بنتي تصيح و هي راقدة فالليل !! ساعدوني أرجوكم

السلام عليكم أمهات
بنتي الله يحفظها عمرها أربع سنوات من أسبوع تصيح و هي نايمه و أحاول أصحيها…بس تم تصيح تقريبا نص ساعة
أقولها شو فيج…مرة تقول بسير الألعاب و مرة تقول أبغي أيس كريم…أقولها ألحين نص الليل رقدي الله يهديج….

أغسل ويها و أوضيها مثل وضوء الصلاه عشان تصحصح و بعدين أرقدها…
تعبت سهرتني …لأنها لما تصيح كل إخوانها ينشون يصيحون فنفس الوقت بسبة الإزعاج اللي مسويتنه إختهم الكبيرة أنصاف اليالي..أتلعوز منو بسكت لسكت !! لأني بروحي أنام وياهم و أبوهم إيي آخر يومين فألأسبوع بسبة الدوام…و يساعدني ما يقصر، بس باقي أيام الأسبوع..آآآآآآآآآآه أصيح أحسني ما أقدر أتحمل … حتى مرات من السهر ما أقدر أقوم أصلي الفجر…و لما أقوم الصبح أحس بضيج لأني أخرت الصلاة….

هل صياحها فالليل طبيعي ؟ هل عندكم حل ؟ تعرفون شو السبب؟ لأنها بس هي من عيالي صياحة

يزاها الله خير اللي بتفهمني شو هذي الحاله و تعطيني حل؟؟؟؟ و لا تنسوني من دعواتكم

اختى حاولي ماتخليهم يلعبون برى البيت عقب المغرب وحاولي تحطين لهم اذكار الصباح والمسا واقرى عليهم عقب ماينامون وحاولي وانتي تقرين تمسحين على اجسامهم وواول ماتحسين ان الياهل يصيح اقرى وسمي عليه بالرحمان وخذيه فحضنج

اللي اعرفه هذا من اللعب طول اليوم ، يتم يتراوالها فالليل ، عندي ولدي عمره سنتين وشي نفس الشي وبصعوبه يرد يرقد ، وقبل البارحه غسلت ويهه ويلست معاه لين رقد ، شوفي شو تلعب ويخوفها في النهار وبتحلين المشكله ان شا الله ، والاخت بعد ما قصرت *

امسحي صدرها بزيت زيتون مقراي فيه يوم بتي ترقد و اقري عليها.. و شغليلها سورة البقره و وطي ع الصوت

يوميا شغلي الرقية الشرعيه برايه لو ما بتفهم بس خلي تسمعها

عسى الله يحفظها لج طبيعي بعض الأطفال يصيحون في الليل لأنهم وايد يلعبون وأكيد بنتج وايد تضحك وهي تلعب وأحسن شئ تسوينه تقرين عليها المعوذات حزت الرقاد ولا تحاتين هذا طبيعي مثل ما قلتلج وعسى الله يعينج…..

يزاكم الله خير…هي صح وايد تلعب و يضحكونها حمياتي فالليل …أصلا هي معظم الأوقات عندهم تبغي تلعب و يا باجي لصغارية…. و مشكورين على الردود

اذا طولت الحالة عندها خلي شيخ يقرا عليها