها و سارت معاها وهي تحاول تمشي بسرعه كانها تبغي تختفي عن الانظار……..
يا ترى شدخل سميرة اللعوب بحصه البنت الهاديه…اكيد في سر…
يتبع
الجزء الثالث..
حصه كانت تتحاشى نظرات البنات لها لما كانت تمشي مع سميره ..كانت تحاول تبعد نفسها عن البنات…شكلها ما كانت تبغي احد يشوفها مع سميره خصوصا ان سميره سمعتها شينه بين البنات..
سميره: اشبلاج اشوي اشوي علي..
حصه: انا ما قلت لج لا اتين عندي بالمدرسه.
سميره: ليش خايفه من رمست البنات.
حصه: قولي لي في شي..
سميره: شوي شوي علي يا حلوة…ما في الا كل خير
كانت عيون الشلة على حصة وسميره الكل يحاول يستوعب
مريم.: من متى سميره تعرف حصه!!!
مناير : ما ادري ما قالت لي عنها طوول
سعاد : يمكن بتقردنها!
مريم: حصوه ترا تفسيرج مثل ويهج..يالله ابا اعرف السالفه الحين
سعاد: اكيد يوم بترد بتقول لنا
مريم : ويييع شكل سميره من بعيد يلوع بالجبد ما ادري كيف مجابلتنها حصه
سعاد وهي تضحك: شووفوو شو تفكر
مناير : حرام عليج مريوم مب زين
مريم تطالع مناير: فديت منورتي الحساسه.. صدقيني انا بدونج عادي ماخذه اثام الدنيا كلها من كثر ما احش فالخلق
سعاد وهي تضحك: ليش تم حد بعد ما حشيتي فيه
مريم ((تطالع سعاد بخبث)): بصراحه … هي انتي هع
سعاد..ههه قصورج بعد ترمسين عني
مريم:مناير !!! تذكرين سعاد يوم عرس اخوها يوم طاحت!
سعاد: غربلات بليسج انا بروحي متعقده من ذاك اليوم
مريم وهي تضحك..: فديتج والله على هذيج الطيحة لازم تلعبين كوره (( باك ورد)) فالمنتخب
سعاد : وانتي شكلج بتحصلين كف الحين..
مريم تحضن سعاد: فديتها سعاادي ما ارضى عليها..مناير لو يبتي طاري الطيحة مره ثانيه ترا ما بتشوفين خير
مناير: لا والله وانا شلي ههههه
مريم: نعود لمحور حديثيا
مناير: يمكن تبغيها تساعدها بالدراسه!
مريم:يا ساتر على التحليل..الحين سميره وين والدراسه وين
سعاد: هذي لو ما يابت دور ثاني ما ترتاح..
مريم: اكيد في شي……….وشي جايد بعد
سعاد:هاه التحري كونان…شو الاخبار؟
تقوم مريم من كرسيها
.
مريم : بلحقهم
مناير: شو تلحقينهم انتي الثانيه…بالله عليج شبتقول عنا حصه..قاعدين انراقبها.!!!.
سعاد: هيه وبعدين بتزعل علينا…..
مناير: وهي بالاساس اذا تبغينا نعرف اكيد بتقول لنا…..يمكن في شي خاص بينهم..
مريم: مناير حبيبتي ..هالاشكال انا اعرفها..ماتي وراها غير المصايب….
سعاد: بس خلاص سكتوا هذيه حصوه يايه
طبعا ويهه حصه كان معتفس عفسه وباين عليها الارتباك كانها خايفه انها تنسأل ..
سعاد: حصوه شسالفه؟اشتبغيج هذي..
حصه: هااهه..ولا شي
مريم: كيف يعني ولاشي. في اشياء يديده قاعده تصير….مو من عوايدج ما تخبرين احد
حصه: قلت لج ولا شي..بس هي بغتني بسالفه خاصه
مريم: ومن متى بينكم سوالف خاصه.؟
حصه..افففف اشفيج انتي ..شو هو تحقيق!
شكلها حصه ما قدرت تتحمل اسئله مريم ألي ما منها مفر وشلت بعمرها وقامت..
