اعز صديقاتي ما شفت منها الا المشاكل

بدش بالموضوع على طول انا بنيه بأول العشرينات تعرفت على صديقتي من عمري 16 سنه اهي خوش بنيه وحبوبه وكل شي لكن عيبها ما تسمع الكلام

تروح وترد الايام وتوصل لي مكالمات من واحد يبي يتعرف ويعرف عني كل شي طلع هالانسان واحد اهي تعرفه كان ياي يبي ينصحها من صديقه الي اهي تكلمه انه متزوج واهي تركته لانه متزوج وراحت تكلم هذا وانا نصحتها وقلت لها الريال الي يسوي جذي بصديقه حتى لو على حق على الاقل ما بكلمج ويتعرف عليج وكلامي كله بالطوفه انا ما اقول اني ملاك لكن الغلط غلط هالانسان وايد ضايقني ويطلع ارقامي وارقامها وارقام البنات ويدق عليهم ويقولون عني كلام ما ينقال وعنها بعد وعطيت تلفوني لخوي وتجرا وسب اخوي وقال كلام يسود الوي عني وكله كلام جذي وكان يقول كلام والله يا بنات ما يعرفه عني الا اهي ومع هذا عمري ما شكيت فيها واهي من اول ما قال لها كلام سيده شكت فيني ويت فتره وتغيره علي وبعدين ردت عادي

اخر الايام تعرفت على واحد اكبر منها بوايد وكنت كله اقول لها دام اهو كبير ليش ما يتزوجج وياخذج ويعاملها بأسوأ معامله وكان يكرها فيني ويسبني عندها وكنت والله يا بنات احلم فيها احلام تخوف واقول لها يا بنيه انا حلم فيج فلان مو زين لج واهي بدال ما تسمع كلامي تروح تقول له قلت جذي

اخر الايام تغيرت علي وقامت ما تتكلم وياي عدل ونفسها صارت خايسه وتوعد وتطنش وانا اعز ما علي عزه نفسي تركتها وخليتها ولا قمت ادق عليها واخر ايام تدق ولا ارد عليها حسيت انها كانت تستغلني على شان تطلع وياي بس واهي من الناس الي تجامل وتنافق حتى لو تكره هالانسان كره العمه حسيت اني وايد غلطت اني عطيتها كل هالاشياء من وقتي واسراري واحس اني وايد مرتاحه من غيرها مع اني اعرفها من عمري 16 سنه بس مرات افكر اقول الي انا سويته صح ولا غلط ؟ واهي اصلا الحين حتى يوم تشوفني بالمسنجر ما تكلمني جني انا الي غلطانه بحقها مرات افكر شفيها قلبت علي جذي مره وحده وانا الي المفروض اتغير مو هي؟ اسأله محيرتني الصراحه وودي لو انتو تعطوني جواب لاني انا عمري ما بروح واناقشها ولا ابي اشوفها حتى مو لاني اكرها بالعكس الله يوفقها ويستر عليها بس اهي ما تستاهل اني حتى اكلمها ومشكوريت على وقتكم

حبيبتي هالاشكااااال امسحيها من حياتج لانها ماينبكي عليهااا ولاتخلي من بينكم الا سلام رب العالميييييييين

أنا ويا الاخت عاشقة زوجها

على فكرة لا تعتبرين الفترة اللي قضيتوها ويا بعض عشرة عمر لان في هالزمن يبالج سنين طويلة عشان تعرفين الشخص عدل… أنا عرفت وحدة اكثر عن 15 سنة وفي الاخير اكتشفت انها تطعني في ظهري

اللي تجرج بطريق الدمااااااااااااااااااار لا تتحسري على فراقها

والله يرزقج بالصحبة الطيبة

ربي يحفظج

السلام عليكم عزيزتي

أولاً عليج النصيحة لأن الدين النصيحة ومن واجبج تجاهها كأخت وصديقة إنج تنصحينها بما فيه صلاحها وتصبرين عليها فوالله إن استجابت كان به والحمدلله الذي هداها وإن كان غير ذلك ووجدتي إن في رفقتها فتنة وشبهة وأذى لك ولسمعتك وسمعة أهلك من الأفضل أن تقطعي علاقتك بها وإذا اتصلت كلميها وردي على قد السؤال ولا تأتمنينها على سر وشوي شوي هي بتمل لكن لا تقطعينها فجأة حتى لا تأذيك.. ملاحظة أخرى: السلام لله يعني إجعلي العلاقة سطحية سلام ورد السلام.. أتمنى أكون أفدتج

الله يكفيج شر خلقه
رعاية الله

المفروض أختي انج ما ترابعين هالأشكال ..لو حتى اعتذرت منج… اللي يبيعج مره يقدر يبيعج الف مره….