الفزعه يابنات زايد تعالن نساعد ختنا

وكل المطلوب منكن (رقم هاتف لمستشار او شيخ حكيم في الامور الاسرية)

الاخت عندها مشكله وصلت لطريق مسدود مع زوجها وصلت لمرحله تسددت كل الابواب فيها وهيه عندها ولد وما تبا تقرر قرار تندم عليه بعدين فحابه تاخذ رأي مستشار في الامور الاسريه او حتى شيخ حكيم يساعدها في حل مشكلتها بحيث انها تسوي كل الي تقدر عليه عشان تنقذ حياتها الاسريه والله يوفقها يارب

فأنا قلتلها عندنا مستشارين مشاء الله عليهم عندهم المقدره على مساعدتها بس المشكله ان ما عندي رقم حد منهم مثل الدكتور المحرزي وغيره

فأنا طلبت منها انها تكتب مشكلتها بخط يدها عشان الكل يشوف بشو تقدرن تساعدنها

وتراه الأجر العظيم الي بتحصلنه في الدنيا والاخره مب من عندي ولا عندها عند رب العالمين والله يصلح حياتكن يارب واتمنى التفاعل يابنات وانا نصيت بنات زايد وكلي ثقه

هذي مشكلتها بخط يدها بس انا سويت كوبي بيست

الســــــــلام علــــيكم اعرفكم بنفسي متزوجه من سنتين اصبح زوجي هو المسؤل عن اهله بعد وفاة والدهم وزواج اخوه الاكبر وانتقاله لمنطقه ثانيه وتهربه من المسؤليه مشكلتي من يوم تقدم لي ماكنت مقتنعه فيه بسبب المسؤليه اللي حاملها والسبب الثاني ان ماعندهم اهل لانهم عايشين في منطقه بعيده جدا عن اهلهم وجماعتهم لكن والدي يمدح باخلاقه لانه يعرفه من صغره واخواني قالوا لي وافقي عليه بس ماغصبوني ابدا لانه طيب واخلاق وانا عارفه ان ماديته ضعيفه بس ماكان المال مشكله عندي حاولت اقنع نفسي به قلت مدام يعرف ربه وطيب صليت استخاره وماحسيت بشي وافقت وسبب كبير لموافقتي ان كل صديقاتي تزوجوا وانشغلوا بدنياهم الجديده حسيت اني وحيده وكبرت مع ان عمري وقتها23 وعمره37 سنه لما رحت اسوي تحليل الدم "وهو لازم عندنا للزواج" والله كنت اتمنى في نفسي ان احنا ما نناسب بعض شي في داخلي يقول مابيه ويصرخ لا طول الوقت طلب انه يشوفني مارضيت في البدايه لكن مع اصراره على اهلي وافقت في يوم الملكه جلست معه وكان اخوي موجود كنت في نفسي ابي اخوي يطلع علشان يتكلم واتعرف عليه واعرف اسلوبه في الكلام جلس يتكلم ويتكلم وانا بس اطالع في الارض قبل مايمشي قال ابوصل اهلي البيت وبكلم في الليل استحيت اقوله لا لاني من الناس اللي ماحب اكلم فترة الملكه واهلي كذلك ممنوع الكلام فترة الملكه لكن والدي سمح له بالكلام قال عشانه يتيم مهو كاسر بخاطره المهم كلمته ووالله من اول يوم انصدمت فيه طوال المكالمه وهو يتكلم عن ابو فهد صديقه من الطفوله عرفت انه مسيطر عليه وانا ماحب الرجال اللي احسه تابع لاحد قلت في نفسي لان ماعنده احد في المنطقه يمون عليه الاهو مثل اخوه لكن مع ثاني مكالمه وثالث مكالمه حسيته مثل ضرتي وهو ابو فهد قال وابو فهد سوا ويعدد محاسنه وانا مستحيه ارد وش اقول اصلا لما بدا يأثث الشقه قال تعالي معاي نختار الاثاث طبعا رفضت واهلي مستحيل يخلوني اطلع معاه قلت اثث على كيفك خذ اخواتك معك لانهم ذوق بس ماخذهم ورجع ابو فهد يتدخل في اتفه الامور اشتر كذا وسوا كذا وزوجي ينفذ لحد ماطفح الكيل عندي يوم قال ابو فهد يقول فراش غرفة النوم اشتره كذا في لحظة غضب قلتله ابو فهد يقول وانت وش تقول سكت مده ماعرف وش يقول