مناير…: حصه وين سايره
حصه: بروح الحمام (( عزكم الله)),,,يلا بشوفكم بعدين
سعاد: الله يخسج يا مريوم طفرتي البنت
مريم: اشبلاكم علي ..يعني كيف ما تبوني احاتيها…انا بصراحه ما مستلطفه هالسميره نهائيا..
سعاد: حتى نحن يا مريم…بس عاد انتي طفرتي بالبنت
مريم: اوووووه ..خلاص خلنا نسير لها ..بس انا ما راح اعدي السالفه ..ولازم اعرف شصاير….
ترفع مريم ايدها لسما:الله يخسج يا سميره
سعاد: لهدرجه حاقده عالبنت
مريم: واكثر ……..هالبنت خبروني انا عنها.
سعاد: ليش صار شي بينكم..
مريم: مب انا……..(بعد تردد )…اختي منال
سعاد : مناااااااال؟
(منال اخت مريم الكبيره…تكبرها بسنتين .متزوجه من ولد عمها وعندها بنتين.حور وريان)
سعاد: ليش شصاير؟
مريم:سالفه طويله ..ومالي خاطر اقولها
سعاد: انزين مريوم قولي بعده في وقت.
مناير: سعاد….! اشفيج صايره ملقوفه
سعاد: انزين خلاص سكتنا.
مناير: المهم. انا بروح بسلم على ابله زينب (( مدرسه الاحياء))
مريم: يلا زين سلمي عليها قول لها مريووم تسلم عليج ووصيها علي …
مناير .. ان شاء الله يوصل
وفي غرفة المدرسات كانت ابله شيخة (42) تشكي عن همومها اليومية (( طبعا ابله شيخة مدرسه( ماده الكيميا )وما شاء الله عليها من ترمس ما تسكت..ابله زينب(مدرسة الاحياء-26) تجهز نفسها وتحضر لحصتها ..وابله جملات(مدرسة الكيما- مصرية)مجابله ابله شيخة وتشرب كلاااص شاي ((اد الدنيياااااااا)) كبير يعني
ابله شيخة: والله ما ادري شو اسوي بولدي عمور ..مب فالح بالدراسه مول
ابله جملات :بسم الله ما شاء الله هو عمرو سنه كم دلوقتي ؟
ابله شيخة: هذي اخر سنه ليه ان شاء الله..وشكله بيفضحني.. هياته من الصبح لين بالليل
ابله جملات: رصي عليه شويه يا شيخة ..ابأي زكري له كلمتين
ابله شيخة..انااااااااا……لالا وايد علي هالطميم اللي عندي
ابله زينت ترفع راسها من كلمة ((طميم))
ابله شيخة: هيه والله طميم..ما فالحات غير يتجحلن ويهذربن
ابله جملات: مش كلهم يا شيخة
ابله شيخة: ما عليج الساكت ناكت…هذيلاك اخس بعد
ابله جملات: ايه يا ابله شيخة واللاهي في بنات بسم الله ما شاء الله عليهم زي الفل
ابله شيخة: وانا شعلي منهم..فلحن ..ما فلحن انا شعلي الحمدالله الراتب نازل.. نازل
ابله زينت طبعا منقهرة من اسلوب ابله شيخة بس ما حبت ترد عليها لانها لو طاحت بلسانها مشكله..
بهاللحظه تدخل مناير
مناير ((طبعا بكل هدوي وادب) : السلام عليكم
ابله زينب وابله جملات: وعليكم السلام ..
ابله زينب هلا والله بمناير شحالج
مناير: بخير ابله شحالج انتي؟
ابله زينت: بخير فديتج
مناير: شخبارج ابله جملات
ابله جملات: الحمدالله يا بنتي..هااا الزي الهمة السنه دي؟
مناير : عال العال ان شاء الله..شخبارج ابله شيخة
ابله شيخة (( من دون نفس )) : بخير بخير
طبعا مناير متعوده على اسلوب ابله شيخة المهم تجدمت وراحت لابله زينت
مناير: ابله زينت تبيني اساعدج بشي
ابله زينت: مشكوره فديتج
مناير : ابله زينت ترا انتي علينا الحصة الرابعه
ابله زينب: هيه فديتج..عاد انا مشتاقة لصفكم
مناير: هيه ابله على طاري الصف .مريم تسلم عليج
ابله زينب ((وضحكة ترتسم على شفايفها كانها قاعده تذكر سوالف مريم)): الله يسلمها ان شاء الله
مناير: يلا ابلهانا رايحه تامرين على شي
ابله زينب: سلامتج والله يحفظج
تنزل مناير لرفيجاتها ويكملون سوالف فالساحه
مريم: ها سلمتي على ابله زينب
مناير هيه سلمت عليها
سعاد ما شفتي ابله شيخه
مريم تضحك: اقص ايدي اذا ما بوزت بويهج …صح .؟
مناير:ههههه هيه صح..اممم حصه مارجعت
سعاد: لا والله ما رجعت
مريم: يلا عيل قمنا ندور عليها
صوت آيات تنادي..
