اللي ريلها طول الاسبوع ف الداوم وينزل الاويكند بس ،،ادخلي بليز

مرحبا

من العنوان عرفتوا منو اقصد

انا معرسة من 8 شهور تقريبا وحاليا حامل ف الشهر 7
وساكنة ف بيت اهل ريلي ف ملحق بروحنا
وريلي طول الاسبوع محد ف بوظبي دوام وينزل ف الويكند بس

صار لي موقف الويكند اللي طاف واتضايقت من ريلي وموقف يضحك بعد خخخ

ريلي وصل من الدوام الساعة 1 وشوي الظهر

وانا كنت ناشة متاخر يعني عالساعة 11
رحت عند خالتي اتريق
واسولف عندهم

وانا لما كنت عند خالتي اتصلت له وسالته انت وين ما كنت متوقعة انه طلع من وقت

المهم رمست واساله انت وين قالي طلعت من العين

يعني ما باجي الا ساعة ونص وايشرف سي السيد

وعاد انا هني ارتبكت كنت محطية ف شعري زيت
وحالتي يرثى لها خخخخ
وفزيت من عند خالتي وسالتني وين رايحة قلت لها بروح اخذ الدوا

اوني عاد

واركض الملحق واروح اسبح وسمعوا الهبلة شو سوت
بدل ما اتحط على شعرها شامبو حطت شور جل

خخخخخخخخ
من من كثر ما مستعيلة واحس عمري ما بخلص وهو على وصول

ولحقت عمري ولبست واستشورت الشعر وكنت شارية لبسة حلوة من سبلاش جي كلها كسرات والونها حلو اونه لبس حوامل

ودخت المحلق وربته

وشوي واشوف بو الشباب وصل والحين عاد زعلت

اوني انا كاشخة ومتعدلة وهو يا ويلس يمكن نص ساعة عندي وعقب يابو الغدا واتغدى وياي وطلع
انا قلت هو الحين بيرد والا الحبيب يلس عند خالتي لانه عيال اخوه الصغار يايين هناك وخواته الثنتين يايين ويا عيالهم

وانا اسمع اصواتهم من المحلق
وتميت يالسة اترياه

بس طنشي

ويالس عندهم يسولف
وبعد ساعة يا ويابلي بنت اخوه الصغيره (عمرها 3 شهور) ووقلت ما عليه ويلست العابها وانا وياه وشوي ورقدت
قالي خليها ف حجرتنا عشان هناك حشرة اليهال قلت مب مشكلة

خذت البيبي وحطيتها على شبرتنا وهو رد وطلع
وشوي اسمع صوت اخواني الصغار وامي وصالين عندهم

وهو لا رد لي الملحق

كمل اليلسة هناك
وانا يالسة اطالع التلفزيون وميتة من القهر

مب عارفة شو اسوي اروح ابدل وايلس عندهم والا اتم يالسة اترياه

شوي واخواني الصغار دشو عندي عاد انا استحيت وانا كنت لابسة اشوي مفصخ من الصدر

قلت لهم طلعو انا بييكم الحين

رحت ابدل
اوني بروح عندهم

بس عقب هونت

تميت يالسة مقهورة واطلعت التلفزيون
واصيح
موول ما فيه ريلي احساس
يوم يت الساعة 4
دش ويلس ف الصالة وفتح اللاب توب ويلس عن النت شوي يقرا الجريدة ووانا مطنشتةه واتابع التيفي
وشوي نشت بنت اخوه
وشلها وداها عندهم
ورد وقال انا برقد
وسالني شو بلاج

فيج شي
لانه شكلي كنت مضايقة

قلت له ببرود لا ما فيني شي

دش الحجرة واونه بيرقد
تميت ف الصالة اطالع التلفزيون
وبغا يرقد ما قدر لانه كان ف الحوش حشرة الصغار يلعبون وااايد ينسمع الصوت

دشيت الحجرة اوني بروح الحمام
قالي شكلي ما برقد من الحشرة

طنشته ودشيت الحمام وخذت لي ماي واوني برد الصالة قالي تعالي
قلت له بروح الصالة
قالي شو بلاج قلت له ماشي
قالي يلسي عندي شوي
يلست على الكرسي بس ما اصد ف ويه
وهو يطالعني ويرمسني
وانا احس بمحترقة من داخلي
قام عاد يتلزق اونه عاد حبيبتي من هالكلام
وتعالي عندي عالشبرية
وانا مطنشتنه

وشوي وشوي ييت صوبه على الشبرية
وخبرته شو فيني

قالي ما كنت اقصد وانا اخترشت يوم شفت الجماعة كلهم ف بيتنا خواتي وخالتي وعيالهم
ويلست اسولف عندهم
قلت له كان بامكانك اتي وتزقرني ايلس وياكم
مب اتروح بروحك

