بكاميرا المراقبة , أكتشفت قرف خدامتي ؟!!

الظاهر اني ما اتأدب , مع انه صايرة معاي قصة قبل جي مع الخدامة القبلية وخبرتكم عنها
وما كنت بييب خدامة , خلاص قلت توبة
بس سبحان الله حصل مافي الحسبان , وحملت فوق بنتي
حملت وسارة عمرها 4 شهور

وسبحان الله أحس هذا أثقل حمل مر علي وايد وايد تعبت وبعدني تعبانة
وخاصة ولدي عمره سنتين ونص صغنون وبروحه يباله عناية واهتمام
والبنوتة حاليا عمرها 10 شهور وانا بنهاية الشهر السادس
والحمل متعبني , فأضطريت اييب خدامة
والحمدلله حسيتها زينة , وكل شغلها في الشقة انها تنظف الشقة (بس غرفتين وحمامين) وتغسل الصحون بعد الغداء لانه العشاء دوم من برع والغسالة عندي اتوماتكية
وتكوي ملابسي وملابس العيال بس لان كنادير ريلي يوديهم الدوبي وبالرغم من هذا حرقت لي عبايتين وغشوة وكندورة ولدي يديدة ابد ما لبسها
وطبخ اكلنا وأكل اليهال علي
فعودتها انها تأكل بنتي وتبدل لها الحفاظ , عشان ولدي عنيد وانا يالله يالله بصعوبة اشله عسب ابدل له الحفاظ ولا أاكله بضرابة
فهي عليها البنت جدامي وانا علي سعود
بس لاني حاليا ثقيلة وايد , ما اروم ايلس فترات طويلة لازم اتسدح واريح خاصة اني حملت فوق حملي علطول ما لحقت اريح ومن زود التعب حتى ما اروم اتنفس
فمن أخلص تأكيل سعود اسير الغرفة اتسدح وهي بالصالة تأكل البنت وباب غرفتي طبعا مفتوح عشان اسمعها وتيلس تأكل بنتي وجبة بسيطة ساعة كاملة أونها ما تأكل وعقب الساعة تقول اونه أكلته كله
واقول الحمدلله مع انه ما في اي تحسن بوزنها , هي مولودة كيلوين ونص صغيرة , واحين عمرها 10 شهور ووزنها 6 كيلو !!
وكانت عندي كاميرا مراقبة مباشرة ( يعني ما تسجل )
كانت لاختي وما بغتها فعطتني اياها , وكانت عندي فترة
وفجأة خطر ف بالي اليوم اني أحطه في الصالة قبل لا تأكل بنتي
ودشيت الغرفة ويلست أراقبها , الاقيها تعطي بنتي لقمة وتتركها تلعب بالالعاب وتنساها وتيلس تطالع التلفزيون وتحك شعرها وتتسدح واللقمة الثانية عقب ربع ساعة , كل هذا مب مشكلة بس الطامة الكبرى لقيتها تأكل من أكل البنت
أأأخ عليها , هي بروحها خايسة وريحة فمها تنشم على بعد متر واسنانها سود , وعلمتها ع النظافة ما في فايدة ووالله لولا أضطراري وتعبي خاصة انه هني ما عندي اهلي , كنت ما اخليها دقيقة عندي
مع انه جدامي بيرفكت , بس شوفوا شو تسوي من وراي اونها تعطيها لقمة وتأكل لقمة وعقب تيي تقص علي اونها أكلت وانا اقووووول ليش وزنها ما يزيد , وكنت أفتش في الزبالة والمطبخ والكلينكس اللي تعقه عقب تأكيلها , اقول عن تكون تقص علي بس ما الاقي شي , اثرها تأكله -عساها البطن-
المهم طلعت ويلست جدامها اراقبها وخذت البنت من عندها وسويت لها حليب وقلت بسير ارقدها انتي يلسي لاعبي ولدي بالدراجة
ودشيت ارقد البنت واراقبها الاقيها تسدحت على الكنب وبس تتكلم بصوت عالي اونها تلعب ولدي , اه يالقهر ع جذبها ,وعقب فترة قامت ترفعه بالدراجة على وراء اونه تطيحه وهو خايف وشوي يصيح هي تنزله وعقب فترة جي ترفعه فووووق وتنزله بقوة
وتيلس تتمدد على الكنب , مع انه جدامنا ما تتجرأ تيلس ع الكنب
وشي ثاني انا علمتها ابدا ما تؤطأ اللالعاب لانه بنتي تحطهم بفمها لانها تسنن فأحيانا تحط اللعبة بفمها
واذا تلمهم بأيدها
وبالفيديو الاقيها تجمعهم بريولها القذرة
هذه بس مرتين راقبتها وكل مرة بس 10 دقايق واكتشفت هالاشياء
الله يعين لو راقبتها فترة أطول , شو بحصل؟!!
المهم هذا كله يهون بس ياخوفي لو تسوي اشياء ثانية,
احين انا مضطرة اخليها عندي لاني تعبانة موت وما عندي حد وولدي صغير بعده ع الحفاظ وما يتكلم الا بكلمات مب مفهمومة وعنيد ونكدي وكله يضرب البنوتة ويعاندها لازم اكون معاهم 24 ساعة
والبنوتة صغيرة وايد ويبالها اهتمام و وبييني بيبي ثاني يبي اهتمام
يعني مضطرة مرة اني اخليها , وبنفس الوقت ما قادرة اتحمل قرفها واحيانا طولة لسانها وياويلي لو اكتشفت اشياء اكبر بالمراقبة
وصح بعد وااااايد تخرط , بحياتي كلها ماشفت أجذب منها , وايد تجذب , تسوي الشي جدامي عيني عينك اشوفها واقول ليش سويتي جي تقول لا ما سويته , اقولها شفتج تقول لا ما سويت
ابدا ما تعترف بأغلاطها
حتى يوم حرقت العبايات تقول مب انا , اقول عيل منو ؟ تقول ما اعرف !
اقول يمكن يني في البيت وانا ما ادري , وعاد انه كله ولا الجذب ما ادانيه بس متحملة

اااخ شو كارهتنها وما متقبلتنها ابدا ولايعة جبدي منها , مع اني وايد طيبة ابدا ما اصرخ ولا اعصب عليها حتى يوم حرقت عباياتي طنشتها لاني مضطرة

فأبي ارائكم شو اسوي ؟؟ هل اخليها واطنش هلاشياء ؟؟ لاني مضطرة

ولا اسفرها وافتك منها واربي عيالي بروحي واهتم بأشغال البيت , مع اني احسها صعبة
وهل تتوقعوا اني اقدر ؟؟؟

ومن جي مثلي عندها 3 وراء بعض وما عندها خدامة ؟؟ شو سوت ؟؟ وشو الاشياء اللي ساعدتها ع تربيتهم ؟؟ وكيف نظمت وقتها ؟؟

وسمحولي طولت عليكم , بس كنت حابة أفضفض ؟؟