السلام عليكم ورحمة الله وبركاته
يايبة لكم اليوم طريقة يديدة .. ولذيذة .. لطبخ بيض العيون.. تعلمتها من الوالدة الله يطول بعمرها .. وحبيت اشارككم فيها
نحن دايم نسويها في بيتنا .. وان شاء الله تعيبكم ..
المقادير (حسب عدد الأشخاص)
====================
بصلة صغيرة مفرومة ناعم جدا
ربع حبة فلفل رومي مقطعة مكعبات صغيرة جدا (لا نكثر منه .. لأنه إذا زادت كميته ستطغي على الطعم)
حبة طماطم متوسطة مقطعة مكعبات صغيرة جدا
بيض (يفضل بيض البيت .. ألذ يكون)
البهارات (ملح – فلفل اسود – فلفل احمر – بزار)
الطريقة
========
يقلى البصل حتى يصفر .. ويضاف له الفلفل الرومي والطماطم .. ويقلب ..
نضيف رشة خفيفة من كل من الفلفل الأحمر (ذرة فقط) والملح والفلفل الأسود والبزار .. ونقلب
نغطيه قليلا ونتركه على نار خفيفة .. حتى يذبل الطماطم والفلفل جيدا ..
هنا ذبل الطماطم جيدا
نضيف الآن البيض ..
بيضة
بيضتين
3 بيضات
يالله منو يزيد .. ههههههههههههه ..
انا اكتفيت بــ 8 بيضات ((طبعا العدد يتوقف على حسب حجم عائلتج))
الحين أضيف مرة ثانية رشة خفيفة من نفس البهارات على وجه البيض ..
وأغطيه مرة ثانية لحد ما ينضج البيض .. ويجف أي ماي موجود ..
نتركه على نار هادية جدا
وهو يحتاج تقريبا لحوالي 20 دقيقة إلى 30 دقيقة .. حسب كمية البيض وحرارة النار ..
جوفوا الصور
بعد ما يستوي البيض ويجف الماي .. نخوز الأطراف بهدوء بالملعقة..
مثل ما تشوفون في الصورة .. عشان يطلع كل الموجود في المقلاة وما يخترب القرص..
ونحطه في الصحن بك حرص .. مثل ما تشوفون شوي اخترب علي القرص لاني كنت مستعيلة شوي
وهاي صورة مقربة..
وهاي اقرب ..
يقدم مع الخبز .. على الريوق أو العشا .. على كيفكم
وصحة وعافية
شو رايكم ؟؟؟ تشهي الصورة الاخيرة ولا؟؟
أتمنى تكون عجبتكم الطريقة
وأتمنى تجربونها و تعطوني رايكم فيها
تسلميين
المشاركة الأصلية كتبت بواسطة M!Ss AD 
ردج اللي أروع غناتي
مشكورة على مرورج
المشاركة الأصلية كتبت بواسطة حزونه 90 تسلميين
الله يسلمج ويعافيج الغالية