عساكم طيبين ؟
اول شي هذا نكت ربيعتي الله لا يحرمني منها
وحبيت اطرح مشكلتي عندكم عل وعسى تلقولي حل
بس رجاءن عن الردود الجارحه .. بقولكم سالفتي من البدايه
الله يسلمكم من سنتين كانت وياي ربيعتي فالجامعه كنت وايد اعزها واحترمها وكنا مثل الخوات
وهي اصغر مني بسنه كنت اسولف معاها عن الدراسه والاهل .. شوي شوي دشت فسوالف ثانيه
قامت تعرفني عن نفسها اكثر واكثر تقولي انها تكلم شباب وعندها اصدقاء ومن هالكلام وكنت
منصدمه انها جي مع ان اهلها ناس ملتزمين ومتشددين كيف هي جي ؟! كنت دايما انصحها ولما
مافادت فيها النصيحه بديت ابتعد عنها شوي شوي بنت يرانا كانت تلاحظ اني ابتعد عنها وكنت اقولها
شو اللي صاير بعد فتره هالبنت قمت تتعرف ع بنات فالجامعه وتقولهم اسمي على انها هي وتالف
قصص حب وغرام وكلام ما ينقال بعد فتره وصلني الخبر عن طريق ربيعاتها وانا من غيضي قمت
اقول انها فلتانه بس ما تعمقت فالموضوع وهدت السالفه لين خلصنا امتحانات بعدين ياني رقم غريب
على فوني ولما رديت طلعت هي وقالت انها بتهددني بالشريط " فيه صوتي لما كنت معصبه "وبتشتكي علي لو ماعطيتها مبلغ كبير
انا خفت ماعرفت شو اسوي رحت وقلت لبنت يرانا عن الموضوع وقالتلي لا تخافين بقول لخوي
اخوها اصغر منا بسنتين بس ماشالله عليه عقله يوزن بلد ومتفهم حدد مع اخوها يوم على اساس
انه يروح يعطيهم الفلوس بس طلعو يبوني ايي ليش ما اعرف فقال حق اخته انها تروح معانا
رحنا وعطيناهم الفلوس وكلن راح بحال سبيله بس انا نفسيتي كانت وايد تعبانه من الموضوع
خاصه اني البنت الوحيده فالبيت وماعندي خوات وامي مع ابوي برع البلاد لان ابوي يشتغل برع
وعندي اخو واحد ومسافر يدرس برع وكان باقي ع رجعته اقل من شهر كنت خايفه انها تسوي
شي فهالفتره كنت دايما اروح بيت يرانا لاني اخاف اتم بروحي مع الخدم فالبيت وكانت بنت يرانا
تقولي ان اخوها يقولي ما اخاف ولازم ابين للكل اني ماسويت شي وخلاص الموضوع انقفل
انا زاد اعجابي فاخوها بس كنت اطرد كل الافكار اللي فبالي لانه هو صغير وانا ما اصلحله
كان باقي ع رمضان كم يوم واهلي ردو عسب يرمضون فالبلاد وكنت وايد مستانسه ولكن
كلام امي نرفزني وخلاني انعزل عن العالم قالولي ان واحد ياي يخطبني وانصدمت لما عرفت ان هو
اخو ربيعتي اللي خذت مني الفلوس والمشكله الكل يمدح فيه وفاخلاقه وانا كنت اموت من كلامهم
قمت ادعي كل يوم ان الله يفكني منه او يستوي اي شي عسب تتاجل السالفه الحمدلله الله استجاب
لدعواتي ويا ولد يرانا اللي ما كنت اتخيل انه بيي يخطبني وخطبني وملجنا بعد العيد بكم يوم
بس والله كنت دايما اتحسف اني يمكن جبرته انه ياخذني باللي صار لي وعرف عني
بس هو كان دايما يقولي انه كان معجب فيني وفاخلاقي ومن هالكلام استمرت خطبتها 3 شهور
وعقبها تزوجنا والله انعم علينا وحملت من ثاني شهر ويبت ولدي حبيبي اللي هو نسخه من ابوه
رغم ان الكل كان يشوف ان فارق السنتين اللي بينا بيسوي مشاكل لكن الحمدلله ع كل حال
ابوه كان متعلق فيني وايد لدرجه اني لما كنت ابا اروح لعمتي عسب تعلمني كيف اهتم فالبيبي
مايخليني وكان يروح معاي ويتعلم معاي كنت وايد مستانسه وكمل الياهل سنه ونص قمت احس
