إجازة الصيف

السلام عليكم خوات
طبعا الكل عارف ان إجازة الصيف قربت، يعني باقي عليها تقريبا شهر "على حسب المرحلة الدراسية" المهم بعد اجازة الصيف مباشرة بيهل علينا رمضان.

ممكن اعرف شو برنامجكم لعيالكم في الصيف؟ يعني اللي تعرف كامب حلو في دبي او برنامج مفيد و حلو يا ريت لو تشاركنا الافكار، لاني صراحة حيرانه و ما اعرف شو بسوي خاصة اني مهب مسافرة.

انا نفسج حيرانه

شوفي الأكاديمية مال اتصالات يسوون كامب كل سنة وايد حلو وهالسنة عندهم من 8/6/2016 لين 14/8/2016 والتسجيل بالأسابيع كيفج يعني .. اتصلي واسألي 042043489

ممكن انتي تسوين لهم جدول
جوفي اقرب مركز تحفيظ قران لكم او انتي حفظيهم و حطي جوائز حلوة
شركيهم في مراكز الاطفال للناشئة او نوادي رياضية للكره او الكاراتيه او الرماية او الشطرنج و ترى تكون مجانية للمواطنين و فيها توصيل لبعض الاماكن
لو انتي مسجلة في نادي رياضي و انصحج الصراحة تسجلين وديهم معاج للسباحة مثلا

السلام عليكم اختي، اتصلت على الرقم اللي عطيتيني محد رد علي! بس ترا انا بناتي صغار اعمارهم بين 8 و 7 سنوات و اصغر بعد يعني ما اعتقد اتصالات عندهم برامج للاطفال.

أذا عندج فكرة عن شي ثاني خبريني.

السلام عليكم اخت ميرة، نحن من سكان الورقا 1، ممكن اعرف اماكن تحفيظ القران للبنات والنوادي الرياضية القريبة منا؟