آيات..: اييه يا بنات رايحين فين…والأكل!
مريم:خلاص انسدت نفسي ما ابغي أكل
سعاد: افااا والله ما يصير
مريم: ولأ اقولج ييبيه..
سعاد: انا اقول بعد…
مريم: لا لا تقولين…لا تخليني اعصب وما اعطيج اكلج
سعاد: لا دخيلج انا حدي يوعاااااااااااانه…
آيات: طب خدوا الاكل بتاعكو ده وبالهنا والشفا
مناير : يلا بسرعه خلنا نلحق حصه
مريم: يلا انزين
وقبل ليسيرون وقفتهم آيات.
آيات: احم ..أصلي انا تعبت أوي وانا بجيب الاكل…اصلو زحمه أوي
مريم..ايووووو….تقصدين تبين بيزات؟ اسمحيلنا فديتج نسيناج
يودي هالخمس وبسج
آيات : متشكرين اوي…دلوقتي بالعافيه عليكو
مريم: يعني قبل ما كان بالعافيه علينا.
آيات: استغفر الله…بالعافيه عليكو..وانا اصلا ما كنتج عوزه فلوس منكو انا بس حبيت اقول لكم ازي الشغلانه دي صعبه..
مريم: لا حول لا يكون كنتي قاعده تبنين المقصف وانا ما ادري..
آيات: هههه.. دمك خفيف اوي..
مريم: انزين يلا فارجي….
وسارت الشله ادور على حصه..وقعدوا يدورونها فكل مكان ومالها أثر.
مناير: يا ربي هذي وين!..ما تم مكان ما دورنا فيه
سعاد: انزين وين اختفت.
فهالاثناء يدق جرس الحصه الرابعه..
مريم: اوهوو دق الجرس ونحن ما كلنا شي…………بس ابا اعرف وين سارت!
وفجأه ترفع سعاد ايدها وتنادي: حصه حصه تعالي نحن هنيه
مريم: وينها؟؟؟
سعاد: هكيه طالعه من الحمام.
مريم: بسم الله تونا طالعين من الحمام وزقرنا ومحد رد
مناير بصوت عالي: حصه يلا بسرعه تعالي الكلاس بيبدا
وصلت حصه لشله وكالعاده بدت مريم اسئلتها..
مريم: انتي وينج تونا دخلنا الحمام وما حصلنا حد.
حصه والارتباك واضح عليها: هاااه..توني كنت داخله..
مناير: انزين يلا نسير قبل لتبدا الحصه
مريم: والاكل شسوي به..
سعاد. ييبيه منحطه داخل الطاوله وبناكله لما الابله تعطينا ظهرها
مريم: لا والله…يعني كأني ما كنت اسويها قبل
سعاد: هيه والله نسيت انج انتي علمتيها لي..
مناير: يلا انزين تأخرنا…
مناير مع انها كانت بنت هاديه وكلامها قليل لكنها كانت اكثر وحده تحاتي حصه..هي ما تنكر انها تبغي تعرف السالفه بس فنفس الوقت حبت ان حصه أتي بروحها وتخبرها بلي صاير..خصوصا ان حصه ما تخبي على مناير شي….
