باركولي يا عضوات انا ربيت يبت الشيخ عمر

حبيت اخبركن قصة ولادتي البدايه حلوه والنهايه(الولاده) حزينه قبل لاتقرن هاتن كلنكس
بسم الله :
يوم 6/5 اول شي الصبح قلت حق ريلي بنسير كارفور قالي لا ومادري كيف
قلتله لا بسير ابا اغراض هو طبعا خايف اربي فأي لحظه
وتم مصر على رايه عقب تميت احايله قال بوديج لكن اذا ربيتي يامريوووم بخليج انتي و ولدج في كارفور
قلت له نزين لانه عارفه انه يخوفني بس
خلاف سرنا وفالطريج خفت قلت له ع الاقل اطلب لاسعاف واشرد قال ماشي اسعاف ووصلنا وخمينا الكارفور ويوم بدا يحاسب ريلي قلت له عطني السويج بسير السياره وعطاني وهو خايف مبطل حلجه وعيونه ضحكني في عز الالم واقولكن بسرعه بسرعه حاسب وياني
هاه خير قلت له لا بس حسيت اني مب رايمه اوقف وظهري يعورني وخفت اربي وتسوي اللي قلت عليه
وتم يضحك قالي يعني يوم تخافين ليش تعاندين ترا ما ييبكن الا العين الحمره
عقب قالي فيج نسير نتغدا مكان قلت له هيه قال لو ربيتي بخليج في المطعم
قلت له العب غيرها وسرنا نتغدا وفي المطعم كباين عاد قصيت عليه خليت عمري بربي قال يالله يالله قلت له ماروم امشي دخيلك قال بشلج وعلى دخلة الفلبينيه يايبه القايمه مال الاكل قالت اوووه سوري تميت اضحك واطالعها والفلبينيه تضحك مب عارفه شوه السالفه وريلي يضحك عليها لانها تتحرانا نسوي شي اونه سوري عقب شرحنالها السالفه وهي طالعه من عندنا ميته م الضحك لكن صدق انصعق تم ينتفض فديته والله
خلاف تغدينا وعقب الغدا قلت له ابا حلو ف كلنا الحلو وسرنا مشينا مع انه الجو ارف عقب ردينا البيت
طبعا عيالي روضه ومحمد عند الوالده من قبل ولادتي بيوم
خلاف سرنا البيت عاد وريلي قال برقد ف سرت سبحت بماي دافي وييت برقد مارمت من الويع جان اوعيه
وعلى طول لبس كندورته وكابه وظهرنا
واول ماوصلت ودخلوني قالوا ولاده ف دخل ريلي تم يقرا علي ويقولي اقري حياتي وانا اقرى خلاف زاد الويع قلت له اظهر قال لا قلت له جانك تحبني وظهر >> يحبني يعني
بغيته يظهر ماحب يشوفني جي وظهر مع انه هوه عادي ماشالله قلبه قوي
عقب يقولولي بوش بوش وحاولي وجي وانا اقول ماروووم وتميت احاول احاول لين خلاص ماعدت اتحمل و جم مره يغمى عليه ورجعت كل اللي كلناه والصراحه ماتوقعت اعيش بعد الويع اللي شفته
اخر شي طفرت تميت اصيح ابا امايه والله ماسوي شي لين توصل خخخ المهم قالوا بتعبين ولدج وعاد من قالوا جي قلت حق عمري تعبت تسع شهور اخر شي اسويبه جي ف وانقطع نفسي حطولي الاكسجين عطيت كل اللي اقدر عليه والحمدلله شرف عمر وحطوه ع صدري وشلوه وانا دايخه اقولهم خلّووووووه
عقب دخل ريلي يصيييييح حط راسه ع راسي وارتحت
وخلاف يت امايه و ابويه وحبيبي اخويه
وبعد ماباركولنا
اخويه سأل ريلي شوه بتسميه؟ ريلي قال محتار اذا بتسميه سمه وانت مب غريب تراك خاله
وابويه قال مب بس خاله ريل عمته بعد يعني ماله بد
خلاف بدون تفكير اخوي قال حق ريلي سمه عمرريلي قال خلاص عمر

واخويه الصراحه يعرف يسمي واسامي اعياله كل واحد احلى عن الثاني والاسم وايد عايبني انا وريلي عيزنا ندور اسم واخوي في دقيقه سماه وخواتي وحمياتي بيتخبلن ع الاسم

ويمكن انا كنت ابا امايه لانها دووم رافعه معنوياتي ترا النفسيه تلعب دور فالولاده
طبعا تعسرت ولادتي لانه عضلات الحوض مرتخيه وما كانت تساعد ولا (عمر) ماكان وزنه زياده بالعكس وايد صغير