أسبانيا أجمل دول اوروبا . !

هذا الموضوع تكمله للجزء الأول اللي هنا

https://www.uaewomen.net/showthread.php?t=221690

طلعنا من غرناطه اليوم الثاني ومشينا باتجاه ملقا Malaga وهي أكبر مدن مقاطعة اندلوسيا اللي على الساحل اللي يسمى كوستا دي سول من أهم الاماكن في هالمدينه الكازابا وهو مسرح روماني أثري

وهالمدينه مسقط رأس الرسام العالمي بابلو بيكاسو فمسوين متحف بأسمه ولكن مادخلناه لسوء الحظ بسبب الازدحام الكبير من قبل السياح الامريكان والاجانب عليه وكان محتاج للانتظار لمدة 3 ساعات على ماندخل فتركناه،

وبعدين رحنا نتمشى في شارع كاللي ماركوس دي لورواس وهو أهم شارع في المدينه فيه مطاعم ومحلات صغيره على قدهم.

وعلى فكره مافي مدينه اسبانيه تخلو من مانغو وزارا وماسيمودوتي لأنها شركات اسبانيه ، المهم طلعنا من ملقا لأنها صغيره ومايبالها أكثر من يوم ورحنا باتجاه مايوركا وعملنا تشيك ان في الليل في فندق حيات ريجنسي لامانقا

فندق راقي ونظيف وهادي جدا وفيه سبا من أجمل السباز اللي شفتها في حياتي وفيه ملاعب غولف وتنس ومسابح يعني منتجع كامل.

ثاني يوم نزلنا نتمشى بالمدينه ومن اهم معالمها الكاتدرائيه

وتمشينا في القراند فيا او الشارع الكبير اللي هو بوسط المدينه وفيه كل المحلات والاسواق وفيه محل الكورت انقليز ويكتب جذيه El Corte Inglés وعلى فكره هذا محل كبير من عدة طوابق موجود في كل مدن اسبانيا وهو يعتبر اشهر وافخم محلاتهم فيه ملابس نساء واطفال ورجال وجواتي وكتب وهدايا وكل شيء تقريبا وهذي صورة منطقة الاسواق في مايوركا

وبعدين تغدينا وطلعنا من مايوركا باتجاه العوده لمدريد بالسياره ولحد يسألني كم خذ الطريق معانا لأن المفروض 4 ساعات ولكن نحنا خذت معانا حول ال8 ساعات "4 ساعات تضييع تخيلو؟" يعني وصلنا مدريد هلكانين من التعب ورجعنا فندفنا الوستن بالاس ونمنا ماحسينا بعمرنا وبعدين قمنا الصبح وتمشينا في شوارع مدريد ورحنا شارع alcala de henares ولو لاحظتو الكالا = القلعه بالعربي ووايد من كلامهم ومصطلحاتهم اصلها عربي ووايد اسماء عمدهم تبتدي ب أل او إل مثل Alcala او Elcorte engles مشتقه من الالف لام التعريف في اللغه العربيه بس طبعا هم يرفضون يعترفون بهالحقيقه او بالأحرى يهملونها وتغدينا في مطعم فبس Vips وهو اشهر سلسة مطاعم وجبات سريعه في اسبانيا "على شاكلة ابل بيز وفرايديز"

، المهم رحنا تياترو مدريد عشان نحجز تذاكر لحضور عرض راقصة الفلامنجو الاسبانيه المشهوره ماريا كاراسكو قالنا الريال اللي يبيع تذاكر: نعم؟ انتو تطلبون المستحيل؟ الناس اشترت تذاكرها من اشهر وانتو يايين قبل العرض بساعه؟ قلنا ارجوك حاول المهم بعد شد وجذب فهمنا ان الريال ممكن يطلع تذاكر بس لازم نحط شي بجيبه ، عطيناه المقسوم وطلعنا التذاكر بطلوع الروح، ماريا كاراسكو هذي فنانه محترمه جدا ورقص الفلامنجو نفسه رقص راقي وغير مبتذل وهم من رقصتهم هذ تمثل قصة معينه ممكن تفهمها بالحركات وبكلمات الاغنيه ولازم ينلبس لها جواتي خاصه لأن الراقصه تضرب بريولها على خشبة المسرح وتطلع صوت يناسب الموسيقى وهذه هي جواتيهم

دخلنا: وقالو ممنوع التصوير وفي سيكيورتي يشيكون على الناس كل شوي المهم في واحد واقف اخر شي ويدامه كاميره تلفزيون للتصوير ويالس يضبط الاضاءه ومدري شو، رحت كلمته قلت له بليز ممكن اشتري منك نسخه من تصويرك للعرض قال أنا ريل ماريا وبكلمها لج بعد العرض اذا وافقت بعطيج قلت له قراتسي سنيور ويلست، وأول مابدا العرض مادري شاوصف لكم من اضاءه والا من موسيقى والامن اداء والا من فستاتين سبانيولي، قسم بالله شي خياااااااالي وصوت المغنيه اللي ورا ماريا روووووعه صوتها مبحوح وهي تعزف عالقيتار وتغني في نفس الوقت تانقو رهيييييبه ومدة العرض كانت ساعه ونص بس ولاحسينا فيها من جمالها، المهم قبل لايخلص العرض بشوي ياني ريل ماريا قالي لاتطلعون ابيكم، قلنا اوكي وطلعو الناس كلهم ويلسنا ننطر وننطر وننطر بعد ماطلع اخر شخص من القاعه وفضت تماما ياتنا ماريا بنفسها حليلها متواضعه وسلمت علينا وقالت انتو منوين؟ وقلت لها لازم اصورج قالت ابشري وصورت معاها كانت تهبل عالطبيعه وعطتنا سيدي العرض وقلنا لها ياليت يسوون لج حفلات في المنطقه العربيه احسن من احلاموه و نانسي هذي هي ماريا كاراسكو.

وهذي صوره من العرض

طلعنا نتعشى في مطعم Annapurna الهندي "مانصير عرب اذا ماكلنا عيش" قريب من شارع كاللي دي جينوفيا
وردينا الفندق نحضر نفسنا للرجوع ثاني يوم وكانت سفره لاتنسى.
بنات اللي عندها استفسار عن مدريد وغرناطه وقرطبه وطليلطله وملقا ومايوركا تتفضل أما مناطق اسبانيا الثانيه فمارحتها وانشاءلله لي عوده لأسبانيا مره ثانيه وبكتب عنها في حزتها.

رووووووووووعه وايد حلووه

خاطري ازورها

مشكووره اختي على الصور ^_^

روعه

شو انطباعاتج عن الشعب الاسباني؟؟؟

العفو وانشاءالله تزورينها قريب.

تعاملهم حلو مع السياح وطيبين ويحاولون يساعدونج كثر مايقدرون بس اللغه مب مساعدتهم لأن اغلبهم مايعرفون انقليزي.

تسلمين الغالية على هالموضوع الأكثر من رائع .

حلوووووووووووووووووووووووووووووووو

خاطري ازرو هالبلدان احس لها ستايل خاص

الله يعطيج العافية عالطرح الرائع