طبعا الكل طالع على صفه ..ومريم وباجي بنات الشله رايحات صوب الصف..وفجاه تخطف عليهم بنت مسرعه (( حسستهم انها كومارو صح ..هع))..المهم طبعا مريم شويه وبزخ البنت من شيلتها وباجي البنات يضحكون
مريم: حشااا مب بنت رصاصة..وانا على بالي سباق ركض تحمست كنت بركض وياها ((طبعا مريم مبدعه في حصة الرياضة.. اسرع بنت فالفصل))
سعاد (وهي تضحك) :هههههه.. زين اني يودتج عيل
وهم يضحكوون على الموقف ..يت صوبهم ميثه (( بنت شرانيه (جارة حصة )وتستعر وايد من امها لانها هندية..طبعا ما تقول لحد هالشي بس حصة طبعا تعرف))
ميثة: يلا يلا على صفوفكن
مريم (باستهزاء ) : سعاد انتي تعرفيني عشان ترمسين وياي (( طبعا تقصد ميثه))
ميثة (( فهمتها طبعا)): شووو..علي صوتج يوم بترمسين
مريم: انتي ايييه ترمسيني
ميثة: اللي على راسه بطحه يحسس عليها
سعاد وحصة يحاولون يداركون الموضوع ويغيرون السالفه
سعاد يلا يا مريم تاخرنا
ميثه: يلا يلا من جدامي (تاشر بايدها كانها تقول يلا فارجن)
مريم (( طبعا شوطت)))..اييه انتي على بالج كل واحد بيسكت لج ..
حصة اطالع ميثه بنظره : ميثة اتوقع ماله داعي هالاسلوب ((ترفع حاجبها كانها تهددها بشي..)) ميثه انتبهت على حصة وسكتت
مريوم: عافانا الله الله لا يبلينا بنقص العقل
ميثة طبعا فولت ((وحطت مريم وحصه براسها خلاص))..
المهم تمر باقي الحصص ويدق جرس (( الهده))..
كل البنات طالعين من الصفوف ورايحين للباصات..الكل واقف ويسولف واللي بعده يسلم (( يهالسلام اللي ما يخلص فاول يوم …بس عادي وناسه))
وفوسط زحمه البنات..تطلع اصوات صريخ وزعيق بنات
سعاد: بسم الله شو صاير
مناير: لا حول الله شوصاير بعد
مريم: شكله من ذاك الصوب قومو نروح
مناير: افف انا ما احب هالسوالف
الكل رايح صوب الصريخ……(( ضرابة تايم))
طااخ طيخ طووخ..
مريم: انا قلت الضرابة هذي لازم وراها ناس هيلق
سعاد: مريووم منو اللي يضارب
مريم: هههه الله وناسه..
سعاد: منوو انزين
مريم: سميره وميثوه.. يعني منو هيلق غيرهن
حصة:ليش انزين!
مريم: مدري..هذي ايات بتخبرها…اياااااااات..
ايات : ايوه يا مريم .
مريم : شسالفه هالبقر..
ايات: والله البقر دوول عملين بيتضاربو
مريم: قولي والله انتي بس…. تحسسيني مرات اني عوره والله
سعاد: يعني على شوو يضاربون ؟؟
ايات: ااااه فهمت عليكي .. هم من اول ما اكوو هنه وهم عمالهم يضاربون
سعاد : انزين ليش
ايات: انا من اول ما شفتهم يضاربو وانا هنا وشفت كل حاجة وسمعت كمان
مريم: انزين على شو
ايات: البنات الي معايه بيقولو انه في حاجة
سعاد: انزين..
طبعا الكل يستمع ويتريا السبب
ايات: انا حاولت افهم الموضوع كله عشان اكون سامعه كل حاجة ومن مجميعوو
مريم: واكيد عرفتي ليش يضاربون
ايات : تصدقي بالله……معرفتش
مريم: واااي …..شكلي انا اللي بسوي ضرابه الحين…كل هذا واخرتها ما تعرفين
سعاد: ما تعرفين بعد …توكلي قبل لا مريم تنهد عليج هههه
مريم: منانير وين حصوه .؟
مناير: راحت عند ابله امنه (( تربيه اسلاميه )) يتسلم عليها وبتي
مريم: اهاااا,,,, انزين سعاد انتي راسج عوود ,, شغلي الارسال
سعاد: ويا راسج … شو قالوا لج (( اريل))..