قال لا مجرد اقتراح رحت لامي في الليل وقلت لها ماابيه قالت مدام رجال يعرف ربه توكلي على الله سكت وطلعت من الغرفه وانا في داخلي شي يقول مابـــــيه مرت ثمان شهور بسرعه ويوم العرس هموم الدنيا على راسي البنات يفرحون وانا قمة تعاستي والله كاني مخنوقه ولازال صوت داخلي يقول لا لا حزينه في يوم المفروض افرح اظلمت الدنيا في وجهي اول يوم نام لحاله والصباح بدا يتعذر قال امس كنت تعبان جدا لاني من الصباح اجهز امور العرس ومافيه من يساعدني كانه ملزوم بالاعتذار عن واجب لم يؤديه الصدمه الثانيهانه بعد الاعتذار خرج وكان اللي امامه ليست امرأه لها مشاعر ولاكرامه وكانه لم يستشعر بفداحة غلطاته عروس يتركني لوحدى من اول يوم شككت في نفسي قلت يمكن لم اعجبه ولكنه رأني واعجبته خرج ولم يرجع الا الظهر تغدينا برا وعندما مر اسبوع ارجعني عند اهلي سالوني ليش جيتي قلت اسالوه هو وماقالوا لاحد اني عندهم خوفا من كلام الناس ارجعني عند اهلي وجلس ينتظر اصدقاءه يتصلون عليه اذا بيطلعون خلاني يومين وما جا اخذني الا لما اتصلت عليه عندما رجعنا البيت صار روتينه يطلع من الصبح ويتغدا عند اهله واحيانا يجيب غدا من عندهم وينام واللي يحز في النفس العصر اسوي القهوه ويشرب فنجال قهوه ويطلع كنت اجامله كثير في البدايه في كل شي ثم لما مللت تعامله معي صارحته بكل شي وقلت له انا مو مرتاحه لها الوضع وكثرة خروجك من البيت قال انا هذا طبعي وقلت له لما ورجعتني لاهلي اول اسبوع مااحد كان يدري اني فيه خوف من كلام الناس اعتذر وقال انا ماكنت ادري والنقطه هذي راحت عن بالي حتى لما يجلس معاي يظل ساكت ولا يتكلم الا كلمتين ويسكت لما اساله بس مع ان جواله طوال اليوم يرن ويتكلم ويسولف اكتشفت من كلامه القليل معاي ان اصدقائه الحوا عليه بالزواج وقالوا له اذا ماعندك احد يخطب لك احنا نروح معاك يعني ماكان في باله الزواج وبعد زواجنا باربع شهور قالي بسافر مع اصحابي مع العلم انه ما سافرنا شهر عسل راح اسبوع وانا حسيت انه اناني يدور سعادته ووناسته كانه لم يتزوج للان خلال سنتين سافر اربع مرات لحاله بعد خمس شهور حملت ولما بشرته ما انبسط بل بالعكس مسؤليه جديده زياده على مسؤلياته من يومها اذا جيت لاهلي يخليني بالاسبوع والاسبوعين ومايجي الا لما اقوله تعال حتى مره كنت عند اهلي ورديت على التلفون الا تقولي خالتي انتي دايم عند اهلك ارتبكت وقلت هو مشغول هاليومين قالت بس انتي دايم عندهم المهم غيرت الموضوع وحسيت اني اكرهه لانه دايما يحطني في مواقف محرجه وانا واهلي دايما نبرر له ونغطي على عيوبه قدام الناس مو متحمل المسؤليه حتى في اقل الاشياء مايعرف الا يعطي المصروف ويلبي اغراض البيت حتى اهله هم اللي يجيبون اغراضهم بانفسهم حتى الاشياء الضروريه هم يجيبونها شايل يده من كل شي وانا لما اطلبه شي لسوق او للتمشيات يقول روحي مع اهلك حتى لما رزقني الله بولد لما جاتني الولاده كل امرأه تحتاج زوجها بجانبها لما اتصلت عليه قلت له تعال ودني المستشفى قال خلي اخوانك يودونك وسكرت في وجهه بعدين جاء حتى ولده ماحبه ولا يكن له اي مشاعر ولما قلت له شلون بتربي الولد وانت ماتجلس في البيت قال ربيه انتي قلت مدام انت مومتحمل مسؤلية بيت ومنت