اللولب ثقبلي الرحم!!

السلام عليكم بنوتات.. اليوم بخبركم قصتي مع اللولب وياليت اللي صاير معها مثلي اتخبرني واتطمني كيف اتصرفت
بعد ولادتي الثانيه قررت اركب لولب على اساس انظم الحمل.. ومع الرضاعه وقف الحمل لمدة سنه
وماكانت تجيني الدورة بسبب الرضاعه جاتني اخر شهرين بس اللي هم كانوا 11 و12-2017
وبعدين اكتشفت اني حامل.. رحت لدكتورة من بداية الحمل وحاولت اتلاقي اللولب وما شافته لا في الرحم ولا في عنق الرحم..
وقالتلي ع الاغلب نزل مع دم الدورة وانتي ما شعرتي فيه..
وفيه حالات قلييييله ممكن يثقب الرحم ويطلع لتجويف البطن.. ويشيلولها اياه بعملية
المهم الحمدلله تم حملي على خير وولدت يوم الخميس الماضي 20-9
وذكرت الدكتورة انه حملي صار فوق اللولب وانه لازم تتأكدوا من المشميه لو كان فيها او لا.. ماحصلوه بالمشيمه
فاخذوني وسوولي صورة اشعه وطبعا هنا كانت الكارثه.. لاقوه موجود في الامعاء (القولون) تقريبا حسب ماشافت فنية الاشعه
وقالتلي انها ما مرت عليها حاله مثل هالحاله
وخبروا الدكتورة والدكتورة قالتلي عندي مراجعه يوم الاثنين 24-9 يعني بكرا ان شالله وبسوولي صورة على جهاز اوضح ومن خلال هالصورة بحددولي كيف الاجراء القادم
طبعا ما اخبركم عن النفسيه اللي في الحضيض وديت بناتي عند اهلي بالفجيرة وقاعده مع البيبي وزوجي واستنى بكرا بفارغ الصبر
يارب انك اتهون علي.. البيت بدون بناتي هدوءه قاااتل والتفكير بالعمليه ذابحني.. ادعولي الله ييسرها علي..
واللي صار معها مثلي ياريت تخبرني كيف كانت طبيعة العملية وشو الوضع بعد العمليه
الله يسترها معي يارب

سلامتج حبيبتي ماتشوفين شر مشاكل اللولب ماتنتهي اشوف حبوب منع الحمل للي تبي اتنظم وايد احسن لاني وايد اسمع ان اللولب يسوي مشاكل وخاصة اذا الدكتورة مب متمكنه من تركيبه او ماعندها الخبرة الكافيه لاتحاتين انشاالله بتقومين بالسلامه وبتردين عيالج البيت وبتستانسين ابحسهم لاتفكرين وايد لان النفسية تلعب دور كبير فالعمليه اتوكلي على رب العالمين وقولي يارب يكون الله في عونج اختي

سلامتج عزيزتي وماتشوفين شر يارب وان شاء الله ربي بيفرج عنج همج ويقومج بالسلامه انتي لاتقتلين نفسك بالتفكير وادعي ربج سبحانه الله وتعالى لان الحزن زياده علىاللوزم راح يقطع منج الحليب ع البيبي
وكلي امرك لله سبحانه وتعالى واطلبي منه اللطف في القضاء وان شاء الله ربي يهونها عليج
ماتعرفين الخيره فيما اختارها الله
وربي بيحفظج للبيبي وبناتج وزوجك ان شاء الله

الله يسر امرج يا رب و يسهل لج

يمكن الدكتوره ما ركبته لج صح …

او انتي سويتي رياضه او حركه بالغلط خلته يطلع من مكانه..

انا اعرف وحده حملت عاللولب بس كان نازل و طلعته لها الدكتوره عادي ..

الله يهونها عليج …و ان شاء الله تقومين بالسلامه حبيبتي…

ماتشوفين شر ان شاءالله

الله يكتب لج الخير بجميع خطاويج ويسر امورج يارب ..

ان شاء الله تعدي العمليه على خير يارب ..