صباح الخير خواتي
بصراحه ما اعرف اكتب مواضيع واسرد الكلام بطريقه مرتبه بس بختصر الموضوع
ام عيسى حرمه عندها 4 عيال طبعا (( بدون )) وهي مواطنه والله يصبرها على الحال اللي هي فيه
ريلها طلقها وعشان يطلقها تنازلت عن كل شي وحاليا حصلت بيت ايجار يباله كدفعه اولى
9000 درهم وعندها فرصه اسبوع للدفع
بصراحه انا اهتميت بموضوعها من 3 اسابيع تقريبا وقدرنا نوفر لها التالي
– اهل خير تكفلو بمصاريفها ومصاريف عيالها في رمضان
– موظفه عندنا في الدوام بدرسها على حسابها دورة كمبيوتر وانجليزي
– حصلت الف درهم للحين من مبلغ الايجار
ملاحظات
– ام عيسى تاخذ من الشؤون 4000 درهم بس المسكينه ما تعرف وين توديهم ولا وين وقالت ان الاقساط الباجية مال الايجار بتشترك في جمعية وبتسددها بس اهم شي اول قسط لاول ست شهور مب عارفه من وين تيبه
– ام عيسى من سكان ام القيوين واللي جريبه منها تقدر تسير تتصل فيها وتزورها وتشوف وضعها
– ام عيسى عندها ليسن وسيارة على قدها اللي تقدر تسوي فيها خير وتحصل لها وظيفة مندوبه بتكون سوت معروف كبير
– طلع لها مبلغ 500 الف عشان تبني بيت ولفت الدنيا تحصل مقاول يبني البيت لها وما لقت الا في الفتره الاخير حصلت واحد قالها ببني لج غرفتين وصاله وحمام عزكم الله وطبعا انتوا عارفين انها ما تتقدر تتصرف في الملغ بطريقه شخصية
– اللي تبا رقمها تراسلني ع الخاص
يا بنات
جدامها مدارس ورمضان والعيد تخيلوا الحياة وسط هالظروف وين بتضرب براسها هالمسكينه
والله كل ما اتصل فيها احس العبره بتخنقها وتبا تصيح تكسر الخاطر
اذا وحده فيكم تعرف واحد يبا يسوي خير في هالاشهر المباركه تخبره يستر ع هالفقيره وعيالها
خلونا نساعدها ولو على الاقل كل وحده تتبرع ب100 درهم صدقوني نقدر نوصل للمبلغ المطلوب
ما ادري وين عنها وعن امثالها
اكثر من 50 مليونير اماراتي
وين عنها حملة دبي العطاء
وين عنها جمعيات الخير والبر
وين عنها برامج امل والم وقريب المنال وين وين وين وين
خيرنا كله لغيرنا
طرشيلي أختي العنوان وبنتفاهم على الخاص
ويفك كربتها وكربت كل مسلم ومسلمه
الغالية طرشلي رقمها
والله في عون العبد ما كان العبد في عون أخيه
شدوا الهمه وخلونا نفرح ام عيسى وعيالها قبل رمضان والعيد
بارك الله في كل اللي دعا لها وطلب رقمها للتواصل