بالتغيير اللي صار فريلي قام وايد يخش عني ويطلع بالساعات ويقفل تلفونه مع ان قبل عادي
افتح الفون والعب بالالعاب قلت يمكن الدراسه والدوام لهنه عناا كنت اطنش فالبدايه بس لما
قام الموضوع يطور بانه يرد الساعه 5 الفير ويطلع من الصبح وما يسال عن ولده شكيت بالموضوع
قمت اساله وكالعاده يقولي ماصاير شي ولا تسالين انا يوم بحس عمري ابا ارمس بقولج
اهملني ونساني حتى اهله لاحظو نفس التصرف تجاههم امه ماقام يرمسها ولا حتى اخته الصغيره
لين بعد شهر يت امه وقالتلي ترا ريلج يبا يعرس عليج وانا مارضيت بس ما سمع كلامي وامس
يايقولي ان عرسه الخميس الياي حسيت ان حد جب ماي بارد علي وماقدرت ارمس بس قعدت اصيح
وافكر منو هاي اللي خذاها سالت عمتي قالت ماعرف قعدت ادقله لقيت فوناته مسكره لين اخوه
يابلي الفونات وعطاني اياهن وقالي امس يا الفليل وعطاني فوناته عسب تحطينهن عندج
حسيت الدم وقف فعروقي ترييت لين يوم الخميس اهله كلهم كانو فالبيت وهو مسوي العرس
فافخم صاله وفرقه ودنيا وكانه اول مره يعرس .. امه كانت وايد خايفه علي لاني صدق انصدمت
قلتلها ابا اروح القاعه ابا اعرف منو العروس منو اللي خذها فالبدايه رفضت بس لما شافت مافي
امل وافقت تروح معاي كان العرس اول خميس فشهر 7 رحت القاعه وكنت لابسه نقاب لان شكلي
كان يخوف من كثر الشحووب اللي فيه دخلت وكان هو معاها يتصورون عالكوشه ماكان في وايد
معازيم قربت من الكوشه وعمتي كانت تمسكني ماتباني اقرب اكثر انصدمت من اللي شفته ربيعتي
اللي ما اتشرف اقولها ربيعتي اللي خذت مني الفلوس هي زوجته ؟! انصعقت وطلعت من القاعه
اركض ماعرف وين وصلت وعمتي تنادي علي وانا ما اسمع صوتها ومسكتني وقعدت تقرا علي
ورجعت البيت وياليتني ما رجعت قعدت اكسر كل شي اشوفه جدامي كانت حالتي صعبه محد يتحملها
قعدت افكر ليش اختارها انا احلى عنها واضعف عنها وهي امتن عني ب10 مرات وانا اهتم بنفسي بشكي برشاقتي بلبسي بحياتي حتى فيه اهتم وما اخلي شي ينقصه بس ليش خذها ؟! ليش هي بالذات
ابوي لما درا بالسالفه عصب ورجع البلاد وقعد يتوعد له طبعا تم يتكلم مع عمي وفالاخير حلو
السالفه وقالي ابوي قعدي هالفتره لو حسيتيه مايباج ترا عندج اهل يبونج ماكان عندي رد
ترييت المعرس والعروس لين يردوون من شهر العسل وطبعا الاخ لما يا سوا اكبر طاف لاهله
ولولده وراح بيت اهل حرمته يبات عندهم عمتي كانت تصيح وحالتها حاله وخواته بعد ما كانو
يتوقعون هالشي يصير ولما رجع البيت وليته ما رجع ماقمنا نشوفه الا اول الصبح او نص الليل
كان يطلع حرمته الثانيه ويمشيها لانها المسكينه تمل من البيت واناا اللي كنت اترياه ايي اخر الاسبوع
من الدوام ماكاان حتى يطلعني السوق الا لما امه تقوله سبحان الله عيدنا وكنت اتعس وحده فالعالم
بالعاده فالعيد او لما ايي من برع البيت ماكان يخليني اسلم عليه جدام اهله كان يغار علي ويستحي
منهم بس مع الهانم حركات قله ادب وكلمات انا استحي اقولها كل هذا جدام اخوانه واخته الصغيره
اللي عمرها 10 سنين كنت اطنش اللي اشوفه لين ما ضجت ورحت الغرفه ونمت كنت اتخيل انه
بيي يسلم علي ويعطيني عيديتي لكن للاسف نشيت ع صوت ولدي وهو يصيح وصحت معاه
نفس اليوم حطيت اغراضي ورحت بيت اهلي وقعدت هناك شهر بس منو اللي بيسال عني ؟!