كفو ليه بلشتني معاك واخذت ذنبي وذنب هالولد ولما اناقشه في موضوع واكون على حق يزعل باالاسبوع والاسبوعين مايكلمني لين اجي انا اراضيه مع انه هو الغلطان قبل شهرين قلت له حط في بالك ابي اسافر في العطله نغير جو وابي جماعتك يشوفون ولدك ويتعرفون عليه قال انا لو بسافر بسافر لحالي مابيك تروحين معاي انا هنا وانفجرت في وجهه ليه ماتبيني اروح معك انت متفشل مني ولا وشو انا اللي متفشله منك وقاعده اغطي عيوبك وحركاتك الغبيه انا واهلي عشان مانجرح شعورك انت اصلامقطوع من شجره وتبي تقطع ولدك معاك " لان له ثمان سنين ماراح لاهله" وزعل كالعاده قلت له لاتجي الا لما تتفاهم مع اهلي ثلاث مرات وانا اجيك اقولك اجلس نتفاهم تقول روحي وسكري على الموضوع انا ماني مكمله معاك العيشه بهالطريقه بموت من الغم والنكد معاك الان لي شهر ماكلمني ومن شهر انا عند اهلي سافروا وجلست انا واخوي لما اخذ اجازته سافر ورحت معاه وسألونا اهلنا هناك عنه قلنا جلس يومين وراح قعدت اناواخوي عشرايام ولاسأل على ولده وقبل مانمشي مرض وارتفعت حرارته ولا درى عنه حتى اخوي سألني ليه مايتصل عليكم وقلت له كل شي قال لارجعنا اتفاهم معه قلت انتظر اذا رجعوا اهلي علشان امي تكون حاضره رجعت من اربع ايام انا واخوي من السفر طبعا ولافكر يمر الا يوم ارتفعت حرارة ولدي ثاني مره كان اخوي بيوديه المستوصف وانا مارضيت قلت خل ابوه يوديه وارسلت له من العصر ان ولدك تعبان تعال وده المستوصف الحين وطبعا ماشفناه الا عقب المغرب لما جا قال انا برا انتظر ركبنا السياره مثل العاده صمت مطبق ولاكلمه كان ينتظرني اني ابدا الكلام مثل ماعودته لكن انا قلت له من اول مالك كلام معاي كلم اهلي وضعك مايحتمل ونفس الشي ثاني يوم لمارحنا المستوصف موعد ثاني من ركبت معاه صمت رهيب مع العلم ان هذا طبعه حتى لما يجيبني عند اهلي طول الطريق النصف ساعه وهو في ملتزم الصمت الرهيب بس انا اللي اتكلم بعدين التزمت الصمت مثله لاني تعبت بس انا اللي اتكلم طول الطريق والله انه قرفني في شي اسمه زواج ولا يراعي مشاعري واحتياجاتي صرت اطلبه فلوس محتاجه كنت او مو محتاجه لانه مايعرف الا يتلقى اوامر وتلبية طلبات انا الحين عند اهلي انتظرهم يجون بالسلامه الاسبوع الجاي علشان يتفاهم معهم يايغير نفسه ويتحمل مسؤلياته ياكلن يروح لحاله فكرت واحنا جايين من المستوصف اقوله روح مكان نتفاهم فيه بس هو ماعنده اسلوب تفاهم واسلوب كلام حتى اخوي ملاحظ هالشي يرتبك مايعرف يرد او يناقش اذا واجهته بس ضميري يأنبني ماخفيكم اخواتي اني افكر بالطلاق لاني من الاساس من ايام الخطبه انا مو مرتاحه معاه ولاهو ريحني ولا مرتاحه لاسلوبه وتعامله معاي وطريقة تفكيره للحياه مايفكر لمستقبل ولده بل دعا عليه على ولده اللي من لحمه ودمه لان انا وولدي حاجه زايده في حياته واخذناه من مهمته الاساسيه وبيته الاساس مسؤلية خواته وامه ماهو متحمل هم احد همه من يعزمه بكره ووين يسهر مع شلته والله لما اشوف اختي وشلون سعيده في حياتها ومبسوطه مع زوجها موحسد لكن مقارنه احس اني ضيعت عمري معاه هل انا غلطانه لاني عطيته اكثر من فرصه صدقوني بديت اكره انانيته واكرهه واعذروني للتطويل

يالله يابنات روني الهمه في عمل الخير