الي خايفه من الخياطه التجميليه تدخل .

في يوم السبت الساعه 7 وعيت ريلي من الصبح يقولي شو فيج وأنا أقوله يالله موعد الخياطه قالي يالله زين..
نسيت أقولكم يوم الخميس إتصلت النيرس عشان تتأكد من الموعد أول ما رديت أسمع صوت هنديه أقولها رونق نمبر تقولي فلانه قلت لها هي قالت شو بيسوي خياطه قلت لها هي إن شاء الله قالت ما في ينسى شيل شعر تحت و سوي ريوق قلت لها شو هذا كلام أنا في معلوم كيف أنا ما يشيل شعر…تميت أضحك عليها بعدين أقول معقوله في حريم ما يشلن الشعر؟؟
المهم نرجع للأساس..طول الأسبوع و انا ما افكر بهاليوم عشان ما أخاف..حتى في نفس يوم الخياطه رايحه و أنا أسولف و أضحك الظاهر من الهستيريا…
يوم وصلت العياده إستنيت شوي برى ألا و أشوف الدكتوره نازله من السياره شوي و لحقتها و أنا في العياده أحس ريولي ما يشلني و يرجفن..يتني النيرس قالت يالله…آآآآه بديت أخاف كأني رايحه المشرحه..شوي دخلت الغرفه قالت عقي العباه و عقيتها و قالت عقي ملابسج الداخليه و تعالي إنسدحي..بدى الرعب يزيد و أطرش مسج لريلي أقولها لا تنام أريد أكلمك..و شوي أحط سماعات الأذن قرآن..ودخلت الدكتوره قلت لها يادكتوره أنا خايفه قالت لسه ما بدينا قلت لها أدري بس طمنيني قالت هيه بس مجرد وخزه والباقي ما بتحسين فيه..و شوي عطتني الأبره في ثلاث اماكن..تحسين بنفس الأبره تدخل شوي تقرصج بعدين تشتغل..و لا تحسين بشي بعدها..تعرفون إنصدمت يوم قالت لي إنتي تمتنين و تضعفين قلت لها شو أسوي مش بيدي يوم أحمل أمتن..قالت لا هالشي بيدج..ليش تمتنين قلت لها ليش هالشي يأثر قالت أكيد ياثر وايد و الوحده يوم تلعب رياضه يعني كم بيرد لا يرد..قلت في خاطري صدقها هي كله كم شهر نلعب رياضه و يوم يرجع الجسم تركناها…
خذت تقريباً40 دقيقه و هي تخيط و إحنا نطلع من موضوع و ندخل في موضوع سألتني قالت إنتي تريدينه ضيق وايد قلت لها أهم شي ما يأثر في الولاده قالت أكيد ما يأثر…
و آخر شي قالت لي أنا رفعت لج العضله قلت لها زين..(لأن من الولاده حتى العضلات ترتخي..)
المهم كل ما أقولها ها خلصتي تقولي يا دوبني بديت يعني واايد لاحظتها تخيط في الي داخل..و بعدين خلصت و قالت لي إرتاحي شويه لحد النيرس ما تيج..و ظليت شوي و يتني الدكتوره بورقة الأدويه و تشرح لي قلت لها دكتوره أريد مرهم ميبو للجرح قالت بعطيج الي أحسن منه لأن ميبو ريحته كريهه و هذا ما فيه ريحه و مفعوله قوي…و عطتني أكياس أذوبهن في الماي للإمساك..و حبوب للألم و مضاد حيوي و شاش أحطه بعد الكريم..
بعدين يتني النيرس و ساعدتني ألبس و نزلت أمشي بشوي شوي..و أنا ماأحس بشي لأنه مبنج..قبل ما أطلع سألت الدكتوره عن المخده الي يحطونها تحت ع الكرسي هي على شكل دايره و في الوسط فراغ..قالت هذي كويسه لأنها في الوسط ما في شي يضغط فيخفف الألم..
و نزلت من اللفت بشوي شوي و صعدت السياره و أنا أحاول ما أفتح ريولي واايد..
يعني لحد الأحين ما كنت أحس بشي..بس بعد ما خذنا الأدويه و رجعنا البيت لقينا عموه فديتها عند الباب و أنا أفكر شو بقول…نزلت و أحاول ما أخليها تشوف شي عليه فسألتني قالت بنتي شو فيج قلت لها أحس بتعب و فيني حراره في جسمي..و ها الشي صح كنت أحس بحراره..لأني ما أريد أكذب ع حد..قالت لي سلامات ما تشوفين شر..
و صعدت الدري فوق حبه حبه يشوي شوي..و عطول للغرفه آكل الأدويه لأن البنج بدى يخف..بصراحه لازم مهديات أول الأيام عشان ما نحس بشي…
و هذي قصتي..و أتمنى تستفيدون..
والحين كل وحده عندها سؤال ما يردها غير لسانها..عفواً غير إيديها…
يالله في حفظ الرحمن..
أحاول أكتب لكم و أنا منسدحه..بس الله يعلم كلي الي أريده أني أفيدكم..