اللي عيالها يعانون من حساسية الصدر محتاجة خبراتكم في هالموضوع

السلام عليكم بنات وامهات ..

بنتي عمرها 5 سنيين وحساسية الصدر وايد متعبتنها.. بغيت اللي مرت بنفس معاناتي ويا عيالها .. تخبرني كيف العلاج اللي اتبعته .. اللحين مستمره معاها على البخار .. بس الكحه مب طايعه اتخف .. وحتى فرقادها ما ترتاح .. صدرها مضايق و ما تتنفس بسهوله ..

ويا ريت لو تعرفون دكتور مختص بحساسية الصدر عند الاطفال ادلوني عليه ..

ويزاكم الله خير

هلا اختي ان كنتي في بوظبي سيري عند الدكتور عبي هنداوي في مركز الهنداوي الطبي، أو د.أحمد حلمي في المركز الطبي السويدي ، والله يحفظ بنتج

اذا انتي من الشارجة او دبي
عندج في الزهرا
الدكتور عماد
تخصص امراض صدرية اطفال
سوى لولدي كورس لمدة 6 شهور
و الحمدلله . . هذا اول شتا ما يتعب ولدي فيه
و لا دوم , , هو منوم في المستشفى

شوفي اختي جربي اللبان الذكر نقعيه من الليل حتى الصباح مثلا فنجانين مالة القهوى للبان ذكر

ع تغريبا ماء صحه لتر واحد معروفه الغرشه الكبيرة اوكى وخليهم حتى الصباح منقوعين

يوميا وع الريق يشرب اوتشرب كاسه اونصف كاسه للصغار حتى يتعودو عليه او اي شخص ان كان كبير او صغير ينفع للكل انشاءالله وعلاج طبيعي وانا مجربته لعيالي وريالي بصراحه روعه ماشاءالله

وفوائده بعد تقوية للقلب والدماغ ومكافحته للبلاده والنسيان
واوجاع الصدر وضعف الكلى والهزال و يخفف من السعال نهايا
وبأماكنج تطحنينه مثل البودرة او ع ماهو حب ويتنقع شغله سهله ومأمنه وطبيعيه

وتخلينها في التلاجه بعد الانتهاء منها وكل ماتبين منه خدي قياسج وحميه في المكرويف شويه يشرب ذافي وبالشفاء والعافيه وجربو كلكم وانشاءالله بتدعولي

هلا اختي . مشكورة عالرد. بس انا بغيت دكتور قريب .. في دبي او الشارجة

ويزاج الله خير

مشكورة اختي ..ان شاءالله بسير اشوف الدكتور فالزهرا .. والله يعافي ولدج ويحفظه من كل شر

يزاج الله خير اختي عالوصفة .. انا فعلا جربت اللبان بس للاسف ما داومت عليه .. ان شاءالله بحاول اني اداوم عليه ، و قريت عن البابونج انه مفيد حق اللي عندهم ضيق فالشعيبات الهوائيه .. بجربه ان شاءالله .. وعسي خير