اللي حملت حمل خارج الرحم ممكن تفيدينا بتجربتها وكيف نتجنب هالشي ؟

مرحبا الغاليات

كل عام وانتو بالف خير

اللي حملت خارج الرحم

ممكن تفيدينا بتجرببتها .. كيف اكتشفتي الموضوع ؟؟

وشو هي الاسباب اللي ممكن تسبب هالشي وشو هو العلاج ؟؟

هل في طريقه لتجنب الحمل خارج الرحم فالمستقبل ؟؟

ويزاكم الله خير

اول حمل لي كان خارج الرحم والحمدالله اكتشفوه ببدايته
والحمدالله كان من الله يعني مكانت عندي التهابات ولا شئ رقد وني بالكورنيش ٣ايام كان عندهم أمل يكون داخل الرحم لان قالولي لو داخل الرحم بعد ما بيعيش لانه صغير وآخر شئ تأكدوا انه برا وعطوني أبرأ كيماوية عشان ينزل وعقب قالولي لا تحملي إلا عقب ٣ اشهر وأنا خليتها ٦ اشهر قلت أتأكد واطمن طلع مفعول الدوا مني وماخليت مكان ما سويت عندهم فحص لإزم تتتاكدين إذا فيك التهاب ولا وتخلين ريلج بعد يفحص
شوفي أنا كان حملي خارج الرحم من وبويضه باليمن في دكاترة قالولي لو حملتي من يمين احتمال يكون نفس الشي ولو صار نفس الشي بنطر نقص أنبوب اليمين فقترحت عليا دكتورا تتابع فتره التبويض ومن وين تنزل لان مرات تنزل من يسار أو يمين ومن تأكدت نزلت من يسار صار الحمل والحمدالله احين أنا بتاسع وادعيلي أقوم بالسلامة

انا حملي الثاني كان خارج الرحم اش لون اكتشفته حسيت بالام زي النغزه بس قويه سرت المستشفى وبهذلوني عبالهم الزايده وانا ميته من الوجع اخر شي سوولي فوق الخمس صور اللي هو السونار عبال ما اكتشفوه وعلا طول ع العمليات لان الحمل كان فالانبوب اليمين واخترب عندي الانبوب و شالوه بعدها ب ثمان شهور حملت ولله الحمد طبيعي و الشي الوحيد الممنوعة منه اللولب لانه احتمال او تصير فرصه اكبر انج تحملين خارج الرحم مره ثانيه وبس

الصراحه الموضوع يخوف الله يكون فالعون

والحمدلله يوم الله سلمكم وان شاء الله يارب تقومون بالسلامه وتفرحون بعيالكم ^_^

انا حملت مرتين برع الرحم..

المره الاولى كان فيني عواااار فظييييع ولما اروح اشيك يقولون ان الحمل صغير وكانو بعدهم مامكتشفين انه برع الرحم
بس عقب زااااااااد الالم فيني صوب اليسار وكنت ارجع منه وماكنت اروم الحمام عزج الله ولما قلتلهم جي سوولي اشعه وعرفو انه حمل برع الرحم وعطوني ابر كيماوي وقالو ما احمل لين 6 اشهر …

وعقبها سرت اسوي اشعه للفالوب وطلعو لاثنين متسكرين ومالي حل غير اطفال انابيب

والمره الثانيه حملت عقبها سنه ووبعد جهة اليسار وماكنت ادري اني حامل لان كان ينزل مني دم وانا اتحرا الدوره وعقبها ب5 ايام تقريبا ياااني عووااااااار فظيع ويا دوخه ويا هبووووط بالضغط وماكانو يعرفون السبب وكنا متوقعين حصى المراره ..
تخيلي كنت بالمستشفى من الساعه 11 لين 5 الاربع قالو اني كنت حامل ومنفجر ودخلوني ع طول العمليااااات وكان عندي نزيف لان الحمل كان منفجر من فتره وانا ماكنت ادري وكان عد جهة اليسار

والحمدلله ع كل حال

وحاليا انا حامل الشهر السابع باطفال انابيب
والله يرزقج الذريه الصالحه والصحه ان شاء الله

أنا بعد حملي الاول كان خارج الرحم .. ما حسيت ب اي اعراض ولا شي رحت للدكتورة ك موعد عادي ومتحممممسه أني بجوف البيبي كنت توني ٥ اسابيع على ما أظن .. صدمتني الدكتورة قالت مامبين شي مع انه المفروض يكون بحجم الدرهم طبعا أنا ماعرف انه فيه شي اسمه حمل خارج الرحم توقعت انه البيبي توقف عن النمو وهي ما قالت شي بس طلبت فحص هرمون الحمل وبعد ما كنت اعرف انه هالفحص لازم يتسوى مرتين كل ٤٨ ساعة المهم اتصلنا فالمستشفى عشان نعرف النتيجة بس قالو لنا هيه حرمتك حامل وانا ماعرف شسالفة عقب ردوا هم اتصلوا فيني قالوا لازم أتين الحين تسوين سونار تحت فقسم الاشعة قلت أوك رحت سويت وبعد مأخذت منهم لاحق ولا باطل ورديت البيت .. ع الفير يأني عوار فظيييييع فخاصرتي وظهري ورحت الطوارئ عطوني مسكن وبس سألوني شليتي شي ثجيل نزل منج دم قلت لا .. ورديت البيت رقدت نشيت العصر أجوف نازل مني دم وبعد رحت المستشفى والدم كان خفييف فقالولي بأجر روحي استشيري دكتورتج رحت سويت فحص دم مرة ثانية ( عشان يجوفون نسبة ارتفاع الهرمون ) ودشيت عند الدكتورة قلت لها أنا انزف ع الخفيف من يومين بس ماشي الم سوت لي سونار وعلى طول قالت الجنين مب فالرحم لازم ف اسرع وقت نعطيج الإبرة لانه لو زاد الهرمون ممكن يسوولي عملية بس الحمدلله عطوني الإبرة ورقدوني ٣ ايام عشان يتأكدون انه ماشي نزيف .. خذت الابرة الخميس وبدا عوار مثل الدورة فظيييييييييع يوم السبت من الفير لين فليل وانا أصيح طول اليوم يقولولي ما نقدر نعطيج مسكن اخر شي يت الدكتورة سمحتلي بالمسكن ورخصونيي .. المهم نصيحتي حق كل وحدة من تعرف انها حامل تجيك اول ب اول عشان مايكبر الجنين خارج الرحم لا سمح الله ويسوون عملية .. بس اتسوين فحص هرمون الحمل كل ٤٨ ساعة اذا كان يرتفع الضعف يعني كل شي أوك واذا ارتفع بنسبة اقل عن الضعف يعني خارج الرحم .. وبس هاي تجربتي وفهالحمل وايد وسوست فالبداية تعقدت بس الحمدلله تطمنت ..