عمتي المسكينه كانت كل يوم ادق وتصيح وتقولي ردي وفالاخير ما بغيت اكسر فخاطرها ورجعت
ولدي من كثر ماقام مايشوف ابوه كان يقول لعمه بابا وهالشي خلا ريلي عدواني تجاهي وتجاه
اخوه حتى في مره تضاربو ع هالشي للعلم اخوه اكبر عنه بس بعده ما تزوج ..
الشهر اللي طاف ولدي تعب ووصلت حرارته 40 وكنت ادق لابوه عساس ايي يودينا المستشفى
قالي انا طالع اتعشى ويا حرمتي ترييني شوي وبييج والله يابنات من الساعه 10 ونص لين الساعه
4 الفير وانا انتظره عند الباب اللي برع ولدي تعب لدرجه صار تنفسه صعب وقمت اصيح من الخوف
لايروح من ايدي عمي كان ناش من الرقاد ولما شافني عند الباب تم معصب وقعد يسال وفالاخير
وداني المستشفى .. ولدي رقدوه فالعنايه المتوسطه لان الحراره مارضت تنزل وابوه ولا يدري عنه
عمي كان وايد معصب خصوصا لما عرف انه يدري ان الولد تعبان ومايا وبعد لما قلتله ان من عرس
ولامره نام معاي فالغرفه رجع عمي البيت وحلف انه يحل الموضوع سواء بالكلام او بالضرب
انا كنت فالمستشفى وماعرف باللي صار تفاجات لما دقلي ريلي وقعد يصارخ ويهزاني ويسبني
قعدت اصيح من اللي يصير شوي والا عطا لحرمته الفون وخلاها تكمل علي انا هني ماتحمل
قعدت اصارخ عليها لين طردوني من القسم لان صوتي كان عالي وماكنت اهدى عمي وعمتي
كانو دايما اييوني حتى خواته واخوانه والحمدلله ولدي طلع من المستشفى وعمي اصر اني
ارجع معاهم البيت رجعت للبيت كانت احتكاكاتي مع ريلي بسيطه بس يسلم ويسال عن الولد
من اسبوعين يا الفليل وقال بنام عندكم اشتقت لولدي طبعا انا فرحت لان ولدي اخيرا بيقعد
مع ابوه فتره طويله وعرفت ان حرمته راحت عند اهلها وقلت فقلبي ان شالله دوم تبات عند
اهلها عالاقل ولدي يستانس بشوفه ابوه وماينحرم منه مر الاسبوع بس والله تعامله مع الكل
تغير 100 درجه وصار يسولف معاي مثل قبل حتى قمنا نلعب غميضه ههه ونطلع برع البيت
بس للاسف هالفرحه ما كملت السبوع اللي طاف يوم السبت الفليل كنا نايمين وعمتي قبلها قالتلي
ان حرمته بتي بس ماتعرف متا وحرصتني اني اسكر فوناته عسب يرقد لان عنده امتحان يوم الاحد
وانا سويت اللي قالت عليه بس ما بتتصورون شو صار يت للغرفه وقعدت ادق عالباب جنه شي
مستوي لدرجه ان ولدي قام مفزوع من الرقاد وقعد يصارخ ويالله يالله هدا ونام اما هي دشت الغرفه
وقعدت تتفتل فيها وتطالع الاثاث وشلت ريلي وطلعو حسيت بالاحباط ساعتها لانه مشى وراها مثل
الخروف بدون ما يكسر كلمتها وانا معورني قلبي ع الحال اللي وصل لها كيف حرمه تمشي كلامها
عليه فاخر الاسبوع صار اللي ما كنت اتخيله يا ريلي عندي وقالي اباج باجر تفضين الغرفه
غرفتج عوده وحرمتي تباها لان الغرفه ذيج صغيره علينا والله يابنات ماعرف شو صارلي قعدت اصارخ عليه وهاي اول مره اسويها يبت شنطه وحطيت اغراضي واغراض ولدي فيها
رحت مشي انا وولدي لبيت اهلي لانه قريب وقبل لا اطلع قلتله خلاص عفتك طلقني اليوم قبل باجر
بس هو ولا كانه سمعني شل سله الحلاوه اللي فالغرفه ورح غرفه حرمته الثانيه قهر والله قهر
اخوي اول ماشافني عصب وحلف ما يرجعني وكان بيروح يضربه بس قعدت اهديه
صارلي اسبوع فبيت اهلي وانا من اول ما طلعت من بيتهم وانا مسكره فوني وما ارد ع فون البيت
عمتي كل يوم تييني وتطمن علي وتقولي انه مفتقدنج بس بعد شو بعد ما ذلني ويبديها علي ؟!
