بنتي و حركاتها الغريبة

السلام عليكم حبيباتي, صراحة انا ما اعرف للمقدمات ف بدخل سيدا للموضوع
أنا عمري 26 سنة, متزوجة من سنتين ونص والحمدلله عطاني ربي احلى بنوتة عمرها الحين سنة و شهرين.. حاليا مغتربة في اوروبا بسبب ظروف زوجي, اما انا سيدة منزل و الحمدلله.. بنتي الحمدلله صحتها زينة وما عليها الا العافية بس في كم من شي يدور في بالي..
قبل كل شي بقولكم اني أنا انسانة فرفوشة و اجتماعية جدا, بس للاسف ماعندي اي صديقات في هالبلد كلهم في الأمارات, اعرف حريم و بنات كثار, اسلم عليهم لو شفتهم في الشارع او المول او في اعراس, لكن بعد السلام ولا وحدة منهم تتواصل معاي, دوم اطلب منهم نطلع سوا او نروح اي مطعم نغير جو او حتى زيارات خفيفة بدون اي رسميات يعني كاسة شاي و السلام,, لكن دوم يوعدوني انهم يردون لي خبر و انصدم لما اشوفهم يطلعون بدوني,, المهم ما علينا لان انا والحمدلله ممكن اعيش من غير صداقات, و ماشاءالله علاقتي مع زوجي و اهله و بالذات خواته لانهم بنفس عمري أكثر من روعة.. بس المشكلة في بنتي الله يحفظها,, احسها دوم وحيدة, تبي تلعب مع اي حد, لا عندها خوات و لا عيال أعمام.. انا الوحيدة من اخواني المتزوجة, و زوجي بعد الوحيد يلي متزوج, يعني محد من اخواني او اخوانه و خواته معهم عيال.. كل زياراتي لأهلي او أهله بنتي تكون بروحها الطفلة الوحيدة لان كلنا كبار, ما عندها حد تلعب معاه, دوم تركض لوحدها او تشوف رسوم او تشغل نفسها بأي شي قدامها, والله اغلبية الاحيان تقعد في زاوية الصالة تلعب بعلبة كريم او تلفون البيت او ريموت التلفزيون.
حاولت اخذها مكان لعب للاطفال, المكان اكثر من روعة و فيه ألعاب و نشاطات لكل اعمار الاطفال من دراجات و مراجيح و زحليقات و اماكن للقفز, للاسف بنتي لعبت عشر دقايق و بعدها ردت لعادتها, تمت تلاحق الاطفال تبي تمسكهم و تحضنهم (اي طفل نشوفه في الشارع لازم تروح لعنده تحاول تمسك يده او تحضنه), بس ردة فعل الاطفال كانت سيئة, الكبار دزوها لبعيد و الصغار امهاتهم قالوا لي وخري بنتك عن عيالنا,, اغليبة يلي في المركز مدخلين عيالهم مع عيال اخوانهم و كذا, يعني بنتي الوحيدة يلي دخلت بروحها لمكان كله اطفال ما تعرفهم ومع هذا تبي تلعب معاهم بس هم ما يبون… اعرف حريم عندهم اطفال, يوعدوني انهم لو راحوا المركز بيخبروني عشان اخذ بنتي تلعب مع عيالهم, في الأخير لا يقولون لي ولا شي و يروحون بروحهم وانا قاعدة في بيتي انتظر منهم خبر, ما احب افرض نفسي عليهم بس والله بنتي حبوبة وذكية ماشالله وتحب العشرة بس مادري ليش الناس صارت طبايعهم غريبة
أكثر شي مزعجني أن في الفترة الأخيرة لاحظت على بنتي تصرفات غريبة, صحيح هي ذكية و حركية ماشاءالله, بس مستواها الذهني غير عن مستوى الاطفال يلي بعمرها.. تقول بابا و ماما بس ما تعرف من بابا ومن ماما, ما تعرف تتكلم بالمرة و لا حتى تأشر بأصبعها, لو بغت شي تبكي ولازم احزر شو يلي تبيه لين ما اعرف انها كانت جوعانه او عطشانه او نعسانه.. الحمدلله ماتتعبني في النوم ابدا و تنام في سريرها و غرفتها بروحها من عمرها ست شهور.. ماتلعب بألعابها أبداااا, رغم اني اشتري لها ألعاب مناسبة لسنها و تكون ألوانها مغرية و يطلع منها اصوات او لمبات ملونة, بس ابد ما تلعب فيهم ولا يهمها عادي تمشي من قدام اللعبة الجديدة ولا كأنها شافتها, ممكن تلمسها او تشوفها بعد ما اللعبة الجديدة تقعد شهر او شهرين في الصالة, يعني مو مثل الأطفال يهتموا للشي الجديد لانه يجذب انتباههم.. في الفترة الأخيرة لاحظت عليها تمشي و تركض و هي ماسكه رأسها, او انها تمشي و عيونها في الارض لين ما تخبط في الجدار! و احيانا ما ترد علي لما انادي اسمها بس لو اغني اغنيتها المفضلة ممكن تلتفت لي,, دوم تحب تحضني و تبوسني و الحمدلله لا انا و لا ابوها مقصرين معاها بشي,, أرجوكم لا تقولون لي أحملي و جيبي لها اخ او اخت عشان تتونس, بصراحة ضروفنا حاليا ماتسمح ابدا وماعندي حد يساعدني في الغربة و ضروفي الصحية ما تسمح ابدا.. أنصحوني خواتي الله يفرج همها يلي تساعدني

