حبيت أتشاركوني بهذا الموضوع لأني كثيييييييير محتاره
بالنسبة للمناهج شو أحسن منهاج للتدريس البريطاني والا الأمريكي
وليش ……….
أتحفوني بأرائكم الحلووووة
سمعت ان الامريكي اسهل مااعرف يمكن
اما الامريكي كل المواد بالانجليزي وكل. حفظ فيه وايد واااجبات فيه
وفيه امتحانات وايد بعد
كنت ادور في الموضوع سار لي فترة الصراحة محتارة اسجل ولدي الله يحفظه على اي منهج امريكي او بريطاني
الامريكي عملي اكثر ومتطلباته اقل وهو يعتمد بالدرجة الاولى على تنمية مهارات الطفل المختلفة،، اذا ناوية يكمل دراسته في امريكا او داخل الدولة يدرس بهذا النظام (( اي واحد خلص دراسته الثانوية سواء منهج بريطلني او امريكي او غيره لازم يقدم امتحان SAT قبل دخول الجامعة في امريكا وهو نفس نظامنا داخل الدولة))
المنهج البريطاني متطلب جداً،، يعني اذا الولد ذكي وراكز ووراه حد يمسكه للدراسة عليج بالبريطاني هو نظام دراسة نظري بالدرجة الاولى،،لكن بعد الحلو فيه انه ممكن يقدم امتحان وهو عمره بس 16 سنة ويدخل جامعة تخصص ادارة او سياحة او غيره
لكن لو كمل لين الصف 13 وخذا مواد علمية ممكن يدخل جامعة تخصص طب وغيره من تخصصات علمية
يعني الولد اللي مب مال دراسة يوصل 16 ويتخصص في مجال غير علمي
والدريس يكمل
الامريكي لا ماعندهم جذي لازم يخلص لين صف 12
معظم مدارس المناهج الامريكية في الدولة يوفرون امتحان البكالوريا الدولية IB
في شغلة بعد
المنهج الامريكي عندهم مادة العلوم مادة وحدة،،(( شاملة))
المنهج البريطلني على ماذكر من الصف السادس العلوم عدة مواد مب مادة وحدة،، كيمياء فيزياء احياء (يعني متخصص)
سهل دراسياً للطالب نقله من نظام منهج بريطاني الى مدرسة نظام منهجها امريكي (بيشوف الفرج خخخخ 
)
العكس.. صعب على الطالب الا اذا كان درّيس
نقل طالب من بريطاني الى امريكي بيأخره سنه دراسية لكن في النهاية نفس الشي،، كيف
مثل ما انتم عارفين النظام الامريكي 12 سنة دراسية
البريطاني 13 سنة دراسية اذا كمل
اذا كان طالب صف سادس في البريطاني بيروح امريكي يحطونه في الصف الخامس لكن في المتوقع والمخطط له اذا الله راد يكمل بيوصل صف 12 في الامريكي ( لو كمل في البريطاني بيكون صف 13) يعني في الحالتين بيخلص نفس السنة المتوقعة لاكماله تعليمه.. بس لو غيرت الام رايها ورجعت ولدها بريطاني مابيرفعونه صف،، بيخلونه نفس الامريكي يعني اذا كان صف سابع امريكي يدخل سابع بريطاني معناته خسر سنة دراسية
الجامعات القوية في بريطانيا في الغالب ماتقبل الا اللي مخلص دراسة نظام بريطاني ( مب متأكدة من المعلومة قريتها في النت مدرس هندي كاتب هذا الكلام) وتأكدوا بعد لان كل سنة تفرق عن اللي قبلها ونظام البكالوريا الدولية (الامريكي) كل سنة تقريباً يحصل قبول من كذا جامعة حول العالم فلين يخلص الطالب دراسته تكون شهادته مقبولة حول العالم والله اعلم
وجهة نظري ممكن الام تدخل عيالها منهج بريطاني في البداية يعني من الروضة وتخليه يكمل وتشوف حسب قدرته اذا ماقدر يكمل في المراحل التالية يعني على صف سادس مثلاً تحوله منهج امريكي
للعلم المنهج البريطاني يقبل روضة اولى من عمر ثلاث سنوات
المنهج الامريكي يعتمد على المدرسة بعضهم ثلاث سنوات وبعضهم لازم فوق ثلاث سنوات ونصف وبعضهم اربع
راجعي المدرسة بالنسبة للعمر وبالنسبة لتوفر الشهادات الدولية المعترف فيها
الله يوفقنا وذريتنا لكل خير برحمته ولطفه وكرمه اللهم آمين