مريم: شوفوا اذا السالفه ما فيها ولد قصوا يدي
سعاد: ما شاء الله فوزيه دريع ,,حللتيها ما شاء الله
مريم: شعبالج هالاشكال تضارب على شوه …
سعاد: مريوم هذي سلامه يايه ..ساليها
مريم تنادي على سلامه
مريم: سلاامه صوبنا
سلامه: هلا هلا يا حي الله الحلوين
سعاد: شحالج سلامه
سلامه: تمامه
مريوم : دووووووم يارب ..اقول سلامه شسمه ,,,
سلامه : شسمه؟
مريم: اقصد الضرابه اللي صايره
سلامه: هيه سميره وميثه
مريم: هيه .. شفيهم المخابيل
سلامه: هههههههه تبوني اقول لكم
مريم:شرايج يعني؟
سلامه : الصراحه انا سمعت البنات يرمسون ميثوه حاطه عينها على عزوز
سعاد: عزووووز؟؟ منو عزوز
سلامه: جارهم قوم سميره.. عاد سميره ميته عليه وهو ما مسوي لها سالفه..الله ياخده حلوووووو
مريم : هههه هيه والله الله ياخذه ما حبني
سعاد: مريوم سيري ضاربي وياهم .. يمكن عزوز يسمع عن السالفه ويحبج
مريم: ما نشاده…..والله ولا درا فيهن وهن يضارين ..اخرتها يضحك عليهن
مناير: روحي مريوم فتجي من بينهم هههه
مريم : افا عليج ناوليني الحصا بس …ابا حجم اكس لارج..
مناير: ههههههه هيه ونحن بنشرد عنج مالنا خص
مريم: ترا من بونج نذله هههههه .. بس ما عليج انا قدها ,, بروش وبأشر عليكم …يعني اونه م بانا
سعاد : لا والله عيل انا من الحين شارده هههه ,,,
صوت ايي من وراهم
____: يالبييييه على الضحكة
مريم بصوت خفيف: اخييييييييج رشووووه اللصقة
رشا: سعادي حياتي عسى الجنطه مب ثقيله عليج
مريم: يا ساااتر بعدنا ما استلمنا الكتب ..كيف ثقيله بعد؟
سعاد: لاااا مب ثقيله
رشا: ترا انا بالخدمه ..اي شي تبينه قولي لي
سعاد: اففف مابا شي
مريم: لالا تبين ((بسمه خبيثه))
سعاد تطالع مريم بنظره (( تعرف انها بتسوي لها مقلب)
مريم:امممم.. اصلا سعاد ما كلت اليوم مضاييقه
رشا : افااااااااااااااااااا…لا لا جيه ما يرضيني ..
سعاد: نعم نعم
رشا: اذا ما بتاكلين باكلج غصب ترا
مريم تحاول تمسك ضحكتها: هيه اكليها .. عنددج اياها
سعاد:ما عليه يا مريومووه انا اراويج
يتبع
الجزء الرابع
تدخل مناير البيت من بعد هذا اليوم المتعب
كانت ام مناير وابوها ينطرونها بالصاله ..تدخل مناير وتروح جدا ابوها وامها
مناير: السلام عليكم
ام وابومناير: وعليكم السلام ورحمه
تتقرب مناير وتبوس راس ابوها وامها..
ابو مناير: شحالج بنتي الحلوة
مناير:بخير وسهاله ابويه….
ام مناير: هاه حبيبتي شو دوامج اليوم؟
مناير…اممممممممم..زين
ام مناير: بس زين
مناير: تعب شوي…بس الحمد الله
ام مناير: يلا الله يقويج حبيبتي
ابو مناير: يلا يا بابا يا مناير قومي لبسي ملابسج.. ترنا بنسير بيت يدج العود…
مناير: ليش يدي رجع من السفر.؟ ليش ما خبرتوني!
ام مناير: البارحه الساعه وحده بالليل واصل وانتي حزتها كنتي نايمه وبالاساس يدج رجع قبل موعده باسبوع.
مناير: هيه صح انا جني سمعت انه بيي بعد اسبوع
ابو مناير: يلا يا مناير قومي و تزهبي بسرعه…
مناير: ان شاء الله
ام مناير: وبالمره قولي لاخوج فهد بسه قعده عالنت وخله يزهب بسرعه..
