شحالكن عساكن بخير .. ورمضان كريم .. وإنشالله تكونن من عتقاء نار جهنم في هالأيام الفضيله ..
بصراحه بعد ماكتبت مشكلتي حسيت بالدنيا سودا وضيقه في عيني هب من قسوة الردود إنما شفت اشكثر كنت صغيره في عين نفسي وتأكدت بأني بعد كنت صغيره في عين الشخصين إلي عرفتهم وفي عين كل الناس
عمومآ بعد ماقريت الردود ماتدرون بحالتي كيف كانت في البدايه تضايقت وقلت محد له دخل وهذي حياتي وكنت فعلآ ناويه أرجع وأكلم إلي كنت أظن إني أحبه خاصه إني سمعت إنه سأل عني ويبا يكلمني بس صارشي خلاني امتنع وأتراجع وأصحا من الغباء إلي كنت فيه
شهر رمضان .. هيه شهر رمضان إلي دخل علي هذي السنه ولأول مره براحه وبدون هموم ومشاكل وصياح وتفكير ومنازع .. صحيح أول الأيام كنت مهمومه من الكلام إلي سمعته منكم وأفكر في هذاك بس بعد كم يوم وبعد ماراجعت نفسي شفت إنه الدنيا صدق ماتسوا وأنه كرامتي وعزة نفسي وشرف أهلي أهم من مليون ألف ريال غريب
شفت إنه عندي أشيا وايده بنات غيري محرومات منها .. عندي أم وقفت معاي ودافعت عني برغم إنها متأكده من سواد ويهي وبنات وايدات يشكن من سوء علاقتهن بأمهاتهن ..
عندي أخوان بعد ماعصبوا احتوني وغيرهم كانوا بيذبحوني أو أقلها بيحبسوني حتا نور الشمس ماشوفه وغيري وايدات يشكن من اخوانهن الشباب ..
عندي ربيعات ماتخلن عني دقيقه وحده وغيري وايدات يشكن قلة الربيعات ..
عندي عز ومال وإسم عايله وجاه وغيري وايدات يشكن الفقر وقلة الحيله ..
عندي جمال من رب العالمين يحسدني عليه الكل وبشهادة كل إلي يشوفوني وغيري وايدات يطلبن الجمال ..
عندي ولد ماشالله عليه وربي يحفظه لي واحمل بأخوه وغيري وايدات يشكن العقم ..
والأهم من هذا كله عندي زوج يحبني برغم خيانتي وتذكيري له فيها ومصر على حبه لي هب طيبه إنما طيب أصل وغيري وايدات يشكن إنهن ماعرسن ..
وقفت مع نفسي وراجعتها وتدرون شو لقيت .. لقيت إنه رب العالمين من رحمته عطاني كل شي وأنا بخلت عليه بأبسط شي شكري ..
وفي المقابل لقيت إنسانه ضيعت عمرها تدور الحب والحب جدام عينها .. إنسانه تركت الأمان وسارت ادور الخوف .. إنسانه انعمت عن الصدق وماشافت غير الكذب .. إنسانه باعت من يحبها وشرت من لعب بشرفها وسمعتها ..
واكتشفت إلا تأكدت إني كنت بختصار ولاشي .. صدق ولاشي .. وهذا حال الإنسان بدون كرامه .. وهذا قدره إنه يكون ولاشي ..
ولأول مره لقيت نفسي أصيح وأصيح وأصيح من الخاطر .. وياااااااما صحت هب أول مره بس كانت هالمره غير عن كل مره .. هالمره ماصحت من شوقي له وخوفي لاينساني .. ولاصحت أبا الفكه من ريلي وأرجع له .. ولاصحت أتمنا الموت ياخذني ولا أعيش بعيده عنه .. هالمره صحت عشاني اكتشفت إنه مايستاهل حبي وتضحيتي وسمعتي إلي راحت عشانه ..
صحت عشاني اكتشفت إني ما أحبه كثر ما أحب ريلي .. اكتشفت إني أحب ريلي موووووت وإني كنت أدور على كلمة " أحبج " كلمه تافهه يقولها كل واحد حق أي وحده يتعرف عليها وياكثرهم ..
