السلام عليكم ورحمة الله
كيفكم خواتي عساكم بخير
حبيت أبشركم اني بحمد الله ولدت فجر
يوم الاثنين (ثاني يوم العيد ) 20/8/2016
وصرت أم غيث
طبعاً يبي لكم كوب شاي لأني كاتبة لكم القصة بالتفصيل وسامحوني عالإطالة 
أنا بكرية وولدت فالأسبوع ال37 من الحمل
من دخلت التاسع والدكاتره خبروني أن الماي عندي ناقص ولازم نصبر لمدة اقصاها اسبوعين بس اذا ظل ينقص لازم ولادة ولازم كل 4 ايام يسوون CTG
اللي هو تخطيط لدقات الجنين ومعرفة معدل حركاته
المهم رجعت البيت ومشيت عكلام الدكتورة وبعد مرور أسبوع وشوي
يوم السبت 18/9/2016
رحت عندي مراجعه شافتني الدكتوره مره ثانيه وقالت الماي جداً ناقص لازم ولادة خلال يومين …
وشيكت لي من تحت اعتقد سوت لي توسعه شوي وكان الرحم مفتوح 3 سم وقالت راس البيبي داخل فالحوض ..وان عندي قابلية جداً ممتازة للولادة الطبيعية .. انا كنت خايفه على فرحانه على مش مستوعبه ان خلاص كل شي قرب ينتهي الحمدلله الدكتورة عطتني يومين نحاول بالمحرضات الطبيعية عسب يبدى الطلق طبيعياً واذا مانفع لازم صناعي وقالت لي اذا حسيتي بالالام كل 5 دقايق على طول تعالي
بعد المراجعة على طول خلوني انط على الكورة لمدة ساعة وبعدين روحت البيت عطوني زيت خروع اشربه مع عصير برتقال وكنت تعبانه مايمديني رقدت شوي ساعة الا بدت الام فظيعة مغص على اسهال طول اليوم وانا فرحت قلت خلاص بربي وهاي الآلام ولادة بس مافي شي
مشيت كثير كثير وخلصت كراتين رطب وتمر وجماع وطول الوقت أذكار واستغفار وسورة الزلزلة وماأشرب غير ماي زمزم مقراي عليه ولله الحمد
وزوجي خظخظني بالسيارة لين قلت بس ومن دخلت الحمام لقيت سدادة عنق الرحم طاحت ..فرحت واستبشرت خير
يوم الأحد (يوم العيد ) 19/8/2016
كنت تعبانه ونفسيتي من أسوأ مايكون ظليت نايمة بس ولا شفت ولا عايدت أي أحد وزوجي حليله عدالي يصبرني ومافي الالام طلق
عالعصر رحنا نمشي عسيفة البحر وبعدين ركبنا البيكب وتخظخظت مره ثانيه وماشي
بالليل زوجي قال بنروح نسلم ونزور بعض الاهل والجيران وانا والله مب قادره اقابل احد عالعموم رحنا وسلمنا ومن طلعنا رحت المستشفى مراجعه الساعة 10 بالليل زوجي راح واختي يات عندي ويوم شافتني الدكتوره وشيكت لي الرحم مفتوح 4 سم 
قالت عندج حلين يااما ترجعي البيت مثل ماتفقنا وتجربي كل اللي جربناه قبل لين 9 الصبح ييت الالام كان بها ماييت لازم تيين طلق صناعي
أو انا نعجل المسأله ونحط لج طلق صناعي ألحين وبتكوني مربية عالفجر ان شاء الله ..طبعاً انا طول الحمال مب خايفه من الولاده كثر خوفي من الطلق الصناعي سبحان الله .. وطمنتني الدكتوره وقالت هاي الالام وهاي الالام وكلها تساهيل من رب العالمين
عاد هني اتصلت بزوجي اشاوره واخذ رايه وكلم امه وقال خلاص توكلي على الله ويا يوقع الاوراق وياب لي أكل لأني ماكنت ماكله شي من الظهر
وكنت بموت أبيه هو أو أختي اللي مب متزوجه يدخلون وياي الولادة لأن امي متوفيه وام زوجي تخاف وانا ابي احد ارتاح له واحاول اسولف وياه ويشجعني فالولادة
المهم قلت ماعليه الحين طول الوقت اختي بتكون وياي ووقت الولادة اختي بتكلم زوجي او امه اييون من البيت وساعتها يصير خير واحد منهم يدخل
بدينا الطلق الصناعي الساعة 11 طول الوقت كان مشي وتنفس هذا الشي صج ساعدني فالولادة والله يابكريات لاتصارخون ابد تألموا مانقول لا بس لاتصرخوا من تيي الالام تنفسوا تنفسوا تنفسوا طاف الوقت وكانت الالام تروح وتيي فتحت لي الدكتورة كيس الماي وهني بدى الالم المتواصل من الساعة 3 لين 4:45 كان أبطأ وقت يمر فحياتي كل شوي اشيك وماشوف غير دقايق مرت وانا خلاص مب قادر احس بشي يدفع ابي اسوي بوش وبس ابي الدكتوره تشيك لي كم سم فاتح ( تبون الصج والله الود ودي تخلي ايدها داخل ماطلعها احس براحه 
)
وهم فكل طلق يصرخون علي تنفسي تنفسي واختي حليلها تمسح عراسي وتهديني وتنصحني وانا ادعي واستغفر وطول الوقت من اول ماحملت وأنا جملة حسبي الله لا إله إلا هو عليه توكلت وهو رب العرش العظيم على لساني ومب خايفه وثقتي وظني بالله جداً كبيرة وأدري ان ربي مايضرني ومايحملني فوق طاقتي والحمدلله والله ماخاب ظني 
عالساعة 4:30 الفجر شيكوا لي
طلع الرحم 10 سم وقالوا خلاص ولادة واتصلت اختي بزوجي عساس اييون وريلي من كثر ما مرتبش ماياب امه يى بروحه واصلا انا من بدى الالم الصجي قعدت اترجى اختي بليز لاتروحي مادري ياتني غريزه فنفسي ان ابيها هي تقعد مافي وقت انها تروح وهو ايي خلاص ماقدر
بدت الولادة وبدينا بوش (3 زفرات ) ربع ساعه والحمدلله طلع أحلى غيث 
طبعاً سووا لي خياطة لأن نبض البيبي كان بدى يخف ولازم يطلعونه بسرعه..واول ماطلعوه ولله الحمد ركض على الدكتورة وبعدين يابوه لي قرة عيني فديته …
رسالتي للبكريات لاتخافين أبد والله عذاب كم ساعه واخرتها بتحسين كل شي صار مثل الحلم ولا كأنه صار 
…توكلي على الله أولاً وأخيراً وخذي بالأسباب يعني سوي اللي عليج .. أنا من السابع مشي 45 دقيقه والثامن ساعة والتاسع ساعة ونص يومياً ..وبالعكس المشي كان وايد يحسن نفسيتي وتختزنين اوكسجين وهوا فرش ..الاستغفار والذكر ورقية تسهيل الولادة ..ماي زمزم والرطب وربي يسهل على كل حامل يارب
موضوعي الياي بيكون تحذير مهم جداً ياريت الكل يقراه لأن تبطلت لي الجراحه وشفت العذاب والويل والحمدلله عكل حال 
والله يسهل علينا يارب
و مبروك الكتكوت و الله يجعله من الذرية الصالحه