هو كان ايي بيتنا بس اخوي قال للحارس لو شفته ياي لا ادخله وانا ماكنت ابا اشوفه
امس فتحت فوني ولقيت 92 مسكول اغلبهن منه ورسايل وكله يترجاني ارجع وانه يحبني ومن هالكلام مسحت الرسايل والمس كولات وقررت اعيش حياتي من دونه بس لما صليت استخاره
حلمت انه مريض ويقولي عطيني الدوا وكنت ادور عالدوا فالدرج بس كل ما اراويه واحد يقولي
لامب هذا غيره .. قمت من حلمي مفزوعه ماعرف اتم معاه والا اطلق ؟!
يابنات انا تعبت سوري لاني طولت عليكم بس من الحره اللي فيني
دخيلكم شورو علي ونصحوني
بصراحة اختي الكريمة لم أعرف بماذا أعقب…
الموضوع مؤلم و محزن في نفس الوقت…
وكل ما أستطيع قوله…
عليكِ بالرقية الشرعية..واطلبي من والدة زوجك ان ترقي ابنها ( زوجك )
واكثري من الاستغفار و الدعاء و الاستخارة…والله المستعان
وفقك ربي و أبعد عنك الشر…
ممم ريلج فيه شي والافضل تفسرين حلمج عند شيخ موثوق
بس مثل اللي قالت العضوه اللي فوقي خلي عمتج ترقيه او تشغل القرآن في حجرته صوره البقره او ماي مقري عليه وتعطيه يشربه
ان شااء الله خير
هذا اختبار من الله يبا يختبر صبرج اصبري وربي بيعوضج خير يارب
لا طبعاً، شيلي فكرة الطلاق من راسك نهائياً .
شوفي يا أختي، قبل لا أقول لك رأيي، أكيد بتعرفي هذا الحديث :
عن أبي هريرة عن النبي صلى الله عليه وسلم قال : «لو كنت آمراً لأحد أن يسجد لأحد لأمرت المرأة أن تسجد لزوجها» [أخرجه الترمذي وقال حديث حسن].
وأنا تأكدت إنه ليس حديث ضعيف قبل نشره من خلال:
وأخرجه بنحوه أبو داود، وأحمد، وابن ماجه، وابن حبان في صحيحه، والبيهقي، والبزار، والحاكم، وقال: ( هذا حديث صحيح على شرط الشيخين ولم يخرجاه)، ووافقه الذهبي في التلخيص، وقال: (على شرط البخاري ومسلم)، وقال المنذري: ( رواه أحمد بإسناد جيد، رواته ثقات مشهورون، والبزار بنحوه ).
فالحديث له شواهد تقويه وترفعه إلى مرتبة الحسن. وقد اتفق العلماء على أن المراد بالحديث التأكيد على عظم حق الزوج على زوجته،
لو لا سمح الله تطلقتي، فكرك بتخلصي من المشاكل؟ إبنك وين تروحي فيه ؟ مو راح يصير أبوه محتاج يشوف الولد ؟
رح يصير عندك مشاكل ثانية إنتي في غنى عنها أصلاً . وترى مو كويّس إينك يكبر وأبوه مو موجود.
اتقى غضب الله ولا تطلبي الطلاق على أتفهه الأمور لقوله عليه الصلاة والسلام : (( أيما امرأة سـألت زوجها طـلاقاً من غير بأس ؛ فحرام عليهـا رائحة الجنة ))
وإدعي:
**اللهم يا مالك الملك ملكني قلب من أحوجتني إليه فأنت تقدر ولا
أقدر وتعلم ولا أعلم
وأنت علام الغيوب، وأسلل سخيمة قلبه وأصلحه لي وأجعله لا
يرى أحدا غيري ،
اللهم أصلح بيننا ولا تجعل بأسنا فيما بيننا وأجعل بأسك على
عدوك وعدونا ..
اللهم أفتح لي قلوبا غلفا وأعينا عميا وآذانا صما
**اللهم أستر عنه عيوبي وأستر عني عيوبه ..وأظهر له محاسني وأظهر لي
محاسنه
ورضني بما رزقتني وبارك لي فيه .
**اللهم ألجم فاه بكلمة لا إلاه
إلا الله وأسكن غضبه بلا حول ولا قوة إلا بالله .
**اللهم أرزقني حنان الزوج
والولد ومالا حلالا بلا عدد وقراءة القرآن إلى الأبد .
الله يصلح الأمور