كنت أقول حق كل إلي أعرفهم إنه ولد خالي هب رومنسي ولايعرف يقول كلام حلو .. بس اكتشفت إنه قمه في الرومنسيه .. ويكفيني إنه ضحى بأشيا وايد وارتبط فيني برغم عيوبي .. صح فضحني جدام أهلي بس من حرقته من الرمسه والتصرفات إلي بدرت مني وأي ريال في مكانه كان بينشر غسيلي وبيفضحني وبيطلقني .. وهو ظل متمسك فيني لآخر لحظه برغم كل شي وللأمانه ماكان يهيني ولا يعايرني إلا إذا طولتها معاه وراددته .. المسكين متحملني بفضيحتي وياب مني عيال وعمره ماشكك في نسبهم معنه غيره كان بيسويها حتا لو كان متأكد من نسبهم بس هو لا .. وهذا كله مب عشانه ولد خالي مثلما الناس يقولون إنما عشانه صدق يحبني ومايشوف غيري ..
تعرفن .. حسيت مثل حمل وإنزاح من عصدري دموعي ماقدرت أوقفها حسيتها صدق تنزل عخدي وتغسل قلبي خلصت صلاتي وركضت بسدالي عالمبايل وأتصلت فيه .. ريلي وحبيبي وولد خالي .. سمعت صوته وصحت لين قمت أشهق .. وحسيت بلهجته خايف المسكين كان في السعوديه وخاف من صوتي وصياحي وتحرا فينا أنا أو الولد أو الأهل شي .. طمنته وكلمته وأنا أرتجف حدي ودموعي مب راضيه توقف وماعرف كيف قلتله " أحبك " .. وسكت ورديتها مره وثنتين وثلاث وأربع أتريا منه إجابه حتا لو صراخ وهو ساكت مايرد وبندت .. بعد حوالي فتره طويله يمكن ساعات اتصل وأول شي سألني إياه بعصبيه : " شو السالفه إنتي طلعتي اليوم "
جاوبته لا .. سكت عقب قال " أيوه شو كنتي تقولين "
قلتله أحبك ..
تصدقون إنه ضحك ضحكه وكنه يقول قديمه إلعبي غيرها ..
سمعت ضحكته وانفجرت صياح ..
سمع صياحي سألني هالمره باهتمام شوفيج شوصاير عليج ..
وبصراحه لقيتها فرصه وقلتله على كل شي في خاطري وألي قلتلكم إياه قبل شوي كله قلته له وقلته شو أحس وكيف إني ندمت ..
وهو تم يسمعني لين خلصت وعقب تم ساااااااااكت ..
وبعد فتره قال " الله يسامحج " سألته وأنته سكت مارد وانتهت المكالمه على جذا بدون رد أو تعليق ..
ما صار بينا مكالمات بعد هالمكالمه .. لني أنا كنت مفتشله منه وهو ماعرف كيف إحساسه .. مرت الأيام كنها شهور .. وحسيت إني خلاص خسرت حتا حب ولد خالي .. وتأكدت إنه هذا آخر عهدي به وجهزت عمري حق الطلاق .. صحيح اعترفت وفضفضت وقلت كل لي في خاطري بس بعد قلت أحضر نفسي حق أسوء الإحتمالات .. خاصه إنه تم ساكت ومايرد ..
رجع ريلي من السفر واحنا نايمين .. والعصر وأنا في المطبخ مع الخدامه ماتنبهت إلا على صوته وهو يقول : ماحب الفلفل في الأكل
طاح الصحن من يديني وشلته الخدامه وسلمت عليه باللفظ قبلي .. وأنا ماعرفت شو أسوي أركض صوبه وألا أركض أنخش عنه .. ماعرفت أحظنه وألا أمد يدي له وبس .. لساني انعقد ودموعي مايحتاي .. بس كني لمحته ابتسم ماتأكدت منها
.. طبعآ ظروف وايده اجتمعت الخدامه وصيام والوضع ماعرفت شو أسوي ..
