الحب شي جميل بس اذا كانت هي الحياة كيف اقدر اتعلم

انا صارلي شهر من عرست وحملت من ليلة الدخلة و من اسبوع سافرت ويه ريلي كندا وقدمت استقالتي من الشغل علشان اسافر معاه بس الحين مب قادرة اتحمل اكون ابعيده عن اهلي اشتقت حق امي وابوي وخواني وخواتي وعيالهم اشتقت حق ربعي وغرفتي وكل شي ريلي يحاول بكل الطرق ما يخليني بروحي افكر بس انا مب قادرة اتخيلوا ايلس تكرمون بالحمام اكثر عن الساعة علشان اصيح وما ينتبه لي لكن هو حاس فيني قالي ردي الامارات اذا انت مب قادرة تتحملين وانشالله هو بكون بخير بس انا الحين بين نارين نار اهلي وشتياقي لهم وبين ريلي منو بداريه
ارجوكم ابغي حل لاني تعبانة؟

هلا حياتي أنا أقولج خليج وياه صبري ورح تتأقلمين لأن تحسين شي غريب أول مرة تسافرين مع ريلج يمكن متعودة مع الأهل بس كيف ترجعين من السفر وتخلينه بروحه شوبيسوي هناك لوحدة عفوا يعني ما ذكرتي لنا ليش قال لج روحي وأنا بظل بروحي عندة شغل مثلا طبعا لاتودرينة أو بيكمل السفرة بروحة من دونج طبعا هنية ما أنصحج تودرينه

حبيبتي
طرشت لج على الخاص

يويلج و سواد ليلج ان ودرتي ريلج
هههههههههههههههههههههههه
امزح معاج لاتزعلين شيكي الخاص

لا الغالية لا تخلينه أبدا بروحه …

اصبري علشان ريلج … وأهلج تقدرين تكلمينهم دوم .. فكري بريلج شو بيسوي من دونج … أكيد مايهون عليج تخلينه بروحه … هو بعد أكيد مشتاق لأهله وخاطره يرد البلاد بس ملزوم على هالسفره

الحياة مشاركة استغلي الظرف هذا عشان تبينين حق ريلج انج مستعده تتحملين وتصبرين علشانه ..
وكل شي عشانه يهون … صح ؟؟ … طبعا صح ^_^…
وأكيد هو مقدر موقفج معاه … بدل ما تيأسين وطول وقتج حزينه حاولي تبتسمين علشان زوجج لاتخلينه يحس بحزنج لأنه أكيد بيضايق عشانج … "وعسى ان تكرهوا شيء وهو خيرا لكم " ماتعرفين أكيد السفره هذي فيها شي خير الكم … دايما أحس السفر هو اللي يقرب بين شخصين ..
فليش ما تحاولين انج تتقربين منه وخصوصا انج توج عروس خليه يحس شو معنى زوجه في حياته …. كوني انتي أخته وأمة وزوجته وحبيبته وصديقته و……. سعادته في الغربه ..

ربي يوفقج يالغالية وييسر جميع أموووورج ,,,, آآآآمين …

لا يالغاليه انا اول حياتي قضيتها بامريكا وحاشني نفس الي استوى بج وفعلا بعد مروور 4 شهور
رديت الكويت ولي اليوم اقول ليتني مارديت صراحه احلى من العيشه بره مع ريلي مافي
استانسي الحين مردج بترديييين وتتذكرين هلاايام وتتحسفين عليها يوم بتصيرين بالامارات مع ريلج
ريلج مو لج لوحدج لاهله واصحابه وللناس والحياة الاجتماعيه اما الحين ملكج كسبيييه عدل
واتصبري وان شاء الله بتستانسين كلها فتره وتعدي انا قعدت بامريكا اكثر من سنتين اتمنى ارجع الحين مره ثانيه لها مع زوجي =(

خواتي مشكورين بس انا تعبانة وافكر كيف بتحمل خمس سنوات ما بجوف فيها اهلي وكيف بولد بعيدة عن امي منو بربي ولدي وبرجعلهم ولدي عمرة خمس سنوات كيف احس الضيج بيدبحني وريلي محتار وتعبان يجوفني مضايجة والحمل وايد امتعبني

على فكرة ليش ما تتفقين معاه كل فترة تين انتي و هوه و تزورون اهلكم و ترجعون
يعني كل ستة اشهر او كل سنة او في الاجازاة تيون اسبوع او 3 ايام تزورون الاهل و ترجعون
اعتقد انه جذية يكون احسن لج و لريلج بعد