بأخذ خداماتي معي في السفر وش رأيكم ؟؟

قبل كم سنه سافرت من دون خدامه وجننوني عيالي تعبوني
لأنهم 4 وصغار طلعوا عيوني هذا يركض من هنا وهذا يتسدح
عالارض يبكي مايبي يقوم غير الاثنين الصغار بامبرز ومراضع
المهم انها كانت سفرة نكدددد

السنه هذي قررت أخذ معي خدامه تعاوني وبروح لتركيا
وقتها بيكون معي بيبي خامس
وبيكون عمره 4شهور باْذن الله
المشكله زوجي يقول مافيه سفر الا بخدامتين وحده ماتكفي
لأنهم 3 صغار 3سنين وسنتين و البيبي عمره 4شهور
وأبو ثلاث سنين احتياجات خاصه ويحب يراكض من مكان
لمكان مايخاف نهائي وعنييييد
عاد انا بصراحه ما أحب أخذ الخدم معي بالسفر حكره ومصاريف
بس قلت بأخذ وحده لاني فعلا مقدر عليهم لحالي
بس فكرة خدامتين مضايقتني احس انهم بيكونون عبء
علينا وكل وحده بتتكيسل عشان فيه ثانيه
زوجي يقول نخليهم بالفندق بعد مانمشيهم من الصبح للعصر
وتالي نتركهم مع الخدم وننزل نتمشى ولا نتقهوى ساعه
ولا ساعتين بروحنا
أنتم وش رأيكم بفكرة زوجي احد جرب ياخذ معه خدامتين واستانس
وهل فيه احد ترك عياله بالفندق مع الخدامه ونزل يتمشى وكذا
ابي رأيكم تكفوووون
😂😂

بسم الله تبارك الرحمن الله يخليلك عيالك بس لو أنا منك أأجل السفر شوي إلين يكبرون شويه.لا أنت بتستانسين و لا الأطفال بيرتاحون. أنا ما أحب السفر مع الخدم و أحس السفر فرصه لكسر روتين الحياه و الاعتماد على النفس . و أخاف من ترك الخدم مع الأطفال في الفندق لأني ما أثق فيهم أبدا. ممكن يتركونهم و يشردون أو يضربونهم أو… أو… كل شي ممكن خصوصا إذا كانوا الأطفال حركين. و فكرة أنك تودين خدامتين مصاريف على الفاضي .

نسيت اقولكم ان حقت العيال راعية نوم فلبينيه لكن اذا نامت ماقامت لازم اقومها
انا بنفسي ولا عادي تنام للظهر او العصر ماعندها مشاكل
ودي استانس في السفره هذي بس خايفه ان خدامتين ماينفعوني مثل يوم تكون معك
وحده وتشتغل من قلب

والله كلامكم صحيح وانا أحب الخصوصيه في السفر

بس المشكله مو من كثر سفراتي كل كم سنه سفره
والشي الثاني ماعندي خوات وامي كبيره بالسن يعني ظروفي
ماتسمح أبد أحطهم عندها وأسافر

كل الشغالتين مو نشيطات يعني مو راعيات مراكض ورا العيال
يعني جامدات وثقيلات حركه
بس وش أسوي هذا الموجود

اختي فلاورز الله يحفظلج عيالج

اذا في امكانية أجلي السفر احسن

اما اذا محتاجة للتغير خذي بشكارتين وياج بس لازم ثنتينتهم يكون من النوع النشيط عشان يتابعون الياهال عدل و لا تخلينهم ابدا في الغرفة بروحهم ، لا قدر الله يحصل ما لا يحمد عقباه و انت بتكونين فبلاد غربة، اختي قريت قصص تشيب الراس ياما ناس ضيعوا عيالهم ، انا ما اخوفج لكن انبهج.

اما اذا ممكن تتركين الكبار عند الوالدة، يعني اذا انت من النوع اللي يتحمل و عيالج ما عندهم مشكلة ، توكلي على الله اخذي الرضيع و الكبار خليهم عند الوالدة.

على فكرة انا ما اسافر الا وبشكارتي وياي ، لاني اتعب من الركض ورا بناتي و ولد المرحوم اخوي اللي دوم آخذه وياي يوم اسافر.

– – – Updated – – –

الله يسعدج و تستانسين في السفرة

انا بعد مسافرة لتركيا بإذن الله تعالي،،،

عاد لا تنسين تحطيلنا تقرير حلو بعد السفره،،،