أذن المغرب ، فطرنا ، لاعب الولد ، كلم أهله ، مر الوقت ثجيل وطبعآ ساكتين ومانكلم بعض .. وفي الليل وقبل لايسير غرفته ينام قالي : المسامح كريم
حسيت الدنيا تغيرت في عيوني .. خلاص .. سامحني .. ماصدقت بس ارتحت ونمت من الخااااااااااااطر ذيك الليله ..
ثاني يوم هو بدا كلمني بعد الفطور وتناقشنا وتعاتبنا واااااايد وقلتله شو ناقصني وشو الي خلاني أخونه .. وقالي ليش تصرف معاي بقسوه وليش فضحني .. طبعآ نقاش مايخلو من حده ولوم وأحيانآ عصبيه .. بس كان كل واحد فينا إذا شد الثاني يرخي .. واااايد ارتحت لأسلوبه في النقاش تذكرت قبل يوم كان ينصح ويناقشني في مواضيع جديه بس كسرني يوم قال " أنا شريتج يوم كل الناس باعتج وإنتي بعتيني عشان تشريهم واحد غيري كان جتلج وأنا خذتج بعرس بط عيون الناس "
وقال " أنا مسامح من زمان بس إنتي مصره ماتشوفين إلا إلي تبينه "
حسيته صدق إنسان مكسور وحسيت اشكثر ظلمته وحسيت بصدقه في كل كلمه يقوله وكلامه هذا يرن في إذني لين ألحين .. المسكين سامح برغم كل شي .. قلت في نفسي هذا هو الحب الصدقي وذاك كله وهم وخرابيط وكلام فاضي ندمت إني ضيعت نفسي وشرفي عليه .. واكتشفت إنه ولد خالي هو الوحيد إلي كنت أحبه وأتمناه وأحلم فيه من صغري بس كبرت وانعميت عنه ..
خلاص بدينا صفحه يديده وسوينا أشيا وااااااايده مع بعض سوالي كل إلي قلتله إني أحتاجه .. حسسني بأنه الحياه حلوه وإنه وجوده فيها أحلى
تصدقن ..أمس ختمنا مع بعض أول جدول ختمه لنا .. وصار مرات يجاملني بكم كلمه حلوه عالطاير صحيح بعده يحاول بس محاولات مش بطاله .. وبدل ماكنا في غرفتين منفصلات صرنا في غرفه وحده .. وغيرت أرقامي كلها .. وخذيت رقم واحد بس استخدمه حق كل شي ..
تعرفن .. أحسن شي صارلي هالسنه هو شهر رمضان هذا .. عشان صارتلي فيه أحلى ذكريات في حياتي ذكريات كنت ادورها وكانت طول الوقت عندي بس العما هب عما العين العما عما القلب .. والأهم إني بفضل الله لقيت نفسي ولقيت حبي الضايع .. ولد خالي وأبو عيالي
والله يسامح الي كانت تحاول تعلقني بوهم وأنا قلتلها في ويها أنا ماظلمت حد وبنام وأنا مرتاحه ولاتردين وتفتحتين معاي هالسالفه وإن فتحتيها لاعرفج ولا تعرفيني
يابنات الله كبير والأمل فيه كبير .. أي وحده عندها مشكله تلجأ قبل كل شي حق الله نحن في شهر فضيل وفي أحلى أيامه العشر الأواخر استغلنه لصالحكن وأي وحده نفسها ضايعه منها تحاول ادورها صدقني بتلاقيها .. وبالنسبه للحب .. نصيحه لاتتعبن وانتن ادورنه هو الي بيلقاكن في بيوت أزواجكن إنشالله .. والله يسعد الجميع ويذوقهم طعم الراحه يااااااااااااارب
تستاهلين كل خير
الله يوفقج ويا ريلج ويسعدكم
والله يحفظج وريلج وعيالج
..
الله يوفقج ويخليلج ريلج وعيالج ان شاء الله
ونسمع انج استويتي احسن واحسن بعد
..
وبالتوفيق