أريد أفكاركن بالأكل والنوم للأطفال

هلا بنات
بغيت من العضوات اللي عندهن يهال تحت ال 3 سنوات يخبروني شو تسوون وجبات
للفطور والعشاء وبعد الغدا لليهال يعني مثلا أنا أنوع للفطور مره مهلبية ومره بيض ومره كورنفليكس..الخ
بغيت آخذ منكن أفكار غير للفطور وللعشاء و لفترة العصر شو تاكلون عيالكم لأني بصراحة تعبت ويا عيالي ما يحبون الاكل وايد
وحبيت بعد أعرف طريقة نوم الأطفال يعني شو اللي تسوونه
مثلا الصبح اليهال يقومون بروحهم ولا انتم توعوهم بساعه معينه وهل تخلوا عيالكم ينامون الظهريعني بالمختصر المفيد أبا انظم رقاد عيالي وابا اعرف كل وحده كيف تنظم نوم
عيالها. وعندي طلب صغير للي معودين عيالهم ينامون بغرفة بروحهم شو سويتوا وبغيت اسأل كل اللي عندهم عيال تحت ال 5 سنوات عيالكم ينامون عندكم ولا بغرفة خاصة ……
اتريا ردودكم.

والله ولدي يعتمد اللحين على الحليب اكثر من الوجبات ..
بس يصحى اعطيه شريحه توست وادهنها بجبن .. يتغدا معي انا اوبوه .. من نفس اكلي ..
النوم ينوم بغرفه لحاله .. بس سويت حركه مره حلوه عشان ما يحس ان الجو تغير عليه
خليته ينام عند جدته يوم .. وفي هذه الاثناء … خخخخ شلت سريره من عندي للغرفه الثانيه .. طبعا كان صغير كان عمره سنه او اقل وهو اصلا متغير عليه الجو متغير بسبب انه نايم عند جدته والحمد الله اول يوم نمت عنده ماقدرت اخليه لحاله .. واليوم الثاني بكى شوي.. وبعدها الحمد الله .. مشت الامور تمام .. بس تعرفين بعض الاحيان .. يشتاق لسريري وللجو الاولي ..فاروح عنده انام ..

مشكورة اختي حلاو قطن على ردج

أخوي عمره 3 سنين ..

ياااااااااااابس ووزنه 13 كيلو !!

ما ياكل لحوم ولا دياي ولا سمج أبدا .. نباتي الولد للحين ..

يتريق بلاليط أو خبز وجبن وعسل وزبد .. أو كورن فليكس ..

والغدا .. إذا تغدى .. عيش وروب وسلطة

والعشا نفس الشيء.. خبز وروب وسلطة ..

طبعا بين الوجبات أعطيه حليب كاكاو وحليب فراولة وروب بالفراولة وكريم كراميل .. أو عصير بأنواعه خاصة التفاح والموز والمنجا ..

أعطيه معمول بالتمر ( نوع الكرامة ) .. وأعطيه سويس رول كيك أمريكانا ..

أسوي له سلطة فواكه أو شوربة خضروات مع ماجي

يحب البيتزا والمعكرونة .. ويحب الخبيص والمجبوس ( بدون الايدام طبعا ) ..

هو نشيط وايد ما شاء الله عليه وعسب جيه المتن عنده زيرو ..

أنا ما أحاتيه إلا من فقر الدم .. أما المتن فعادي عندي .. أحس الياهل الضعيف أحسن .. ما أباه يربي أمراض من الحين ..

انا بنتي قريب بتكمل سنه ..

للحين ترقد وياي طبعا لانها ترضع وماتشرب حليب صناعي!!

بس ان شاء الله ناويه عالصيف احطها في حجره بروحها عدال حجرتي ..

وعن أكلها .. الريوق تاكل سندويش جبن .. الغدا عيش وخضار ومرات احطلها لحوم او شوي من أكلنا … العصر روب .,. العشا معكرونه بالجبن والزبده ومرات اسويلها شوربه او جبس ..

والسموحه

تسلمين اختي على الموضوع الفنان ..

عن بنتي الله يسلمكم عمرها 11 شهر واسبوعين تقريبا …
ترقد وياي على الشبريه لانها تعودت ترقد حذالي وترضع ! وهالغلط اللي سويته .. احاول اني ارقدها في شبريتها اللي لازقه في شبريتي يوم ترقد .. بس يوم اتحس انها مب عدالي اتقوم على طول واتنط علي ههههههه فديتها والله …

واكلها ..
الصراحه احاول اني انوع لها الاكل ..
يعني الريوق اعطيها ميلوبا ومرات روب الفواكه مال دانينو لانها تحبه اكثر من مال المراعي .. ومرات اعطيها سندويش جبن واغطه لها فالحليب (حليب ابقار العين او مرات لبن) عشان يكون لين السندويش مب يابس ..

الغدا .. على حسب شو غدانا .. واذا غدانا كان بدون عيش .. اسوي لها عيش واحط فيه بطاط وشويه شوربه ماجي الحروف او الثاني بو شعيريه لانه يعجبها طعمه (من رمضان وهي على هالحاله الظاهر تأثرت من شوربه رمضان هههه) …

العصر مرات اعطيها روب .. ومرات اعطيها كيكه او بسكوت ..

المغرب اذا كانت راقده العصر وماكلت شي اسوي لها سيريلاك ..

بالليل .. عشاها يكون شوربه .. واذا ما كلت شي المغرب ارد اسوي لها سيريلاك او ميلوبا او اسوي لها سندويش جبن او اذا شي مناقيش جبن اعطيها …

وبس

سؤال ..
ميرنا ! كيف بترقدين بنتج في غرفه بروحها؟ واااااي ماقدر احس بتم كل شوي اقوم من الرقاد عشان اتطمن عليها ! ..

خل بنتي بالاول ترقد في سريرها عقب بفكر في سالفه الغرفه الثانيه ههههه

انا عيالي اريقهم من ريوقنا حتي الصغير اليه عمره تحت الثلاث سنوات ماشالله عليه اعطيه بلاليط اوبيض اوسندويش مع حليب اوخبز وعسل ونادرا كورن فليكس احس انه مايشبع الغدا من غدانا عيش وسمج او لحم اودياي العصر مكرونة الاندومي او اسويلهم هريسه او كيك سويسرول او بسكوتات والعشاء اسويلهم مكرونة البشاميل عيالي يموتون عليها اوسندويشات جبن وحليب العين او لبنه وخبز ومربى وغيره
وبالنسبه لرقدتهم بروحهم ولدي العود عودته عالرقده بروحه باتباع سياسة سوبر ناني يصيح وويصارخ عشان يرقد عندي بس ارده سريره يمكن 20 مره يقوم فالليل عشان يرقد عندي واعاند فيه وارده سريره يوم شاف ماشي فايده رضى بالامر الواقع :1 (6): والبنت نفس الطريقه والصغير بعده عندي لين يكبر باذن الله بس المهم يكون عندج طول بال