مناير: من عيوني يا امايه
تصعد مناير فوق وتسير غرفه فهد….ضحكت فهد كانت واصله لآخر الممر..شكله قاعد يرمس حد من ربعه ..تدق مناير الباب وتفتحه بهدوء..انتبه فهد لمناير وأشر لها تدخل وتصبر شوي…دخلت مناير بهدوء و قعدت عالشبريه تتريا اخوها يخلص….
فهد: خلاص انا بدش المنتدى باسم ثاني وبتمدح بموضوعك عدل..طبعا خبرك هالسوالف منتشره…
__:——-
فهد:ادري ان اسلوبي فريد ووجودي فصفحتك راح يروج لموضوعك..
__:——-
فهد: خخخخخخخخ….افا والله بالخدمه فأي وقت
__:——-
فهد: مو مشكله الشيخ بخليك ألحين…وان شاء الله برجع لك بوقت ثاني
__:——-
فهد : مع السلامه
يسكر فهد الخط ويصد صوب مناير:
فهد: هلا هلا بأختي الصغيره….هاه كم بنت عطيتيها رقمي!
مناير: اممممممممم …قول خمسين
فهد: الله…. يعني بتريا خمسين اتصال اليوم
مناير: هههه اقص عليك
فهد: لا والله!!!انزين ادري انج تقصين علي..
مناير: انزين فهود قوم تزهب عسب بنسير بيت يدي.
فهد: هيه صح نسيت انه اليوم الغدا هناك
مناير: انته من متى تعرف!
فهد : انا مساعه احمد ولد عمي عبدالله خبرني…وبعدين امي دقت لي وقالت لي
مناير: أهاااا…انزين يلا ابوي يقول بسرعه..
فهد..يلا بلبس وبنزل
مناير: خلاص بسير ألبس انا بعد…..
( خلوني اخبركم عن عايله مناير ….طبعا مثل ما شفتوا ان يد مناير كان مسافر..والسبب كان للعلاج…يعني يحليله ريله كانت تعوره وسافر يعالجها بالخارج …واليوم الكل معزوم فالبيت العود على سلامه الوالد …مناير مثل ما تعرفون كان عندها اخو واحد وهو فهد (21 سنه)وطبعا ما عندها خوات ،وعندها 3 عموم..(عمها عبدالله وهو اكبر اخوانه وعنده ثلاث اولاد محمد (24)واحمد (21) وحمد(12)، الثاني كان عمها سعيد وعنده ولد اسمه خالد (20)واربع بنات خوله(22اسما(17 )يعني قد مناير وشهد(12) وبتول(10)سنوات..وبعدين ابوها ( ناصر) وبعدها كان اصغر عمومتها منصور(22) ومب متزوج. ..
وفالبيت العود كان العم عبدالله واعياله وحرمته ام محمد اول الواصلين وطبعا ما انسى منصور ألي بعده يعيش مع ابوه وتوه راجع من السفر وقاعد يسولف لهم عن سفرته وياه…كان صوت الضحك والسوالف واصله لبرع البيت لما دخلت عايله ناصر(بو فهد) ….
ابو فهد: السلام عليكم يا جماعه الخير.
الكل : وعليكم السلام ..
منصور: هلا والله ..اسفرت ونورت واستهلت و…ما عرف بعد
حمد: ومطرت
منصور :وبحرت
حمد: لا عميه ومطرت
منصور : وضحكت
حمد: لا ومطرت…
منصور :واحفرت
عبدالله: بسك عاد خبلت فولدي…بروحه هب ناقص.
حمد: شو يعني ابويه انا خبله
عبدالله: لا حبيبي مب خبله.عمك الخبله
منصور: افااااا الحين انا الخبله..بس مقبوله منك يا رييس
فهد : هلا منصوروه.. شحالك.؟
منصور: هوب هوب…شو منصورووه انته الثاني بعد… قول عمي منصور يا الغبي..
فهد: منصووووووووووورووووووووه
مناير: هلا عمي منصور …شحالك؟
منصور: فديت والله بنت اخوي. ..(يأشر على فهد)..شوف الادب كيف صاير مب انته..