حبيبتي بنتج والله عورت لي قلبي .. ربي يحفظها لج .. حبيبتي انتي لعبي معاها وونسيها .. بنتج شرا بنت اخويه بس احنا عندنا يهال غيرها ف البيت بس من امها ما كانت تتخالط وياهم مع انهم في نفس البيت ونفس الطابق لين كملت بنتها سنتين قامت اطلعها وتلعبها برع .. و نفس تصرف بنتج من تشوف اي بيبي تحضنه واتم اتبوسهم وجي بس عقب صارت عادي صارت اجتماعيه وتسولف ما شاء الله عليها .. يعني انتو في غربه دخليها حضانه لو عاداتهم وتقاليد غير عنا بس يمكن تتحسن بنتج ف النطق ولو نطقتك انقلش برايه بس المهم تسمعين حسها وماتحسينها مكسوره بين الصغاريه ومن ناحية اللعاب انتي لعبي معاها و ونسيها .. والبنات اكثر شي يحبون العرايس اللي فيهم شعر طويل خذيلها عرايس .. و لا لعبي معاها خليها تسوي شعرج يوم اييي ابوها تلعب في شعره منها تعرف من ماما ومن بابا وتتقرب منكم اكثر .. ولا تعتمدين على حد ان ممكن يتصلون فيج ولا شي سوووي مثل ما يسووون وان شاء الله بنتج مب محتايه عيالهم في شي انتي موجوده وماتقصرين .. ربي يعطيج الصحه والعافيه ..

ومن ناحية انها تركض وهي ماسكه راسها يمكن تكون مصدعه ولا شي انتي حاولي تريحينها واعرضيها على دكتور عشان تتطمنين اكثر

حياآآآآآتي فديتها الله يحفظلج اياها وتشوفينها عروس
ان شاء الله الخوات يفيدونج اكثر

عادي حبيبتي لا تحطين في بالج شي انا ولدى عمره سنه وشهرين يحب يراكض بروحه ويصارخه والالعاب مايلعب فيها واذا يا ولد اخوى عندنا يتم يخضنه ويبوسه ويقول له نونومعنه ماشي فرق بينهم ويتم يمسك بنت عمي الى عمرها شهرين ويبوسها ويبها على ريوله ويتم يقول لها نونو

بنوتج ما فيها شيء بس حليلها أكيد طفشانه من الروتين

طلعيها متنزهات واالاماكن العامه خليها تلعب ولعبي معاها

وفكرة الحضانة بعد حلوة

تسلمين حبيبتي, والله انها معورة قلبي.. بحاول اسوي يلي قلتي لي عليه.. تسلمين ما قصرتي

امين يارب,, واياج انشاءالله