وانا حق منو كنت لابسة وكاشخة مب حقك

يعني انت بهالطريقة بتخليني مرة ثانية ما اختم بك ولا البس واكشخ يوم اتيي من الدوام
قالي حسيت انه هالوقت ما يحتاي لو خليتي الكشخة حق فليل
ويلسنا نتاقش وهو يعتذر

واتصالحنا

المهم
اسمحو لي اا طولت عليكم

بس حبيت اتعرفون السالفة

بعد هالوقف شو رايكم

هل اتحسون اطنشه اول ما يوصل من الدوام

واخلي كشختي حق الليل والا اتم على نفس الوضع واتم اكشخ حتى الظهر؟

انتو هل صارت لكم نفس اللي صار لي

يعني في مرة يا ريلج من الدوام وانتي كاشخة وهو طنشتج وانشغل بشي ثاني؟

ابا اسمع خبراتكم

كيف تقضون الويكاند ويا ريلج ؟

خصوصا اذا ما عندج عيال
وانتي ساكنة ف بيت اهل ريلج

كيف يتضون الويكاند
هل اتميت لاصقة ف ريلج والا اطنشينه

انا احاول اطنشة

بس ما اقدر
بحكم اني ما اشوفه الا ويكند

شو رايكم

ملقوفه

بس ماحبيت اطلع بدون مارد عليج

الله يوفقج ويسعدج ويسهل ولآدتج

ماعرف والله..ان شاءالله المعرسات يفيدونج
والله يوفقج الغلا..

الله يسهل ولادتج يارب،،
انا نفسج ما اشوف ريلي الا في الويكند انا ادوام ساعات يوصل قبلي البيت او انا قبل يعتمد على الوقت والجو .
ساعات اخلي الكشخة حق الليل يوم يرقدون الصغاريه وساعات في النهار اذ ما عندنا حد في البيت بس ترى احسن لج الليل.
والله يسعدج دوم انشاء الله

ههههههههههه

تستوي جي بس انتي معاه في بيت اهله لازم تراعين هالشي وما تخلين هالشي ياثر فيج ؟؟؟

لازم تتحملين..

اكيد لو كان غفي بيت روحكم ما كان جي الوضع^

لا تزعلين وخلي هاليومين … بس وناسه كل مرة سوي لج برنااامج وحركه …
عسب يحس بالتغيير ..

والريااااااااااااييل جي ^^
انا بعد تصير هالمواااااااااااااااااااقف بس عادي

شكلج ما فيه عيال عندكم يعني توكم بداية الزواج .. شوفي .. احنا مشكلتنا يالحريم مشكلة!! يوم نفكر نسوي الشي نتوقع اننا نشوف بالمقابل اهتمام من الريل . او كلمة حلوة .. او حتى مجاملة طيبة من الريل بس للاسـف اقولها وانا اضحك : بعض الرجال اغبياااااااااااااااء بدرجة ما تتصورينها ..

يعني حرمتك سوت كل هذا عشان منو ؟ عشان تشبع نظرك وانتظارك يعني عشانك انت .. يعني لازم عالاقل مثل ما اهلك واخوانك وعيال اخوانك اخذو من وقتك .. هاي زوجتك ام عيالك .. لها حق عليك .. انت لاهي عنها طول الاسبوع بالشغل او شو ما كان .. مالها حق تقعد معاها ؟

من رأيي قعدي معاه وتناقشي بالموضوع / ترى الريال احياناً يكون غاااافل .. فهمتي قصدي

شوفي حبيبتي انت طول الأسبوع ماخذة راحتج في اللبس ،يعني لبسج عادي ،شعرج ،موب ملزومة تحطين الميكب،، فاتحملي هاليومين في الويكند فنشي من وقت كوني رايقة حق التعديل واللبس السنع ،
إذا خوات ريلج متعودات يين عندكم فالبسي دراعة شيك على شكل الفستان البسيط،، أو بدلة كاشخة وفي نفس اليوم علشان تقدرين تطلعي عندهم……… طبعا حق العشا أكيد مجهزتنه من الصبح
وما عليج إلا التسخين لأنج مابتضطرين تسبحي وتخربين كشختج ، بعدين يا وقت الرقاد أو السهر
وماحد بيدخل عليج فلبسي اللي بخاطرج مفسخ، ساتر ،قميص نوم ، بيجاما، ولا تزعلين حبيبتي إذا ريلج ماعبرج……… تعدلي حق نفسج، خليج واثقة من نفسج، مع الأيام بيحس على دمه عنده القمر وهو ماداري …….. كلنا في الهوا سوا لكن شو نسوي نحبهم غصبا عنا