طبعا الكل قام عسب يسلم ..وقعد
(بو فهد): ألا ابوي وامي وين؟
منصور: ابوي وامي قاعدين يوزعون الصوغه..ما ادري هالشياب ليش مستعيلين..
فهد:خخخخ…شكلهم يبون الفكه منا بسرعه
بو فهد: عيل بسير اشوفه واسلم عليه..
منصور: لا هو قال بعد اشويه بنزل..
بو فهد: لا احسن اسيرله انا بروحي…..بو محمد ما بتسير وياي..!!!
بو محمد.. اكيد ياي……..يلا سرينا..
منصور: عيل نحن بنقعد نتريا هنيه
فهد: لا لا نحن بنسير ويا ابوي..
بو فهد.: لا لا تسير ..اقعد محلك
منصور…….أوووأ أوووأ…قفطووووه….يا خي شل ويهك عن اندوسه…
فهد: ها ها ها….اصلا ابوي ما يحب يتعب عياله…..
منصور: معلوووم رفيق…
المهم بو فهد وبو محمد ساروا حق ابوهم والباجين قعدوا فالصاله يسولفون..ام فهد مع ام محمد والشباب قعدوا يرمسون مع بعض ومعاهم مناير…طبعا مناير كانت من النوع الخجول وما كانت تسولف نهائيا….
منصور:الله لو شفتوا بناتهم كيف يتضاربون علي…. تقولون خلاص خلصوا الرياييل
فهد:وين هذي أي ديره ..بنسيرها
منصور: للا سف ما تقدر تدخل….بس للحلوين
احمد: لا مستحيل
منصور : وليش مستحيل!
فهد: لان دخلوك
منصور: شقايل يعني انا هب حلو؟
فهد: حشا منو قال
احمد :انته اصلا تقط الطير من السما
منصور: غصبا عنكم يا الهروم….
طبعا منصور ما يعطي مجال لاحد عسب يسولف وفهد واحمد كل ساعه يكشتون فيه…منصور كان قريب من فهد واحمد بحكم سنهم المتقارب منصور انسان عزابي وما يفكر بالزواج حاليا مع انه انسان جميل وجذاب ومستحيل احد يرفضه وغشمرجي درجه اولى ….احمد وفهد كانوا يدرسون بنفس الجامعه ونفس التخصص( هندسه )..فهد انسان وسيم وحلو وخقاق ( بحكم انه الولد الوحيد)..واحمد انسان حلو وجذاب جداااوقمه الوسامه وكان اقرب انسان لفهد…
مناير كانت قاعده حذال حمد وتسولف وياه عن الرسوم متحركه( طبعا ما فيه شي ثاني يقدرون يسولفون فيه)..وبالكرسي ألي حذالها كان قاعد محمد…( محمد كان هادي بطبعه و انسان رزين وله هيبه بين الكل..وطبعا مب متزوج ولا مرتبط وحلو ومررررررررررره وسيم وجذاب ..
يلتفت محمد على مناير بعد ما خلص مكالمته ..(شكله واايد بزي هالريال……..ما شاء الله المشاريع فوقه وتحته)..
محمد: شحالج مناير….عساج بخير؟
مناير:بخير(طبعا مناير زين زين طلعت منها هالكلمه..هذي اول مره ترمس فيها مع محمد من فتره طويله..)
محمد: بعدج فالمدرسه صح..
مناير: هيه هذي آخر سنه لي
محمد: واي جامعه بدشين؟
مناير: والله ما ادري خل هالسنه تعدي ويصير خير ان شاء الله
محمد: ان شاء الله خير بس انتي شدي حيلج..
مناير: ان شاء الله
محمد يناظرها وكأنه قاعد يقارن بين مناير الصغيرة ومناير ألحين
محمد: ما شاء الله والله وكبرتي يا مناير
مناير نزلت راسها مستحيه وما عرفت شو ترد….
فهاللحزه انتبه احمد عليهم……..احمد كان معجب بمناير وبرقتها وجمالها واسلوبها الناعم والخجول…كان وده بس يعرف شقاعد محمد يقول لها…طبعا لا مناير ولا فهد ولا حد بالدنيا كان يعرف
يتبع
شكراً على القصة
ليتل سارا
لا تتاخرين ( والسموحه)